Maajɨ Bɛtɔ Twamagɨɨ 12 - Dadiya NT

Ja Sʊ Nǝb Bwangtǝmɔ Gǝm Gaalan

¹ Nǝn kwama gɔ, Hiridus Fɔlɔgɔ a tǝl nʊng kaam mʊrkalɨ nǝb bwangtǝm Kwaamaɨ gaalan nɛ.

² A dǝg ja jʌ Yakubu kɨla Yohanaɨ nǝn gulʌn.

³ A kuwo jʊ nɨ gǝ maaɨ a bʊm Yahudawagɔ gǝmɨ, nǝngɔ a ta Bitrus tǝgǝnɨ. A bwɨ nǝn kumtɨn Dikulom Kʊkkʊm nɨ mɨ Yisti woi.

⁴ Hirudus a ta Bitrus a kubʌl a lɔsomi, a kang sʊwajaamtɨnɔ kʊb jeli nukun jǝ tɔɔ gǝn nɛ. Saa lɛ sǝ gǝ bɛ nǝn gɔ a kǝga nǝbɨɨ, sǝ gǝ maa gǝm borang na dikulomɔ a shui.

⁵ Nǝn kwama Bitrus a lɔsomii, mʊrkalɨ nǝb bwangtǝm Kwaamaɨ a dɔ maatǝm keli Kwaamaɨ nǝn kwaan jinɔ a kɛl dul gǝn.

Ja Jǝg Bitrus A Lɔsomi

⁶ Nǝn kum gɨɨ, Hiridus maa bʊʊlalɨ lɛ sǝ gǝ jǝg Bitrus nǝn tǝmsɛlɨ gǝ yɔ nǝn gɔ a kan borang. Bitrus ja bwa bwaɨ nǝn golmantɨnɔ yo, daa dum lɛ a tɨbǝl sʊwajaamtɨn nɨ yoi. Nǝb tɔɔtǝm lɔsomigɔ yǝm a nyanga kan jǝ tɔɔ lɛ.

⁷ Tʌgo a kang dangǝn, nǝngɔ kaa bwɛ twama Tɛlalɔɨ a nʊng dul gǝnɨ. Kaa nyalǝmɔ beta lɛ a mʊgɔ kan nɨɨ. Nǝngɔ la a ke Bitrus a daalɨ, a gung gǝnɨ a sʊwa gɔ, “Gun dǝbǝr.” Nǝngɔ la golmanɔ a tǝlam a kang Bitrusi.

⁸ Bwɛ twama Kwaamaɨ a sʊwa gǝn gɔ, “Mal bɛllɛ mʊnɔ, ń dǝg twamtɨn mʊnɔ.” Nǝngɔ a maa nyɨɨ. Nǝngɔ la bwɛ twama Kwaamaɨ a sʊwa gǝn gɔ, “Kwab dwang kwabtǝm mʊnɔ, bwang mɨ.”

⁹ Nǝngɔ a jel bwang gǝm lɛɨ. A nyǝm bɔ gɔ jʊ nɨ bwɛ twama Kwaamaɨ maa lɛɨ n bɨlǝngkɛl. Kuwo lɛ gɔ dʊgam nyangnyang gǝ maa lɛɨ.

¹⁰ Ja shu nǝb tɔɔtǝm nyanga kan na winɔ jǝbɔ na yogɨɨ, ja la nyanga kan kemʌn dɔtǝmɔ a tuulɔ gɨɨ, nǝngɔ nyanga kanɔ a wumo nǝn kang gǝnɨ. Nǝngɔ ja jeli. Ja bɛ a daagɔ golagɔ ya dɨlǝm woi, tʌgo a kang nǝngɔ bwɛ twama Kwaamaɨ a wʊlaka jǝbɔ gɨɨ.

¹¹ Nǝngɔ la Bitrus a yǝla a bɛ a bʊʊlalɨ gǝnɔ gǝmɨ. A sʊwa gɔ, “Bɨlǝngǝn n nyǝm, nǝn Tɛlalɔ a twam bwɛ twama gǝnɔ sǝ a bʊʊ nǝn mǝ a kang Hiridusi, jǝbɔ bwɨlang kanjǝgan nɨ gwam Yahudawagɔ a fɛka a dul mɨɨ.”

¹² Bitrus a nyǝm nyɨɨ, nǝngɔ a shu a lɔ Maryamui nɛnɛ Yohanaɨ wʊnɨ jǝ jo gǝn nɛ gɔ Markusi, a daa gɔ, nǝbɔ a mʊrka wo a lada nyɔ maa keli lɛ.

