Maajɨ Bɛtɔ Twamagɨɨ 14 - Dadiya NT

Bulus Jǝbɔ Barnaba A Ikoniya

¹ Bulus jǝbɔ Barnaba ja dɔ kan mɛlalɨ Yahudawa nɨ a Ikoniyaɨ kanga jǝ maam lɛɨ. Ja kiyo kɛl Kwaamaɨ. Nǝbɔ a lada a nǝ bɨlǝngkɛl, Yahudawagɔ jǝbɔ Bʌtʌbɔ.

² A Yahudawa nɨ ja kɔ bwangtǝm kɛl Kwaamaɨ, ja yǝla dul Bʌtʌbi, ja kal kʊm jinɔ jǝbɔ nǝb bwangtǝmɔ.

³ A dul kɛl nɨ Bulus jǝbɔ Barnaba ja yɨ wo a kʊta dangǝn. Jǝ kiyo kɛl Tɛlalɔɨ lɛ nǝn kwaan. Kwaama a nʊng gɔ kɛl nɨ ja sʊwa a kɛl dul lǝma gǝnɨ n bɨlǝngkɛl a gola nǝtǝm ji kwaan nʊngtǝm kanjǝl jǝbɔ maatǝm kanjǝl laatǝm kang.

⁴ Nǝb tuulɔ gɔ a bel lɔngɔ yo. Kaamɨ gǝ na a gul Yahudawagɨɨ, kaamɨ a gul bɛtɔ twamagɨɨ.

⁵ Nǝngɔ Bʌtʌbɔ, jǝbɔ Yahudawagɔ, jǝbɔ nǝb dʊʊm nɨ dakini jǝbɔ jii, ja fɛka ja gun tʌgo a bɛtɔ twama nɨ gǝmɨ, ja nǝ ji gaalan, ja mala ji nǝn tɛl, sǝ ja bʊla.

⁶ Kanga bɛtɔ twamagɔ a nyʊwa fuloni, nǝngɔ ja mwala ja shu a tuulɔtɨn Listira jǝbɔ Darba a tǝm Likoniyaɨ, jǝbɔ tangǝn tǝmtɨn nɨ a kang jii.

⁷ A daatɨn gɔ, nǝngɔ ja ja kǝga nǝn kiyotǝm fulon kɛl lǝmɨ nɨ.

Bulus A Kiyo Kɛl Kwaamaɨ A Listira

⁸ Kaa nǝl wo a Listira, wʊnɨ naa gǝnɔ a swam swamɨ. Mɨ gǝ yɔ yɔm lɛ. Jʊ a ta nǝn kwama bʌtʌm gǝnɨ.

⁹ Nyʊwa kiyotǝm kɛl Bulusi lɛ. Nǝngɔ Bulus a ya gǝm nui. Bulus a kuwo nǝtǝm bɨlǝngkɛl gǝnɔ, wʊnɨ dǝg lɛ ja gung gǝnɨ.

¹⁰ Nǝngɔ a gung diil gǝnɔ nǝn kwaan gɔ, “Gun tɨ tɨɨ nǝn naatɨn mʊnɔ.” Nǝngɔ a gun a mɔ, a tǝl yɔmɨ.

¹¹ Mʊrkalɨ nǝbɔ a kuwo jʊ nɨ Bulus a maaɨ, nǝngɔ ja gung diil jinɔ nǝn nyiyo Ikoniyaɨ gɔ, “Kwaamatɨnɔ a gǝla bǝm nǝn bʊtɔ nǝfitʌmi!”

¹² Nǝngɔ ja ja Barnaba gǝm dunɔ gɔ Zafsaɨ. Ja jo Bulus gɔ Hamisa, jʊ a bwɨɨ nǝn gɔ nǝ dʊʊ kiyotǝm kɛlɨ.

¹³ Nǝngɔ nǝkǝla Zafsaɨ, wʊnɨ kan wabɨ gǝnɔ a yooli tuulɔ gɨɨ, a bɛ nǝn nɛɛtɨnɔ jǝbɔ fɨlǝn langǝn tɨyagɔ a nyanga tuulɔ gɨɨ, swɨ lɛ sǝ jǝ twɨ bɛtɔ twamagɔ gǝm yulʌn.

