Maajɨ Bɛtɔ Twamagɨɨ 3 - Dadiya NT

Bitrus A Gung Nʊ Nɨ Naagɔ A Swam Swamɨ

¹ Kaa di Bitrus jǝbɔ Yohana jǝ shu lɛ a Kan Kwaaman nǝn kwama maatǝm keli, kemʌnɔ taal na kwaamɨ.

² A nyanga Kan Kwaaman nɨ jǝ jo lɛ gɔ, Nyanga Bʊmɨ, kaa nǝl wo wʊnɨ jʊ a tǝl nǝn bʌtʌm gǝnɨ naatɨnɔ a swamam swamamɨ. Kwangkwang jǝ do gǝn sǝ ja yɔ nǝn a nyanga lɔng, sǝ ya kela keli lɛ a daagɔ nǝb nɨ dɔ Kan Kwaaman nɛɨ.

³ A kuwo Bitrus jǝbɔ Yohana ba jǝ dɔ Kan Kwaamanɔ lɛɨ, nǝngɔ a kel ji kemʌni.

⁴ Bitrus jǝbɔ Yohana ja tal gǝm nugɨɨ, nǝngɔ Bitrus gɔ, “Dʌng nǝn!”

⁵ Nǝngɔ bʊʊlalɨ gǝnɔ a yǝla a daa ji woi, dʌng lɛ gɔ jǝ nǝ gǝn kaa jǝl.

⁶ Nǝngɔ Bitrus gɔ, “Kemʌnɔ jǝbɔ mʊnɔ mɨ mǝ nǝn. Jʊ mǝ nǝnɨ, mǝ nǝ ń nǝ ń. A mʊgɔ dun Yesu Kiristii bwɛ Nazaratɨ, gun, yɔ yɔmɔ.”

⁷ Nǝngɔ Bitrus a ta kang jajǝng gǝnɔ a gung gǝnɨ. Tʌgo a daa gɔ, naa gǝnɔ jǝbɔ kʊlǝn naatɨn gǝnɔ a kwama.

⁸ Nǝngɔ a gun dǝbǝr a tɨ sɨnɨ, a tǝl yɔmɨ, a dɔ mʊgɔ Kan Kwaamanɔ jǝbɔ ji, yɔ lɛ, mɔba lɛ, bǝlá Kwaama lɛ.

⁹ Nǝbɔ gwam ja kuwo gǝn yɔ lɛ bǝlá Kwaama lɛ.

¹⁰ Ja nyǝm gɔ nǝn gɔ gǝ yɨ lɛ a nyanga lɔng Kan Kwaaman nɨ jǝ jo lɛ gɔ Bʊmɨ gǝ maam keli lɛɨ. Nǝngɔ ja ta kang a nyiyo nǝn jʊ nɨ a bwɨ jǝbɔ gɨɨ.

Kɛlɔ Bitrus A Sʊwa A Mʊgɔ Kan Kwaamanɨ

¹¹ Nǝn kwama nʊ nɨ naagɔ a swam swamɨ, nʊ nɨ ja gung a nyanga lɔng Kan Kwaaman nɨ jǝ jo lɛ gɔ Bʊmɨ, a ta Bitrus jǝbɔ Yohana tɨm jǝbɔ jii, nǝngɔ nǝbɔ gwam a bɛ nǝn sʊgɔl a daa ji woi, a daa nɨ jǝ jo lɛ gɔ lʌbo Sulemanui, ja ta kang a nyiyo.

¹² Nǝn kwama nɨ Bitrus a kuwo nyɨɨ, nǝngɔ a sʊwa nǝbɔ kɛlɨ gɔ, “Jǝ́ nǝbɔ Israilaɨ, n wɛ a bwɨ jǝ́ ta kang a nyiyoi? N wɛ a bwɨ tag jǝ́ dʌng nǝn nɛ, maamɔ jʊ nɨ nǝ maaɨ, nǝ maa nǝn kwaan dul nǝnɨ? N ke bɔ dǝgtǝm dul nǝn a bwangtǝm Kwaamaɨ a dǝg bwɛ nɨ yɔmɨ.

¹³ Kwaama Ibrahimi, jǝbɔ Ishakui, jǝbɔ Yakubui, Kwaama tʊgalam bǝnɨ, nǝn gɔ a gung dun Bwɛ jwaalɛ gǝnɔ Yesui. Jǝ́ miyo gǝn sǝ ja jʌ gǝn, jǝ́ kɔ gǝn a kǝga Bilatusi, Bilatus nǝn tɨkǝga, a maa sǝ gǝ dem gǝm kang.

