Maajɨ Bɛtɔ Twamagɨɨ 2 - Dadiya NT

Bɛtǝm Yʊwa Kwaamaɨ

¹ Nǝn di Fentikosɔ a laɨ, nǝb bwangtǝmɔ gwam ja mʊrka daagɔ win.

² Tʌgo a kang, nǝngɔ ja nyʊwa kaa diil mwɛla lɛ nǝn kwaan na yʊwa a kwamaɨ, a yii mʊgɔ lɔ nɨ jǝ woi.

³ Nǝngɔ kaam kanjǝl na ben kǝlatɨn, a gǝla a kwɨya tʌgo a dul jinɔ gǝm win wini.

⁴ Ja yii ji gwam nǝn Yʊwa Kwaamaɨ. Nǝngɔ ja tǝl sʊwatǝm kɛlɔ nǝn kaam nyiyo nǝn dʌmʌni, kanga Yʊwa Kwaamaɨ a nǝ ji kwaan kiyotǝm kɛl nyiyotɨnɔ a gǝlalaɨ.

⁵ Nǝn kwama kanjǝl nɨ bwɨm lɛɨ, kaam Yahudawa nɨ a kwam tʌgo a bwangtǝm Kwaamaɨ jǝ yǝm wo a Urushalima. Ja bɛ daatɨnɔ a gǝlala a tǝmtɨnɔ a yooli nɨɨ.

⁶ Nǝn kwama ja nyʊwam diil yʊwa nɨɨ, nǝngɔ ja mʊrkaɨ. Dul jinɔ a bwam, jʊ a bwɨɨ, pʌd jinɔ ja nyʊwa nǝbɔ sʊwa kɛlɔ lɛ nǝn nyiyo tuulɔ jinɔ.

⁷ Ja ta kang a nyiyo dangǝn, jǝ sʊwa lɛ gɔ, “Nǝb nɨ sʊwa kɛl nɨ lɛɨ, ke bɔ nǝbɔ Galilii ka?

⁸ N wɛ la a bwɨ gwam bǝnɔ, bǝ nyʊwa lɛ jǝ sʊwa kɛlɔ lɛ nǝn nyiyotɨn bǝnɨ?

⁹ N wɔ bǝ nǝbɔ Fartiyaɨ, jǝbɔ nǝbɔ Madanaɨ, jǝbɔ nǝbɔ Elemaɨ, jǝbɔ nǝbɔ tǝm Bagadazaɨ, jǝbɔ a Yahudiyaɨ, jǝbɔ a Kafadokiyaɨ, jǝbɔ a Fantasɨ, jǝbɔ a Asiyaɨ,

¹⁰ jǝbɔ nǝbɔ Firijiyaɨ, jǝbɔ a Bamfiliyaɨ, jǝbɔ a Masarɨ, jǝbɔ a dʌng Kurane nɨ a tǝm Libiyaɨ, jǝbɔ faabǝm nɨ a Romaɨ, jǝbɔ a Yahudawagɨɨ, jǝbɔ nǝb nɨ a dǝg dul jinɔ a yǝlam Yahudawaɨ,

¹¹ jǝbɔ nǝbɔ Karitaɨ, jǝbɔ Larabawagɔ, bǝ nyʊwa ji lɛ jǝ sʊwa kɛlɔ lɛ nǝn nyiyotɨn bǝnɔ nǝn gʌleng kanjǝl nɨ Kwaama a maaɨ!”

¹² Ja ta kang a nyiyo, dul jinɔ a bwam, jǝ sʊwaka lɛ a bʊtɔ ji gɔ, “Jʊ nɨ gǝ nʊng wɛ?”

¹³ Kaamɨ a mog ji gɔ, “Ja nɔɔ bʊgɛ nǝn gɔ maa ji lɛɨ.”

Kiyotǝm Kɛl Bitrusi Nǝn Di Fentikosɔ

¹⁴ Nǝngɔ Bitrus a gun a tɨ tɨɨ dakini jǝbɔ kʊb jeli win nɨɨ, a sʊwa ji nǝn diil gɔ, “Kɛtǝlam mɨɨ Yahudawagɔ jǝbɔ nǝb nɨ yǝm a Urushalimaɨ, jǝ́ kaa lɔl jǝ́ nyʊwa jʊ mǝ sʊwa jen nɛɨ.

¹⁵ Nǝb nɨ bʊgɛ a maa ji bɔ kanga jǝ́ bʊʊla lɛɨ, jʊ a bwɨɨ kǝngkǝnɨ kemʌnɔ a shu bɔ tʊlkʊb a kumsʌl!

