Maajɨ Bɛtɔ Twamagɨɨ 22 - Dadiya NT

¹ “Jǝ́ kɛtǝlamɔ jǝbɔ dʊʊmɔ, jǝ́ kaa lɔl sǝ n sʊwa jen jʊ a bwɨɨ, sǝ n nʊng jen mɨ mǝ nǝn bwɨlangkɛl.”

² Ja nyʊwa gǝn a sʊwa kɛlɔ nǝn nyiyo Yahudawagɨɨ, nǝngɔ ja yɨ shigi. Nǝngɔ a sʊwa gɔ,

³ “Mǝ bwɛ Yahuda. Ja bʌ i a Tarsus a tǝm Kilikiya. Mǝ dʊʊl fɔ a tuulɔ nɨ. Mǝ maa gǝlalantalɔ a daagɔ Gamaliyal woi, a wʊnɨ a mɛla mɨ diil tʊgalam bǝnɔ gwamɨ. Mǝ bwangtǝn Kwaama lɛ dǝngdǝng kanga gwam jenɔ jǝ́ maa lɛ dwiyeni.

⁴ N nǝ nǝb nɨ bwangtǝn Gola nɨ lɛɨ gaalan. Mǝ bwaba nǝbɔ lɛ batǝm jǝbɔ nɔɔtǝm. Mǝ dǝg ji lɛ a lɔsomi, sǝ ja jʌbo ji.

⁵ Dalɨ nǝkǝlagɔ jǝbɔ mʊrkalɨ nǝb dʊʊm nǝbɨɨ gwam jǝ nǝ nǝ nyiyo a dul mɨ. N daa ji woi mǝ yo langǝn bwangǝn na yɔmɔ a daagɔ kɛtǝlam bǝnɔ woi, Yahudawa nɨ a Dimaskaɨ. Mǝ shu wo sǝ ya n bwaba nǝb nɨ bwangtǝn golagɔ lɛ fʌleni, sǝ n bɛ nǝn ji a Urushalima, ja nǝ ji gaalan.

Bulus A Sʊwa Kanga Ga Yǝla A Gola Kwaamaɨ

⁶ “Mǝ a mʊgɔ yɔm, n dwama Dimaskagɔ nǝn sɨ kɔkɔ, tʌgo a kang nǝngɔ kaa gʌleng nyalǝm a gǝla a dʌbʌl, a sum ii.

⁷ Nǝngɔ mǝ yal a tǝmɨ. Mǝ nyʊwa kaa diil sʊwa ɨ lɛ gɔ, ‘Shawulu Shawulu, wɛ a bwɨ mʊ nɨ ɨ gaalan nɛɨ?’

⁸ “Nǝngɔ mǝ jǝla mǝʊ, ‘Nǝmɔ mʊ wo, Tɛlalɔ?’ “Nǝngɔ a sʊwa ɨ gɔ, ‘Nǝmǝ mǝ Yesu Bwɛ Nazarat wʊnɨ mʊ nǝ gǝn gaalan nɛɨ.’

⁹ Nǝb nɨ nǝn dakini ja kuwo nyalǝmɔ, ja nyʊwa bɔ diilɔ sʊwa kɛl lɛ jǝbɔ mǝɨ.

¹⁰ “Nǝngɔ mǝ bʌ gǝn mǝʊ, ‘N wɛ mǝ maa lɛɨ, Tɛlalɔ?’ “Nǝngɔ Tɛlalɔ a sʊwa ɨ gɔ, ‘Gun dɔ Dimaska. Kwama mʊ yɔ woi, kaa nǝl wo sʊwa ń sʊwa ń jʊ mǝ fɛka mʊn wo mʊ maa lɛɨ.’

¹¹ Mǝ kuwo bɔ daa a dul gʌleng nyalǝm nɨ gǝm, nǝb nɨ nǝn dakini ja ta mɨ kang. Nǝngɔ ja yɔ nǝn mǝ a mʊgɔ Dimaskaɨ.

¹² “Nǝngɔ kaa nǝl dunɔ nǝn Hananiya a bɛ a daa mǝ woi. N nǝ bwangtǝm Kwaamaɨ a diil bǝnɔ gǝm, wʊnɨ Yahudawagɔ fʌlen gwamɨ bǝlá gǝn nɛɨ.

¹³ A bɛ ba sʊwa ɨ gɔ, ‘Kɛgɔ Shawulu, yǝla nya kuwotǝm daagɔ tʌgo.’ Tʌgo a kang nu mǝndɨ a wumo, n kuwo gǝn.

¹⁴ “Nǝngɔ a sʊwa ɨ gɔ, ‘N Kwaama tʊgalam bǝnɨ a jǝg ń sǝ ń nyǝm jʊ swɨ lɛɨ, sǝ ń kuwo Nǝ Dǝngdǝng nɨ, sǝ ń nyʊwa kɛl gǝnɔ.

¹⁵ Mʊ yǝlam nǝ nǝtǝm nyiyo a kɛl gǝn a daa nǝbɔ woi pʌd, a dul jʊ mʊ kuwo, mʊ nyʊwaɨ.

¹⁶ Kǝngkɔ n wɛ mʊ yam lɛɨ? Gun ja yʊ ń mwɛ sagsagɔ, ja saalǝm bwɨlangkɛl mʊnɔ a gola jotǝm dun Tɛlalɔɨ.’