¹⁴ “A jenɔ jǝ́ kɔ Nǝ Sagsag nɨ, Nǝ Dǝngdǝngɔ. Jǝ́ bʌ gola jengɔ ja dem jem kang a nǝ jʌtǝm dulɔ gǝm.

¹⁵ Nǝngɔ jǝ́ jʌ nʊ nɨ nǝn gɔ jʌng kʊlɨgɨɨ. Kwaama a gung gǝn a bwaagɔ gǝm. Nǝn nǝ yǝlam nǝb nɨ a kuwo kanjǝl nɨɨ.

¹⁶ “Nʊ nɨ jǝ́ kuwo lɛ, jǝ́ nyǝmɨ, n gola nǝtǝm bɨlǝngkɛl a dun Yesui a nya kwaan yɔmɨ. Bɨlǝngǝn, n nǝtǝm bɨlǝngkɛl nɨ a daagɔ Yesu woi, nǝn gɔ a nǝ gǝn kwaan bʊtɔ a kuwotǝm jenɔ gǝm gwamɨ.

¹⁷ “Kǝngkɔ, kambɔ, n nyǝm jǝ́ maa jʊ nɨ ke bɔ a mʊgɔ nyǝmtǝm jeni, kanga nǝb dʊʊm jenɔ a maam tʌjii.

¹⁸ Kwaama a yii jʊ nɨ a sʊwa a nyiyo nǝbkuwotǝmkǝgagɔ gwamɨ gɔ, Kiristi gǝnɔ nyʊwa nyʊwa gaalan.

¹⁹ A dul kɛl nɨɨ, jǝ́ yǝla jǝ́ bǝla bwɨlangkɛl jenɔ, jǝ́ yǝla a daa Kwaama woi, sǝ a saal jem bwɨlangkɛl jenɔ, a nǝ jen fǝbtǝm.

²⁰ Twam jem twam Kiristi, wʊnɨ nǝn gɔ nǝn Yesui, nʊ nɨ a jǝgǝm n kɛl dul jeni.

²¹ Yesu yɨ yɨ a mʊgɔ dʌbʌl kwama, a yɔ nǝn a kwama nɨ jǝ fɛ kanjǝlɔ lɛ gwam a yǝlam a fɨɨ, kanga Kwaama a sʊwa galɨgǝn a nyiyo nǝbkuwotǝmkǝga gǝnɔ gǝmɨ, nǝb sagsagɔ.

²² “Musa a sʊwa gɔ, ‘Tɛlalɔ jen Kwaama jǝg jem jǝg kaa nǝkuwotǝmkǝgagɔ a kʊm nǝbam jeni, kanga a jǝg ɨ. Bɛ jǝ́ kaa lɔl, jǝ́ nyʊwa jʊ sʊwa jen nɛɨ.

²³ Yǝlam nyɔ, nʊ nɨ a kaa bɔ lɔl a nyʊwa nǝkuwotǝmkǝga nɨɨ, jǝ kaa gǝn kaa a kʊm nǝbɨɨ.’

²⁴ “N bɨlǝngǝn, nǝbkuwotǝmkǝga nɨ gwam a maa kuwotǝmkǝgaɨ, jʊ a ta a dul Samailaɨ, a ba la nǝn a nǝb nɨ a bɛ a gul gǝnɨ, ja sʊwa kɛl a dul kumtɨn nɨ gǝm.

²⁵ Nǝjen jǝ́ bɛtɔ lɔ nǝbkuwotǝmkǝga nɨɨ. Nǝjen tag jǝ́ yo swatǝm yaa nɨ lɛ Kwaama a maa tʊgalam jenɔ gǝmɨ. Nǝngɔ a sʊwa Ibrahim gɔ, ‘A mʊgɔ dʊʊm mʊn jǝ maa nyiyotɨn tǝm nɨ gǝm gwam bwili lɛɨ.’

²⁶ Nǝn kwama nɨ Kwaama a jǝgǝm bwɛ jwaalɛ gǝnɨ, a tǝl a twam gǝn a daa jen woi, sǝ a dǝg jem bwili a gola yǝlamtǝm nǝn jen gwam a bwɨlan.”