Maajɨ Bɛtɔ Twamagɨɨ 27 - Dadiya NT

Bulus A Dɔ Tɨyamwɛngɔ A Shu A Roma

¹ Ja fɛka kanga nǝ gun nɛ a tɨyamwɛng nǝn shu a Italiyaɨ, nǝngɔ ja dǝg Bulus jǝbɔ kaam nǝb golmanɔ a kang kaa dʊʊ sʊwajaam dunɔ nǝn Yuliyas, a nya Kaisarɨ.

² Nǝn dɔ kaa tɨyamwɛng a Adaramitiya, wʊnɨ a fɛka guntǝm sǝ a shu a kaam tuulɔtɨn nɨ a kʌng wɨma Asiyaɨ. Nǝn tǝl yɔmɔ nǝbɔ Aristarkus, kaa bwɛ Tasalonika a tǝm Makidoniya.

³ Nǝn tǝmsɛlɨɨ, nǝn bɛ a Sidon. Yuliyas dʊʊ sʊwajaam nɨ a maa Bulus gǝm jǝ nya. A bǝla gǝn sǝ a yɔ ya kuwo fatǝlam gǝnɔ, sǝ ja tɨka gǝn.

⁴ Nǝn gun wo nǝn tɨyamwɛngɨ, yʊwagɔ kom nǝn nɛ. Nǝngɔ nǝn kɛla a gul Sayifurusi, tǝm nɨ a tɨbǝl wɨmaɨ.

⁵ Nǝn yab wɨma nɨ a kɔtʌgo a gwanga tǝm Kilikiya jǝbɔ Bamfiliyaɨ, nǝngɔ nǝn la Mira nɨ a tǝm Likiyaɨ.

⁶ A daa gɔ nǝngɔ dʊʊ sʊwajaam nɨ a nya kaa tɨyamwɛng Iskandariyaɨ, wʊnɨ shu lɛ a tǝm Italiyaɨ, nǝngɔ a dǝg nǝn woi.

⁷ Nǝn maa kum jǝbɔ kumtɨn nǝn yɔ lɛ nǝn lǝma nyɔ. Nǝn dɔta nǝn yɔ nǝn dɔɔm jǝbɔ Kinidasɨ. Yʊwagɔ a kaa nǝn jatǝm kǝgaɨ, nǝngɔ nǝn kɛla a gwanga nɨ mɨ yʊwa woi, a gul Karita a tǝm nɨ a tɨbǝl wɨmaɨ, wʊnɨ a kɔtʌgo a Salmonii.

⁸ Nǝn shu nǝn gaalan. Nǝngɔ ya nǝn la kaa daa nɨ jǝ jo lɛ gɔ Tɨm Nyaɨ, wʊnɨ a kɔtʌgo a tuulɔ Lasiyaɨ.

⁹ Nǝn ta bʊtɔ a daagɔ. Jolɔ a kwɛl a kʊta. Kum Dikulom Jǝgtǝmɔ a bwɨlangkɛlɨ a shu. Na nǝ ja kǝga nǝn yɔm nɨɨ, nǝn nyʊwa nyʊwa gaalan. Nǝngɔ Bulus a sʊ jim yʊlanɨ.

¹⁰ A sʊwa ji gɔ, “Nǝfitʌm, n kuwo yɔm nɨ nya nya komtǝm. Bǝ lɛ lɛ kanjǝlɔ a lada. Ke bɔ tɨyamwɛng jǝbɔ kanjǝl nɨ kwaaji, bǝ lɛ lɛ kʊlɨ bǝnɔ tag.”

¹¹ A dʊʊ sʊwajaamɨ a jǝla bɔ nǝn jʊ Bulus a sʊwaɨ. A ya nǝl gǝnɔ a daa nǝ mǝgtǝm tɨyamwɛngɔ woi jǝbɔ nǝ tɨyamwɛngɔ.

