Maajɨ Bɛtɔ Twamagɨɨ 20 - Dadiya NT

Bulus A Yǝla A Makidoniya Jǝbɔ Girika

¹ Kwama kutʌm nɨ a dɨmɨ, nǝngɔ Bulus a jo nǝb bwangtǝmɨ. A kʊʊ jim nǝlɨ, nǝngɔ a wʊlaka jǝbɔ ji a shu a tǝm Makidoniyaɨ.

² A kɛla daatɨn nɨɨ, nǝngɔ a kʊʊ jim nǝl dangǝnɨ. Nǝngɔ a shu a tǝm Girikaɨ.

³ A maa bwaala taal wo. Fɛka dɔtǝm tɨyamwɛngɔ lɛ sǝ gǝ shu a tǝm Suriyaɨ, Yahudawagɔ a maa gǝm bwɨlang fɛkalɨ. N dul kɛl nɨ a yǝla a shu a Makidoniyaɨ.

⁴ Sabataras bwɛ Biriyaɨ, bʊla Burusi, jǝbɔ Aristarkus jǝbɔ Sakundus nǝbɔ Tasalonikaɨ, jǝbɔ Gayus bwɛ Darbaɨ, jǝbɔ Timoti, jǝbɔ Tikikus jǝbɔ Tarofimas nǝbɔ Asiyaɨ, ya ja ywa gǝnɨ.

⁵ Ya ja laa nǝnɨ, nǝngɔ ja yam nǝn a Taruwasaɨ.

⁶ Nǝn tǝnǝn nǝn gun a Filibi a tɨyamwɛng a gul Dikulom Kʊkkʊm nɨ mɨ Yisti woi. Nǝn yɔ yɔm a mʊgɔ mwɛ kumɔ nʊ. Nǝngɔ ya nǝn nya ji a Taruwasaɨ. Nǝ maa kumɔ nʌbʌl a Taruwasa.

Bulus A Gung Yutikus A Bwaa A Taruwasa

⁷ Nǝn dibɨlɨ nǝn mʊrka sǝ nǝn tǝga jǝjalǝnɔ sǝ nǝn ja. Nǝngɔ Bulus a sʊwa ji kɛlɨ. Swɨ lɛ gǝ shu nǝn tǝmsɛlɨ, a sʊwa kɛlɔ dɨlagɔ a kan nǝn.

⁸ Fitilatɨnɔ a lada nyɔ a lɔ dʌbʌl nɨ nǝ mʊrkamɨ.

⁹ Kaa bwayǝlɨ wo dunɔ nǝn Yutikus yǝm a du kan. Nǝngɔ dumɔ maa gǝn nɛɨ. Kwama nɨ Bulus sʊwa kɛlɔ lɛ a som nyɨɨ, dumɔ a do Yutikus. Nǝngɔ a gǝla a lɔ dʌbʌl na taalɔ gǝm a yal a tǝmɨ. Ja do gǝn bʌlʌn.

¹⁰ Bulus a gǝla a tǝm, a jʊng a kwal gǝnɨ, a sʊwa gɔ, “Ka kom jen nɛ. Nǝn kʊlɨ.”

¹¹ Nǝngɔ Bulus a yǝla a dʌbʌl, ya tǝga jǝjalǝnɔ, nǝn jaɨ. A ja kǝga nǝn sʊwatǝm kɛlɔ tǝmɔ a sɛl nǝn. Nǝngɔ la a shui.

¹² Nǝngɔ ja shu nǝn bwayǝlɨ nɨ nǝn kʊlɨɨ. Ja maa fulotǝm nǝl dangǝn.

Ja Bǝla Taruwasagɔ Jǝ Yilo A Militus

¹³ Nǝngɔ nǝn ja kǝga nǝn yɔmɔ a mʊgɔ tɨyamwɛngɨ, nǝn yɔ a Asus sǝ nǝn do Bulus woi. N fɛkalɨgɔ a maaɨ, gǝ tǝgǝn swɨ lɛ gǝ yɔ nǝn naa.

¹⁴ Ba nya nǝn a Asusi, nǝngɔ nǝn do gǝn a tɨyamwɛng nǝn bɛ nǝn a Militinii.

¹⁵ A daa gɔ nǝngɔ nǝn ja kǝga nǝn yɔmɔ a mʊgɔ tɨyamwɛngɨ. Tǝmɔ sɛl lɛ nyɨɨ, nǝn wɔ a kʌng Kiyos. Nǝn kaa tǝmsɛlɨɨ nǝn wɔ a Samos. Kaa tǝmsɛlɨ tagɨ nǝn wɔ a Militus.

¹⁶ Bulus a ya nǝl gɔ mɨsɔ gǝ shu lɛ a Afisa, kage gǝ kal kwama a Asiya. Gaala nu lɛ swɨ lɛ na gǝ la Urushalima, sǝla kum Dikulom Fentikosɔ a la.

Bulus A Ywabka Jǝbɔ Nǝb Dʊʊm Bwangtǝmɔ A Afisaɨ

¹⁷ A Militus Bulus a twam a Afisa gɔ ja jo dʊʊm mʊrkalɨ nǝb bwangtǝm Kwaamaɨ.

¹⁸ Ja bɛ a daa gǝ woi, nǝngɔ a sʊwa ji gɔ, “Jen nǝn kang jen jǝ́ nyǝm yɨmɔ mǝ yɨ a kʊm jen nǝn kum nɨ mǝ fam naa a Asiyaɨ.