Jotǝm Bulusi A Daagɔ Bʌtʌbɔ Woi

¹⁷ “Kwama mǝ yǝlam a Urushalimaɨ, mǝ maa keli lɛ a Kan Kwaaman, nǝngɔ mǝ dʊga dʊgam nyangnyangɨ.

¹⁸ A mʊgɔ dʊgam nyangnyang n kuwo Yesu sʊwa lɛ gɔ, ‘Gun dǝbǝr, bǝla Urushalimagɔ, jʊ a bwɨɨ mɨsɔ jǝ jǝla nǝtǝm nyiyo mʊnɔ lɛ a dul mɨ.’

¹⁹ “Nǝngɔ mǝ sʊwa mǝʊ, ‘Tɛlalɔ, tʌji ja nyǝm nyɔ a kan mɛlalɨ gwam, n bwaba nǝb nɨ a nǝ bɨlǝngkɛl nǝn mʊɨ, n bʊg ji.

²⁰ Nǝn kwama ja jʌm Istifanusi, wʊnɨ nǝ nyiyo lɛ a dul mʊnɨ, mǝ nǝn kang mɨ mǝ tɨm wo, n bwa jim guu a jʊ nɨ ja maaɨ. Nǝmǝ mǝ tɔɔ dʊʊl nǝb nɨ lɛ a jʌ gǝnɨ.’

²¹ “Nǝngɔ Tɛlalɔ a sʊwa ɨ gɔ, ‘Gun ń shu. Mǝ twam ń twam ń a kʊta kʊtaɨ a daa Bʌtʌbɔ woi.’ ”

Nǝ Dʊʊgɔ A Kubʌl Bulus

²² Mʊrkalɨ nǝbɨɨ nyʊwa Bulus lɛ ba la kɛl nɨ. Nǝngɔ jǝ gaba wulongɔ lɛ gɔ, “Jǝ́ jʌ gǝn! Jǝ́ wʊlaka nʊ nɨ jǝbɔ yooligɔ! A bʊm bɔ a maa dʊʊmɨ!”

²³ Kanga ja tɨtǝn gabatǝm wulongi, ja jǝg dwang malǝng jinɔ, jǝ ma lɛ a dʌbʌl, jǝ wa tǝmɔ lɛ, kuulɔ gun nɛ.

²⁴ Nǝngɔ dalɨ dʊʊ sʊwajaamɔ a sʊwa sʊwajaamtɨnɔ gɔ ja yɔ nǝn Bulus a kʊtʊgadi, ja fɨɨ gǝn nǝn banjangɨ, sǝ a nyǝm jʊ a bwɨ nǝbɔ ma gǝm bwaalɨ lɛɨ.

²⁵ Kwama ja bwam Bulus sǝ ja maa gǝm banjangɨɨ, nǝngɔ a bʌ dʊʊ sʊwajaam nɨ tɨm nǝn dɔɔm jǝbɔ gɨɨ gɔ, “N dǝngdǝng a diilɔ gǝm ń maa nʊ nɨ gǝm nǝn yɨm dul Romaɨ gǝm banjangɨ, jǝ́ maa gǝm bɔ borang ka?”

²⁶ Dʊʊ sʊwajaam nɨ a nyʊwa nyɨɨ, nǝngɔ a yɔ a daa dalɨ dʊʊ sʊwajaamɔ woi a sʊwa gǝn gɔ, “N wɛ mʊ saa maatǝmɔ lɛɨ? Balɨ nɨ n nǝ yɨm dul Roma.”

²⁷ Nǝngɔ dalɨ dʊʊ sʊwajaam nɨ a bɛ a daa Bulus woi, a bʌ gǝn gɔ, “Sʊwa ɨ bɨlǝngkɛl, mʊ nǝ yɨm dul Roma ka?” Nǝngɔ Bulus gɔ, “Ɔɔ.”

²⁸ Nǝngɔ dalɨ dʊʊ sʊwajaam nɨ gɔ, “A mɨɨ mǝ ten nǝn kemʌn nɨ a lada dangǝnɨ.” Bulus gɔ, “A mɨɨ ja bʌ i nǝn.”

²⁹ A dul kɛl nɨ nǝb nɨ fɨɨ gǝn nɛɨ, ja gʊ nǝn gul. Dalɨ dʊʊ sʊwajaam nɨ tǝgǝn a nyǝm nyɔ Bulus n nǝ yɨm dul Romaɨ, a nyʊwa taal, jʊ a bwɨɨ a kwɛl a bwa gǝn bwaɨ.

Bulus A Kǝga Dʊʊm Nǝbɨɨ

³⁰ Nǝn tǝmsɛlɨ dalɨ dʊʊ sʊwajaam nɨ swɨ lɛ a nyǝm jʊ a bwɨ Yahudawagɔ a yɔ nǝn katǝm kɛl nɨ a dul Bulusi, nǝngɔ a kwɨ gǝn, a sʊwa dʊʊm nǝbkǝlamɔ jǝbɔ nǝb dʊʊm koteregɔ ja mʊrkaɨ. Nǝngɔ a bɛ nǝn Bulus a dǝg gǝn a tɨ a kǝga jini.