Maajɨ Bɛtɔ Twamagɨɨ 5 - Dadiya NT

Hananiya Jǝbɔ Safiratu

¹ Kaa nǝl wo dun gǝnɔ nǝn Hananiya jǝbɔ nwala gɔ Safiratu. A miyo kaa talɨ jinɔ.

² Nǝngɔ a yʊ kaa jǝl wo a mʊgɔ kemʌnɔ ga nyaɨ, nǝn nyǝmtǝm nwala gɨɨ. Nǝngɔ a bɛ nǝn tangǝn kemʌnɔ ba ya a kǝga bɛtɔ twamagɨɨ.

³ Nǝngɔ Bitrus gɔ, “Mɔ Hananiya, n wɛ a bwɨ mɔ bǝla Mammɔ a dɔ mʊgɔ nǝl mʊnɔ, mʊ maa Yʊwa Kwaamaɨ gǝm gabakɛlɨ, mʊ yʊ kaa jǝl a mʊgɔ kemʌn talɨgɔ gǝmɨ?

⁴ Mʊ lǝga bɔ ń miyoi, n ke bɔ a mɔ ka? Kwama mʊ miyom tagɨ, kemʌnɔ ke bɔ a mɔ ka? N wɛ a bwɨ mʊ dǝg bʊʊlalɨ maajɨ nɨ a mʊgɔ nǝl mʊnɨ? Mʊ gabam bɔ nǝl kɛl nɨ. Mʊ gabam Kwaama.”

⁵ Nǝn kwama Hananiya a nyʊwam kɛl nɨɨ, nǝngɔ a gǝla yal a tǝm a bʊlaɨ. Nǝn kwama nǝb nɨ gwam a nyʊwam jʊ nɨɨ, taalɔ a ta ji dangǝn.

⁶ Bɛtɔ bayǝlǝmɔ ja gun ja kʊlʊm bʌlʌn gǝnɔ a dwang, nǝngɔ ja shu nǝn gɔ a yooli ya ja fʌl gǝnɨ.

⁷ A gul kemʌnɔ taal, nǝngɔ nwala Hananiyaɨ a dɔɨ, a nyǝm bɔ jʊ a bwɨɨ.

⁸ Nǝngɔ Bitrus a sʊwa gǝn gɔ, “Sʊwa ɨ, wʊnɨ nǝn gɔ kemʌnɔ gwam ja ywa jen a dul talɨ nɨ ka?” Nǝngɔ a jǝla gǝn gɔ, “Ɔɔ, nǝn gɔ kemʌnɔ gwamɨ.”

⁹ Nǝngɔ Bitrus a sʊwa gǝn gɔ, “N wɛ a bwɨ jǝ́ mʊrkam nyiyo jengɔ jǝ́ tɛl Yʊwa Tɛlalɔɨ? Kaa lɔl mʊnɔ nyʊwa kʌbʌl naa nǝb nɨ ya fʌl bwɨla mʊɨ, jǝ na a nyanga kan. Jǝ do ń do ń ja jel nǝn.”

¹⁰ A tʌgo a daagɔ nǝngɔ a gǝla a yal a kǝga gǝn a bʊlaɨ. Nǝn kwama bayǝlǝm nɨ a dɔmɨ, ja nya gǝn a bʊla. Nǝngɔ ja do gǝn ja jel nǝn gɨɨ, ja fʌl gǝn a daalɨ bwɨla gɨɨ.

¹¹ Gʌleng taalɔ a ta mʊrkalɨ nǝb bwangtǝm Kwaamaɨ gwam, jǝbɔ nǝb nɨ gwam a nyʊwa fulon kanjǝl nɨɨ.

Bɛtɔ Twamagɔ A Maa Kanjǝl Laatǝm Kang A Gǝlala

¹² Bɛtɔ twamagɔ a maa kanjǝl nʊngtǝm jǝbɔ jǝ laatǝm kang a gǝlala a kʊm nǝbɨɨ. Nǝb bwangtǝmɔ gwam gǝ mʊrka mʊrka a lʌbo Sulemanui a talɨ Kan Kwaaman.

¹³ Tangǝn nǝbɔ gwam, mɨ nǝn nʊ nɨ a mwɨ a dɔ mʊgɔ bɛtɔ twamagɨɨ, nǝbɔ gwam nǝ ji dʊʊn jinɔ lɛ sul.

¹⁴ Nǝb nǝtǝm bɨlǝngkɛlɔ a daagɔ Tɛlalɔ woi, jǝ bwi lɛ nǝn bɨlǝngǝn, batǝm jǝbɔ nɔɔtǝm.