¹² Ja kuwo daa tɨm tɨyamwɛngɔ a Likiya a bʊm bɔ tɨyamwɛngɔ a ja shenagɔ woi, nǝngɔ kɔrɔ jinɔ a jǝla gɔ jǝ sʊtǝn yɔmɔ, kɛna jǝ la Finikiya lɛɨ, sǝ jǝ maa shenagɔ wo. Finikiyagɔ na kaa daa tɨm tɨyamwɛng a Karita, tǝm nɨ a tɨbǝl wɨmaɨ, wʊnɨ dʌng gǝlalǝng diyengɔ lɛɨ jǝbɔ gwilʌng diyengi.

Fitǝm Mwɛ A Wɨma

¹³ Yʊwagɔ a tǝl fʌl bɛ lɛ a gǝlalǝng dǝm dǝmɨ, nǝngɔ nǝbɔ dʌng lɛ gɔ laa gaalan jinɔ a nya ywatǝm. Nǝngɔ ja gʊ ankagɔ (kemʌn nɨ a tuu tuui), ja bwangtǝn a keli Karitaɨ, tǝm nɨ a tɨbǝl wɨmaɨ.

¹⁴ A kʊta bɔ, nǝngɔ yʊwa kwamɨgɔ a gun a gwilʌng gwanga twalɨ a tʊng nǝn a wɨmaɨ.

¹⁵ Yʊwagɔ a ga tɨyamwɛngɨ, tɨyamwɛngɔ a dwal bɔ a shu a kǝga. Nǝngɔ nǝn bǝla wo yʊwagɔ tʊng nǝn nɛɨ.

¹⁶ Nǝn bwangtǝn a kaa gul tǝm nɨ a tɨbǝl wɨmaɨ, wʊnɨ jǝ jo lɛ gɔ Kaudaɨ, a bwa nǝngɔ nǝn nya kwaan nǝn gʊ bɛ tɨyamwɛngɔ nǝn bɛ nǝn a daa tɨyamwɛng dʊʊnɔ woi.

¹⁷ Kwama ja gʊm bɛ tɨyamwɛngɔ a mʊgɔ tɨyamwɛng dʊʊnɨ, nǝngɔ ja maa yʊlan ja bwaba bʊtɔ tɨyamwɛng dʊʊnɔ nǝn dwangɨ, kage a wʊlala. Nǝngɔ ja shigalam bɨlǝntɨn gǝnɨ, ja bǝla yʊwagɔ a tʊng tɨyamwɛngɨ, jʊ a bwɨɨ, ja dwal bɔ ja mǝg. Jʊ a bwɨ ja maa nyɨɨ jǝ nyʊwa taal lɛ kage jǝ ywɔ a swiyoti Sirtis.

¹⁸ Mwɛmɔ maa bwɨya lɛ, mǝg nǝn nɛ dangǝn. N kɛl dul jʊ nɨ, nǝn tǝmsɛlɨɨ, nǝngɔ ja wɔɔ kanjǝlɔ a mʊgɔ tɨyamwɛngɨɨ ja tǝla a mʊgɔ wɨmaɨ.

¹⁹ A kum na taalɔ, ji nǝn kang jin ja tǝlam kaam kanjǝl mǝgtǝm tɨyamwɛngɔ.

²⁰ Nǝn maa kum jǝbɔ kumtɨn nǝn kuwo bɔ kɔkɔ jǝbɔ nyanyamɨtɨn, dalɨ yʊwa mwɛmɔ wɔ babǝl nǝn nɛ, nǝn ya bɔ nǝl nǝn bʊʊ bʊʊ.

²¹ A kʊta ja ja bɔ jǝjalǝn. Nǝngɔ Bulus a gun a tɨ tɨɨ a kǝga jin, a sʊwa gɔ, “Nǝfitʌm, na na jǝ́ nyʊwa ɨ, na na bǝ gun bɔ a Karitaɨ, na bǝ nyʊwa bɔ gaalan jǝbɔ lɛtǝm kanjǝl.