¹⁹ Mǝ bwangtǝn Tɛlalɔ lɛ nǝn shigtǝm dul, nǝn mwɛ num. N bwa nǝl nǝn tɛltǝm nɨ Yahudawagɔ maa mɨ lɛɨ a mʊgɔ fɛkalɨ bwɨlan jinɔ gǝmɨ.

²⁰ “Mǝ bǝla bɔ sʊwatǝm jenɔ jʊ nɨ maa jem tɨkalɨ lɛɨ. Mǝ kiyo jem kɛl Kwaamaɨ lɛ jǝbɔ mɛlalɨ gǝnɔ a talɨ, lɔ jǝbɔ lɔ.

²¹ N sʊwa Yahudawagɔ jǝbɔ nǝbɔ Girikaɨ gwam mǝʊ ja yǝla ja bǝla bwɨlangkɛlɔ ja yǝla a daa Kwaama woi, ja nǝ bɨlǝngkɛl a daagɔ Tɛlalɔ bǝn Yesu woi.

²² “N wɔ Yʊwa Kwaamaɨ sʊwa ɨ lɛ gɔ mǝ yi a Urushalima. Mǝ nyǝm bɔ jʊ nɨ nya ɨ lɛ woi,

²³ N nyǝm Yʊwa Kwaamaɨ sʊwa ɨ lɛ a tuulɔtɨnɔ gǝm gwam gɔ, kubʌltǝmɔ wo a lɔsomi jǝbɔ nɔɔtǝm gaalan bwɨlagɔ yam ɨ lɛ.

²⁴ Mǝ do bɔ kʊlɨ mǝndɨ a kaa jǝl. Mǝ swɨ lɛ n dɨ maajɨ nɨ Tɛlalɔ Yesu a nɨ ɨɨ. Mǝ swɨ lɛ n kiyo fulon kɛl lǝmɨ a dul lǝma Kwaamaɨ.

²⁵ “Kǝngkɔ n nyǝm gwam jenɔ mɨsɔ jǝ́ yǝla lɛ jǝ́ kuwo i wo tag, jen nɨ mǝ kɛla lɛ a kʊm jen, mǝ kiyo kɛl fulon fɔlɔn lɔ Kwaamaɨ lɛɨ.

²⁶ Mǝ sʊwa jen nɛ dwiyen mǝʊ mɨ mǝ nǝn tʊʊm kaa nǝlɨ wo win a dul mɨ,

²⁷ jʊ a bwɨɨ mǝ ta bɔ sǝ n sʊwa jen kɛl Kwaamaɨ gwam.

²⁸ Jǝ́ kɨla dul jenɔ jǝbɔ kʌm nɨ Yʊwa Kwaamaɨ a dǝg jǝ́ yǝlam nǝb tɔɔtǝmɨ. Jǝ́ ja kǝga nǝn tɔɔtǝm mʊrkalɨ nǝb bwangtǝm Kwaamaɨ, wʊnɨ a ten dul gǝnɔ gǝm nǝn tʊʊm Bʊla gɨɨ.

²⁹ “N nyǝm na n shui, kaam bwɨlang bangashɨtɨn dɔ dɔ a kʊm jen. Mɨsɔ jǝ bǝla kʌmɔ lɛ.

³⁰ A kʊm jen kaamɨ gun gun a sʊwala gabakɛl, sǝ ja gʊ nǝb bwangtǝmɔ a gul ji.

³¹ A kɛl dul jʊ nɨ, bɛ jǝ́ yɨ nǝn fɛkalɨ! Jǝ́ bʊʊla jolɔ taal, kum jǝbɔ kɔkɔ, mǝ bǝla bɔ gʊtǝm lɔl jenɔ nǝn kɛl jǝbɔ mwɛ num.

³² “Kǝngkɔ n ya jen a kang Kwaamaɨ jǝbɔ kɛl lǝma gǝnɔ, wʊnɨ nǝn gɔ dwal lɛ a gung jeni, sǝ a nǝ jen kʊla jǝbɔ nǝb sagsagɔ gwam.

³³ Mǝ maa bɔ wɛl kemʌn, jǝbɔ mʊn, jǝbɔ dwang nǝlɨ.

³⁴ Jen nǝn kang jen, jǝ́ nyǝm mǝ maa maajɨ nǝn kang mɨ sǝ a ywa komtǝm mǝndɨ jǝbɔ nǝb nɨ nǝn dakini.

³⁵ A mʊgɔ kanjǝl nɨ gwam mǝ maaɨ, n sʊwa jen a mɛlalɨ nɨ mǝʊ, jǝ́ maa maajɨ nyɔ sǝ bǝ tɨka nǝb nɨ mɨ nǝn kwaanɨ. Jǝ́ bʊʊla nǝn kɛl nɨ Tɛlalɔ Yesu a sʊwa gɔ, ‘Nǝtǝmɔ a laa yotǝmɔ bwili.’ ”

³⁶ Bulus a dɨ sʊwatǝmɔ nyɨɨ, nǝngɔ a jʊng a maa keli jǝbɔ ji gwamɨ.

³⁷ Nǝngɔ ja dem nyiyo nǝn wi gwamɨ, ja ta kwɨl Bulusi, jǝ kwal gǝn nɛ.

³⁸ Ja maa fitǝm nǝl a kɛl nɨ a sʊwa ji gɔ mɨsɔ jǝ kuwo gǝn nɛ wo tagɨ. Nǝngɔ ya ja ywa gǝn a daa nɨ tɨyamwɛngɔ woi.