¹³ A ga nyanga kan dʊʊn yooligɨɨ, nǝngɔ kaa bwɛnɔɔlɨ nɨ maa maajɨ lɛ a lɔ nʊ gɨɨ, dunɔ nǝn Roda, a bɛ sǝ ba kuwo kɛna nuwoi.

¹⁴ A nyʊwa n diil Bitrusi, a wum bɔ nyanga kanɔ dɨn a kɛl fulotǝm nǝl. Nǝngɔ a yǝla nǝn sʊgɔl a sʊwa ji gɔ, Bitrus tɨm a nyanga kan.

¹⁵ Nǝngɔ ja sʊwa gǝn gɔ, “Mʊ nǝ wabɨ ka?” A tɨtǝn sʊwa lɛ. Nǝngɔ ja sʊwa gɔ, “N bwɛ twama Kwaamaɨ nɨ tɔɔ gǝn nɛɨ.”

¹⁶ Bitrus a tɨtǝn ga lɛ. Ja wum ja kuwo nǝn gɨɨ, ja ta kang a nyiyo.

¹⁷ Nǝngɔ a nʊng nǝn kang gɔ ja yɨ shigi, a sʊwa ji kanga Tɛlalɔ a jǝg gǝn a mʊgɔ lɔsomii. A sʊwa tag gɔ, “Jǝ́ sʊwa Yakubu jǝbɔ tangǝn kɛtǝlamɔ jʊ nɨɨ.” Nǝngɔ a gun a shu a kaa daaɨ.

¹⁸ Tǝmɔ a sɛlɨ, ke bɔ bɛ komtǝm a gun a kʊm sʊwajaamtɨn nɨɨ, a dul jʊ nɨ a nya Bitrusi.

¹⁹ Hiridus a saa gǝn a nya gǝn bɔ. Nǝngɔ a tɨtǝn fɨɨtǝm nǝb tɔɔtǝmɨ, a dǝg gɔ ja jʌbo jii. A gulɔ gǝm nǝngɔ Hirudus a gun a Yahudiyaɨ, a shu a Kaisar ya yɨɨ wo kumtɨnɔ a gǝlala.

Bwaa Hiridusi

²⁰ Nǝn kwama gɔ, Hirudus a maa nabwɨl nyangǝn jǝbɔ nǝbɔ Tayaɨ, jǝbɔ nǝbɔ Sidoni. Nǝngɔ ja bɛ a daagɔ Hirudus woi nǝn bʊʊlalɨgɔ wini. Jǝ swɨ lɛ Bilastasa fɔlɔ lɔ fɔlɔnɔ a dɔ kʊm jinɔ jǝbɔ Hirudus. Nǝngɔ Bilastasa a jǝla gɔ gǝ tɨka ji tɨka. Ja ya nǝl jinɔ a fɔlɔ tǝm gɔ a kɛl dul jǝjalǝn jinɔ gǝm. N kɛl dul jʊ nɨ, jǝ swɨ lɛ ja fɛka yɨm jini.

²¹ Nǝn kwama ja mʊrkamɨ, nǝngɔ Hiridus a dʊʊ dwang malǝng fɔlɔn gǝnɔ a yɨ a kotere fɔlɔn gǝnɨ, a sʊwa ji kɛlɨ.

²² Nǝbɔ a mʊrka a nyʊwa gǝn. Nǝngɔ ja gung nǝn diil jǝ sʊwa lɛ gɔ, “Diil nɨ n diil kaa kwaama, ke bɔ a nǝfilii!”

²³ Tʌgo a kang nǝngɔ kaa bwɛ twama Tɛlalɔɨ a jǝga gǝnɨ, jʊ a bwɨɨ a bǝlá bɔ Kwaamagɔ. Nǝngɔ ywɛtɨnɔ a tɨtǝn jatǝm gǝnɨ a yɔ nǝn a bwaaɨ.

²⁴ Kɛl Kwaamaɨ a sʊtǝn jatǝm kǝga. Nǝb bwangtǝmɔ sʊtǝn nɛ.

²⁵ Nǝn kwama Barnaba jǝbɔ Shawulu ja dɨm maajɨ nɨ ja nǝ jii, nǝngɔ ja yǝla ja bɛ a Urushalimaɨ. Ja bɛ dakini jǝbɔ Yohana wʊnɨ jǝ jo gǝn nɛ gɔ Markusi.