¹⁶ Jʊ nɨ nǝn gɔ jʊ nǝkuwotǝmkǝga Yowel a sʊwaɨ gɔ:

¹⁷ “ ‘Kwaama a sʊwa gɔ, nǝn kumtɨn dɨltǝm yooligɔ, Mǝ tal tal Yʊwa mǝndɨ a dul nǝbɨɨ gwam. Bɛtɔ batǝn jenɔ jǝbɔ bɛtɔnɔɔtǝn jenɔ jǝ maa maa kuwotǝmkǝga. Bɛtɔ bayǝlǝm jenɔ kuwo kuwo dʊgam nyangnyang. Dʊʊm jenɔ dʊga dʊga dʊgamtɨn.

¹⁸ Bɨlǝngǝn, nǝn kumtɨn nɨ Mǝ tal tal Yʊwa mǝndɨ a dul jwaalɛb mǝndɨɨ, batǝm jǝbɔ nɔɔtǝm sǝ ja maa kuwotǝmkǝga.

¹⁹ Mǝ nʊng nʊng kanjǝl laatǝm kang a dʌbʌl kwama, jǝbɔ kanjǝl nʊngtǝm a yooli nɨɨ, mǝ nʊng nʊng nǝn tʊʊm, jǝbɔ kǝla jǝbɔ yulʌn fili.

²⁰ Jǝ yǝla yǝla nǝn nu kwamagɔ a yǝlam kumtojili, bwaalagɔ a yǝlam tʊʊm, dɨsɔ la kum Tɛlalɔɨ a bɛ, gʌleng kɔkɔ dʊʊn nɨ.

²¹ N kwama nɨ nʊ nɨ gwam a maa keli nǝn dun Tɛlalɔɨ nya bʊʊtǝm lɛɨ.’

²² “Jǝ́ kɛtǝlam mɨ nǝbɔ Israilaɨ, jǝ́ nyʊwa kɛl nɨ. Yesu Bwɛ Nazarat nǝn gɔ nʊ nɨ Kwaama a nʊng gɔ nǝn gɔ gǝ jǝla nǝn gɨɨ. Kwaama a nʊng jʊ nɨ a kanjǝl laatǝm kang, jǝbɔ kanjǝl tatǝm kang a nyiyo, jǝbɔ kanjǝl nʊngtǝm wʊnɨ ga maa a gola Yesui a kʊm jeni, kanga jen tʌjen jǝ́ nyǝmɨ.

²³ Yesu nɨ, ja nǝ gǝn a kang jeni kanga Kwaama a fɛkam nǝn nyǝmtǝm gǝn nǝn tɨkǝgaɨ, jǝ́ kʊʊ gǝn, jǝ́ jʌ gǝn, a kang nǝb bwɨlamɨ.

²⁴ Nǝngɔ Kwaama a gung gǝn nǝn kʊlɨɨ, a jǝg gǝn a kwaan bwaagɔ gǝmɨ. Bwaagɔ a dwal bɔ a ta gǝn.

²⁵ Dauda a sʊwa kɛl a dul gǝn gɔ, “ ‘Kwangkwang mǝ kuwo Tɛlalɔ lɛ, gǝ na dakini jǝbɔ mǝ, mɨ nǝn jʊ nɨ ɨ taal lɛɨ.

²⁶ A dul kɛl nɨɨ, nǝl mǝndɨ maa fulotǝm lɛ, ben mǝndɨ maa bǝlátǝm lɛ, bʊtɔ mǝndɨ, yɨ yɨ nǝn yatǝm nǝl.

²⁷ Jʊ a bwɨɨ mɨsɔ mʊ bǝla ɨ lɛ a daa yamtǝm borang. Mɨsɔ mʊ bǝla Nǝ Sagsag mʊnɔ lɛ a bʊta.

²⁸ Ń nʊng ɨ gola nɨ yɔ lɛ nǝn mǝ a kʊlɨɨ. Mʊ yii i yii i nǝn fulotǝm nǝl a kǝga mʊn.’

²⁹ “Kambɔ, mǝ sʊwa jen sʊwa kɛl mɨ komtǝm wo a dul tʊga bǝn Daudaɨ. Dauda a bʊla. Ja fʌl gǝn. Tuu gǝnɔ wo jǝbɔ bǝn a ba la nǝngǝn dwiyeni.

³⁰ Gɔ n nǝkuwotǝmkǝga. A nyǝm Kwaama a maa gǝm swatǝm yaa jǝbɔ wɛɛlɨ, gɔ kaa nǝl win a mʊgɔ dʊʊm gǝnɔ gǝm, gwi gwi kotere fɔlɔn gǝnɔ.

³¹ Dauda a kuwo a kǝgaɨ, nǝngɔ a sʊwa kɛl a dul guntǝm Kiristi a bwaaɨ, gɔ mɨsɔ jǝ bǝla gǝn nɛ a daa yamtǝm borang, bʊtɔ gǝnɔ mɨsɔ bʊta lɛ.

³² Kwaama a gung Yesu nɨ a bwaa, pʌd gwam nǝnɔ nǝn kuwo kuwoi nǝn nu nǝn.