¹⁵ Nǝbɔ a jel nǝn nǝb nɨ mɨ kwamɨgǝnɨ a kʌng gola. Ja ya ji a dʌbʌl kʌshen jǝbɔ fiyodaalɨ. Jǝ sʊwa lɛ a nǝl jin gɔ, “Na Bitrus ba shu lɛɨ, kɛna duuli gǝnɔ ba yɔ lɛ a bʊtɔ kaamɨ.”

¹⁶ Nǝbɔ a gǝlala na bɛ lɛ a tuulɔtɨn nɨ a kɔtʌgo a Urushalimaɨ, jǝ bɛ lɛ nǝn nǝb nɨ mɨ kwamɨgǝnɨ jǝbɔ nǝb nɨ nǝblaamɔ kom ji lɛɨ. Gwam ja gung ji.

Bɛtɔ Twamagɔ A Nɔɔ Gaalan A Kɛl Nǝtǝm Bɨlǝngkɛl Jinɔ Gǝm

¹⁷ Nǝngɔ dalɨ nǝkǝlagɔ jǝbɔ nǝb nɨ gwam jǝ dakinii, nǝb nya nǝbɔ Sadukiyaɨ, ja maa nungon jǝbɔ bɛtɔ twama nɨ dangǝn.

¹⁸ Nǝngɔ ja gun ba ja taba bɛtɔ twamagɨɨ. Ja tal ji a lɔsomii.

¹⁹ Nǝn kum, nǝngɔ kaa bwɛ twama Tɛlalɔɨ ba wum nyanga kan lɔsomigɨɨ. Nǝngɔ a jǝg jii, a sʊwa ji gɔ,

²⁰ “Jǝ́ yɔ, ya jǝ́ tɨ a talɨ Kan Kwaaman. Jǝ́ sʊwa nǝbɔ kɛl kʊlɨ nɨ gwam.”

²¹ Nǝn kwama ja nyʊwam nyɨɨ, nǝngɔ ja dɔ talɨ Kan Kwaamanɔ nǝn kumsʌli, jǝ maa mɛlalɨgɔ lɛɨ. Nǝn kwama nɨ dalɨ nǝkǝlagɔ jǝbɔ nǝb nɨ jǝ dakinii, ja mʊrka ja jo nǝb yɨmɨ jǝbɔ nǝb dʊʊm kotere nǝbɔ Israilaɨ gwamɨ, nǝngɔ ja tʊng gɔ ya ja bɛ nǝn bɛtɔ twamagɔ a lɔsomii.

²² Nǝn kwama nǝb tɔɔtǝm Kan Kwaamanɔ ja yɔɨ, ja nya ji bɔ a lɔsomi. Nǝngɔ ja yǝla ba ja sʊwa ji gɔ,

²³ “Ya nǝn nya lɔsomigɔ a kubʌl kubʌli, jǝbɔ nǝb tɔɔtǝmɔ tɔɔ nyanga kanɔ lɛ. Nǝn kwama nǝn wumi, nǝn nya bɔ kaa nǝl wo a mʊgɔ gǝn.”

²⁴ Nǝn kwama nɨ nǝ dʊʊ nǝb tɔɔtǝm Kan Kwaamanɔ jǝbɔ dʊʊm nǝbkǝlamɔ a nyʊwa nyɨɨ, nǝngɔ jʊ nɨ a bwam dul jini. Jǝ bʊʊla lɛ gɔ n wɛ jʊ nɨ bɛ lɛ nǝnɨ.

²⁵ Nǝngɔ kaa nǝl ba sʊwa ji gɔ, “Nǝb nɨ jǝ́ dǝg a lɔsomii, n wɔ jǝ tɨm a mʊgɔ talɨ Kan Kwaaman, jǝ mɛla nǝbɔ gǝm lɛ wo.”

²⁶ Nǝngɔ nǝ dʊʊ nǝb tɔɔtǝm Kan Kwaamanɔ jǝbɔ nǝb dʊʊmɔ ya ja bɛ nǝn bɛtɔ twamagɨɨ. Ja bɛ nǝn ji a jǝlatǝm ji, jʊ a bwɨɨ, jǝ sa lɛ gɔ ka nǝbɔ a jʌbo ji nǝn malatǝm tɛl.

²⁷ Nǝn kwama ja bɛm nǝn bɛtɔ twamagɨɨ, nǝngɔ ja dǝg ji ja tɨ a kǝga nǝb dʊʊm koteregɨɨ. Nǝngɔ dalɨ nǝkǝlagɔ a fɨɨ ji gɔ,

²⁸ “Nǝn gʊ lɔl jenɔ dangǝn nǝn gɔ ka jǝ́ yǝla lɛ tag jǝ́ maa mɛlalɨ a mʊgɔ dun nɨ. N wɔ jǝ́ yii mʊgɔ Urushalimagɔ nǝn mɛlalɨ jenɔ. Jǝ́ swɨ lɛ jǝ́ tʊng nǝm tʊʊm bwaa bwɛ nɨɨ a dul nǝn.”