¹⁴ Bɛtɔ twama nɨ, Barnaba jǝbɔ Bulus, ja nyʊwa nyɨɨ, ja wʊlala dwangtɨn jinɔ. Ja mwal ja dɔ kʊm nǝbɨɨ, jǝ sʊwa lɛ gɔ,

¹⁵ “N wɛ a bwɨ jǝ́ maa lɛ nyɨɨ? Nǝn nǝfitʌm na jen. Nǝn bɛ jem nǝn fulon kɛl lǝmɨ, sǝ jǝ́ yǝla jǝ́ bǝla kanjǝl nɨ a bʊm bɨɨ gǝm gul. Jǝ́ yǝla a daa Kwaama kʊlɨ woi, wʊnɨ a fɛ dʌbʌlɔ jǝbɔ tǝmɨ, jǝbɔ wɨmagɔ jǝbɔ kanjǝl nɨ a mʊgɔ jin gwamɨ.

¹⁶ Nǝn galɨgǝn, a bǝla nǝfitʌmɔ gwam ja maa jʊ a bʊm jimi.

¹⁷ A gǝnɔ a ja kǝga nǝn maatǝm kanjǝlɔ, sǝ a nʊng gɔ gǝ wo. A maa jǝ nyan a gola nǝtǝm jen mwɛ kwama jǝbɔ shena nɨ dǝg bwili kʌsotǝmɔ lɛɨ. Nǝn gɔ nǝ jen jǝjalǝn nɛɨ. Nǝn gɔ dǝg jen fulotǝm nǝl lɛɨ.”

¹⁸ Kɛltɨn nɨ pʌd ja bʊʊ twɨtǝm yulʌn nɨ nǝn dǝm nyɔ.

¹⁹ Kaam Yahudawagɔ a bɛ a Antakiya jǝbɔ Ikoniyaɨ, nǝngɔ ja swag nǝbɔ ja mala Bulus nǝn tɛlɨ, ja gʊ gǝn a gul tuulɔ jǝ dʌng lɛ gɔ a bʊla.

²⁰ Nǝn kwama nǝb bwangtǝmɔ a kang gǝnɨ, nǝngɔ a gun a dɔ mʊgɔ tuulɔngɨ. Nǝn tǝmsɛlɨ nǝngɔ a shu a Darba dakini jǝbɔ Barnabaɨ.

Yǝlatǝm A Antakiya Nɨ A Suriyaɨ

²¹ Nǝn kwama Bulus jǝbɔ Barnaba a kiyo fulon kɛl lǝmɨgɔ a Darbaɨ, ja nya nǝb bwangtǝm Kwaamaɨ a lada. Nǝngɔ ja yǝla a Listira jǝbɔ Ikoniya jǝbɔ Antakiyaɨ.

²² Jǝ kwam nǝb bwangtǝm Kwaamaɨ gǝm nǝl lɛ gɔ ja tɨ a nǝtǝm bɨlǝngkɛl. Jǝ sʊwa lɛ gɔ, “Nǝn nɔɔtǝm gaalanɔ a lada bǝ dɔ fɔlɔn lɔ Kwaamaɨ lɛɨ.”

²³ Kwama ja jǝg nǝb dʊʊmɔ a daatɨn mʊrkalɨ nǝb bwangtǝm Kwaamaɨ gwamɨ, nǝngɔ ja dɔ maatǝm keli jǝbɔ dotǝm diil mwɛɨ, ja dǝg ji a kang Tɛlalɔɨ, wʊnɨ ja nǝ bɨlǝngkɛl nǝn gɨɨ.

²⁴ Ja do a golagɔ a yɔ a tǝm Bisidiyaɨ, nǝngɔ ja shu a tǝm Bamfiliyaɨ.

²⁵ Nǝn kwama ja kiyo kɛl Kwaamaɨ a Pagaɨ, nǝngɔ ja shu a Ataliyaɨ.

²⁶ A daa gɔ, nǝngɔ ja dɔ tɨyamwɛngɔ ja yǝla a Antakiyaɨ, a daa nɨ galɨgǝn ja maa jim keli sǝ Kwaama a kɨla ji a maajɨ nɨ ja maaɨ.

²⁷ Ja bɛ woi, ja mʊr mʊrkalɨ nǝb bwangtǝm Kwaamaɨ, ja nǝ ji fulon jʊ Kwaama a maa a daa ji woi. Ja sʊwa nǝb bwangtǝmɔ tag kanga Kwaama a wum Bʌtʌbɔ gǝm nyanga kan nǝtǝm bɨlǝngkɛlɨ.

²⁸ Ja yɨ wo kumtɨnɔ a gǝlala jǝbɔ nǝb bwangtǝmɔ.