³³ Kwaama a gun gǝn sǝ a yɔ ya yɨ a kang jajǝng gǝn, nǝngɔ a nya Yʊwa Kwaamaɨ wʊnɨ Tɛtɛ a maa swatǝm yaaɨ. Nǝngɔ a bɛ nǝn jʊ nɨ jǝ́ kuwo lɛ, jǝ́ nyʊwa lɛ dwiyeni.

³⁴ Ke bɔ Dauda a gwi dʌbʌl kwamaɨ, jʊ a sʊwa nǝn kang gǝnɨ n wɔ, “ ‘Tɛlalɔ a sʊwa Tɛlalɔ mɨ gɔ, “Yɨ fɔ a kang jajǝng mɨ,

³⁵ ba la nǝn kwama nɨ mǝ dǝg nǝb kiim mʊnɔ lɛ ja yǝlam daa fatǝm naa mʊnɨ.” ’

³⁶ “A dul kɛl nɨɨ, mɨ nyǝmatǝm wo bɛ nǝbɔ Israilaɨ gwam a nyǝm, Yesu nɨ jǝ́ kʊʊ gǝnɨ, Kwaama a dǝg gǝn a yǝlam Tɛlalɔ jǝbɔ Kiristi.”

³⁷ Nǝn kwama ja nyʊwam kɛl nɨɨ, a bʊwa ji. Nǝngɔ ja bʌ Bitrus jǝbɔ tangǝn bɛtɔ twamagɨɨ, gɔ, “Kɛtǝlam bǝn, n wɛ bǝ maa lɛɨ?”

³⁸ Nǝngɔ Bitrus a sʊwa ji gɔ, “Jǝ́ yǝla jǝ́ bǝla bwɨlangkɛl jenɔ, jǝ́ nya yʊtǝm mwɛ sagsag gwam jenɔ a mʊgɔ dun Yesu Kiristii, sǝ ja kǝlǝm jem bwɨlangkɛl jenɔ. Jǝ́ nya nya lǝma Yʊwa Kwaamaɨ.

³⁹ Jʊ nɨ nǝn gɔ swatǝm yaa Kwaamaɨ a daa jen woi, jǝbɔ bɛtɔ lɔ jeni, jǝbɔ nǝb nɨ gwam a kʊta kʊtaɨ, nǝn gɔ a daa nǝb nɨ gwam Kwaama Tɛlalɔ bǝn a jo ji a daa gǝ woi.”

⁴⁰ Nǝngɔ a gʊ jim lɔl nǝn kaam kɛltɨnɔ a gǝlalaɨ, a kel ji tag gɔ, “Jǝ́ bʊʊ nǝn dul jenɔ a bwɨlang nǝb nɨ gǝm.”

⁴¹ Nǝb nɨ a jǝla nǝn kɛl Bitrusi, nǝngɔ ja yʊ ji mwɛ sagsagɨɨ. A di gɔ, ja nya nǝb bwangtǝmɔ a sʊ nǝbɔ fʊlkʊblǝn taal.

⁴² Nǝngɔ ja ya bʊʊlalɨ jinɔ a mɛlatǝm nɨ bɛtɔ twamagɔ maa jim lɛɨ, jǝ mʊrka lɛ dakini, jǝ jabka jǝjalǝnɔ lɛ dakini, jǝbɔ maatǝm keli Kwaamaɨ.

Yɨm Nǝb Bwangtǝmɨ

⁴³ Taalɔ a ta nǝbɔ gwam, jʊ a bwɨɨ bɛtɔ twamagɔ maa kanjǝl laatǝm kang lɛ jǝbɔ nʊngtǝm kanjǝl tatǝm kang a nyiyo a lada.

⁴⁴ Nǝb nɨ a nǝ bɨlǝngkɛlɨ, gwam jinɔ ja yǝlam win a mʊgɔ mʊrkatǝm, gwam jinɔ jǝ tǝga kanjǝl jinɔ lɛ dakini.

⁴⁵ Jǝ miyo kʊla jinɔ lɛ jǝbɔ kanjǝlɔ jǝ nǝnɨ, nǝngɔ ja tǝga kemʌnɔ lɛ a kʊm jini. Nǝb nɨ mɨ nǝnɨ, ja nǝ ji kanga la jim lɛɨ.

⁴⁶ Kwangkwang jǝ yɔ lɛ a Kan Kwaaman dakini, jǝ jabka jǝjalǝnɔ lɛ dakini a lɔtɨn jinɔ gǝm, jǝ ja lɛ, jǝ nɔɔ lɛ nǝn fulotǝm nǝl jǝbɔ maatǝm lǝma nǝn kwɨtǝm kang,

⁴⁷ jǝbɔ bǝlátǝm Kwaamaɨ, nǝbɔ a jǝla nǝn ji dangǝn gwam. Kum jǝbɔ kum Tɛlalɔ sʊ jim nǝbɔ lɛ nya bʊʊtǝm lɛɨ.