²² Mǝ gʊ lɔl jenɔ lɛ kǝngkɔ, jǝ́ kʊ nǝl. Jʊ a bwɨɨ mɨ nʊ nɨ wo lɛ kʊlɨ gǝnɔ lɛ a kʊm jeni, n tɨyamwɛngɔ lɛ lɛ kwaagɨɨ.

²³ “A kum nɨ dʊgalǝnɨ, bwɛ twama Kwaamaɨ wʊnɨ mǝ na a gɨɨ, wʊnɨ mǝ bǝlá gǝn nɛɨ, a tɨ nǝn dɔɔm a daa mǝ woi.

²⁴ A sʊwa gɔ, ‘Ka ń nyʊwa lɛ taal, Bulus. Bɨlǝngǝn mʊ tɨ tɨ a kǝga Kaisarɨ. N wɔ tag n kɛl dul mʊn Kwaama a mʊgɔ bʊnatǝm gǝn bʊʊ lɛ nǝn fatǝm yɔm mʊnɔ gwamɨ.’

²⁵ A dul kɛl nɨ, jǝ́ kʊ nǝl nǝfitʌm, jʊ a bwɨɨ n nǝ bɨlǝngkɛl a daa Kwaama woi kanga a sʊwa ɨɨ, bwɨ bwɨ nyɔ.

²⁶ Yʊwagɔ tʊng bǝn tʊng a dʌbʌl swiyoti kaa tǝm nɨ a tɨbǝl wɨmaɨ sǝla bǝ bʊʊ.”

²⁷ A kum na kʊb jeli naal yʊwagɔ tʊng nǝn nɛ a wɨma Adariya. Nǝn sangdɨlang nǝngɔ nǝb mǝgtǝm tɨyamwɛngɔ kuwo lɛ gɔ nǝn dwama tǝmɔ.

²⁸ Nǝngɔ ja sʊwa tushitǝm mwɛmɨ, ja nya a la naagɔ fʊlkʊb jǝbɔ fʊltiyo. Nǝn ja kǝga nǝn yɔmɔ dǝmɨ, ja yǝla ja sʊwaɨ ja nya tushitǝmɔ a la naagɔ fʊltʊlkʊb.

²⁹ Jǝ nyʊwa taal lɛ ka tɨyamwɛngɔ a tǝgaka jǝbɔ sunte, nǝngɔ ja dem kang a ankatɨnɔ naalɨ (kemʌntɨn nɨ a tuu tuui) a gul tɨyamwɛngɨ, kage tɨyamwɛngɔ a shu. Nǝngɔ ja maa keli ja ya Kwaama gǝm nui, sǝ tǝmɔ a sɛl dǝbǝr.

³⁰ Nǝb nɨ mǝg tɨyamwɛngɔ lɛɨ, jǝ swɨ lɛ ja mwal. Nǝngɔ ja shig bɛ tɨyamwɛngɨ, jǝ maa lɛ maamɔ jǝ shig ankatɨn (kemʌntɨn nɨ a tuu tuui) a tɨyamwɛng dʊʊnɔ gǝm.

³¹ Nǝngɔ Bulus a sʊwa dʊʊ sʊwajaamɔ jǝbɔ sʊwajaamtɨnɔ gɔ, “Na nǝb nɨ a tɨ bɔ a mʊgɔ tɨyamwɛng nɨɨ, mɨsɔ jǝ́ bʊʊ lɛ.”

³² Nyʊwatǝmɔ nyɨɨ, nǝngɔ sʊwajaamtɨn nɨ a mwatalam dwang bɛ tɨyamwɛngɨ, ja bǝla gǝn a bwangtǝn mwɛmɨ.