²⁹ Bitrus jǝbɔ bɛtɔ twamagɔ ja jǝla gɔ, “Mɨ gʊtǝm wo nǝn gul, nǝn bwangtǝn bwang diil Kwaamaɨ, ke bɔ a nǝfilii.

³⁰ Kwaama tʊgalam bǝnɨ a gung Yesu, wʊnɨ jǝ́ jʌ gǝn a dʌbʌl tɨya kʊʊtǝmɨ.

³¹ Nǝngɔ Kwaama a gung gǝn a kang jajǝng gǝnɨ, a yǝlam Dʊʊ jǝbɔ Nǝbʊʊlɨ, sǝ a wum nǝbɔ Israilaɨ gǝm gola ja yǝla ja bǝla bwɨlangkɛl jinɔ, sǝ ja nya kǝlǝmtǝm bwɨlangkɛl jinɔ.

³² Nǝn yǝlam nǝb nǝtǝm nyiyo a kanjǝl nɨ gǝm, gǝ na nyɔ Yʊwa Kwaamaɨ a nǝ nyiyo a kanjǝl nɨ gǝm, wʊnɨ Kwaama a nǝ nǝb nɨ nyʊwa diil gǝnɔ lɛɨ.”

³³ Nǝn kwama nǝb dʊʊmɔ a nyʊwam kɛl nɨɨ, nǝngɔ ja mɔ nabwɨl nǝn bɨlǝngǝnɨ, jǝ swɨ jʌtǝm bɛtɔ twama nɨ lɛ.

³⁴ Kaa bwɛ Farisa wo dunɔ nǝn Gamaliyal. N nǝ mɛlalɨ diil. N nʊ nǝbɔ gwam nǝ gǝn dʊʊn nɛɨ. Nǝngɔ a gun a tɨ a kǝga nǝb dʊʊm koteregɨɨ, a sʊwa ji gɔ jǝ jǝg nǝb nɨ a yooli dɨn.

³⁵ Nǝngɔ a sʊwa nǝb yɨmɔ gɔ, “Jǝ́ nǝbam mɨ nǝbɔ Israilaɨ, bɛ jǝ́ fɛ jǝ́ dʌng jʊ nɨ jǝ́ swɨ lɛ jǝ́ maa nǝb nɨ gǝmɨ.

³⁶ Joltɨn nɨ a shui, kaa nǝl a jel, jǝ jo gǝn gɔ Tudas. A do dul gǝnɔ na kaa jǝl, nǝbɔ fʊlkʊb naal a bwang gǝmɨ. Ja jʌ gǝn. Nǝngɔ ja kwɨ nǝb bwangtǝm gǝnɨ. Nǝngɔ a bɛ nǝn dɨltǝm jini.

³⁷ A gul gǝn, kaa nǝl dunɔ nǝn Yahuza, n bwɛ Galilii, a jel nǝn kwama jǝ kiyom nǝbɔ lɛɨ. A dǝg nǝbɔ bwang gǝm lɛ a maatǝm kutʌm. Nǝn kwama ja jʌm gǝnɨ, nǝngɔ ja kwɨ nǝb bwangtǝm gǝnɨ.

³⁸ “Mǝ sʊwa jen nɛ kǝngkǝnɨ, jǝ́ jelʌm a gola jinɔ gǝm. Jǝ́ bǝla ji wo. Na n jʊ ja fwam jǝbɔ maajɨ nǝfilii, kʌbo kʌbo.

³⁹ Na maajɨ nɨ na a Kwaamaɨ, mɨsɔ jǝ́ la lɛ nyɔ jǝ́ kaa nǝb nɨ wo. A bʊm bɔ ja nya jen jǝ́ maa kii lɛ jǝbɔ Kwaama.” Nǝngɔ mʊrkalɨ nǝb dʊʊmɨ a jǝla nǝn kɛl gǝnɨ.

⁴⁰ Nǝngɔ ja jo bɛtɔ twamagɨɨ, ja bʊg ji, ja sʊwa ji gɔ ka ja sʊwa lɛ kɛl nǝn dun Yesui. Nǝngɔ ja dem jim kangɨ.

⁴¹ Bɛtɔ twama nɨ a gun a bǝla nǝb dʊʊm koteregɔ, ja jel. Jǝ maa bǝlátǝm lɛ gɔ jǝ kuwo, jǝ la nyɔ, jǝ nɔɔ gaalan a kɛl dun Yesui.

⁴² Kum jǝbɔ kum jǝ na a Kan Kwaaman jǝbɔ lɔ ja bǝla bɔ mɛlatǝmɔ jǝbɔ kiyotǝm fulon kɛl lǝmɨgɔ, gɔ Yesu nǝn gɔ nǝn Kiristii.