³³ Tǝmɔ ya sɛl lɛɨ, nǝngɔ Bulus a kela ji sǝ ja ja jǝjalǝnɨ, a sʊwa gɔ, “Dwiyen kumɔ kʊb jeli naal jǝ́ na a mʊgɔ yɨm komʌn, jǝ́ ja bɔ kaa jǝl.

³⁴ Mǝ kela jen nɛ, jǝ́ ja jǝjalǝnɔ sǝ a nǝ jen kwaan bʊtɔ. Mɨ kaa nǝl wo a kʊm jen wʊnɨ lɛ yitʌn dul gǝnɔ lɛ wini.”

³⁵ A sʊwa nyɨɨ, nǝngɔ a do kʊkkʊmɔ a buu Kwaama gǝm kang a kǝga jin gwamɨ, a tǝgaɨ, nǝngɔ a tǝl jatǝmɨ.

³⁶ Nǝngɔ gwam jinɔ ja nya kʊtǝm nǝl ja jaɨ.

³⁷ Gwam nǝnɔ a mʊgɔ tɨyamwɛngɨɨ nǝn fʊlkʊb yo jǝbɔ fʊltǝnʌbʌl jeli nukun.

³⁸ Ja ja, ja boba kanga jǝ swɨ lɛɨ, nǝngɔ ja shigʌm tɨyamwɛngɔ gǝm tuulogɔ ja tǝlam nuyilagɔ a mʊgɔ wɨmaɨ.

Mʊlalɨ Mwɛmɔ A Wʊlala Tɨyamwɛngɔ

³⁹ Tǝmɔ a sɛlɨ, nǝb mǝgtǝm tɨyamwɛngɔ a nyǝm bɔ tǝm nɨ jǝ woi. Ja kuwo kaa gwagɨ a daa nɨ swiyotigɔ woi, nǝngɔ ja fɛka gɔ jǝ yɔ nǝn tɨyamwɛngɔ a dʌbʌl swiyotii, na maa maaɨ.

⁴⁰ Nǝngɔ ja mwatam dwangtɨn nɨ a ta ankatɨnɨ (kemʌntɨn nɨ a tuu tuui), ja bǝla ji a mʊgɔ wɨmaɨ. A dǝngdǝng kwama gɔ nǝngɔ ja kwɨm dwang kwatǝm jǝ yǝlatǝm tɨyamwɛngɨ. Nǝngɔ ja gung bɨlǝntɨn tɨyamwɛngɔ a kǝga tɨyamwɛngɔ gǝmɨ, sǝ yʊwagɔ a tʊng gǝn a kǝga. Nǝngɔ ja dǝg dul sǝ jǝ yɔ a gwanga kʌng wɨmaɨ.

⁴¹ Nǝngɔ nǝn la swiyotigɨɨ, tɨyamwɛngɔ a ga swiyotigɔ, nǝngɔ dul tɨyamwɛngɔ a ywɔɨ. Tɨyamwɛngɔ a tǝl wʊlalatǝmɔ a gul a mwɛ nɨ mʊla lɛɨ.

⁴² Nǝngɔ sʊwajaamtɨnɔ a fɛka gɔ jǝ jʌbom nǝbɔ jǝ yɔ lɛ nǝn a lɔsomii kage kaa win a yal mwɛmɔ a mwal.

⁴³ Dʊʊ sʊwajaamɔ swɨ lɛ a bʊʊ nǝn Bulus. Nǝngɔ a kaa ji woi. A nǝ ji diil gɔ gwam nǝb nɨ a nyǝm mwɛɨ, ja tǝl yaltǝm mwɛmɔ ja yɔ a kʌng wɨma.

⁴⁴ Kaamɨ a gwi kwang nɨ ja tal a mʊgɔ tɨyamwɛngɨ, kaamɨ a gwi fʌtʌlogi kanjǝl tɨyamwɛng nɨ a kǝlalaɨ. Ja maa nyɔ gwam jinɔ ja la kʌng wɨmagɔ kwamɨgǝn.