Maajɨ Bɛtɔ Twamagɨɨ 10 - Dadiya NT

Karniliyas A Jo Bitrus

¹ Kaa nǝl wo a Kaisar, dunɔ nǝn Karniliyas. Na kaa dʊʊ sʊwajaam Roma, n nya sʊwajaamtɨn nɨ jǝ jo lɛ gɔ nya Italiyaɨ.

² N nǝ bwangtǝm Kwaamaɨ. Nyʊwa taal Kwaamaɨ lɛ, jǝbɔ lɔ gǝnɔ gwam. Nǝn gɔ nǝ tɨkalɨ lɛ nǝlɔ win a Yahudawa nɨ n nǝb bʊnǝnɨ. Kela Kwaama lɛ kwangkwang.

³ Kaa di kemʌnɔ taal nǝn kwaamɨ, a kuwo kaa bwɛ twama Kwaamaɨ a mʊgɔ dʊgam nyangnyang. A bɛ a daa gǝ woi a sʊwa gɔ, “Karniliyas!”

⁴ A ya gǝm nu a mʊgɔ taal. Nǝngɔ a bʌ gɔ, “Tɛlalɔ, n wɛ nyɨɨ?” Bwɛ twama Kwaamaɨ a sʊwa gǝn gɔ, “Keli mʊnɔ jǝbɔ tɨkalɨgɔ mʊ maa nǝb bʊnǝnɔ gǝm lɛɨ a yɔ a kǝga Kwaamaɨ. N jǝ bʊʊlalɨ a daa gǝ woi.

⁵ Twam nǝbɔ a Yafa ya ja bɛ nǝn Saminu wʊnɨ jǝ jo lɛ gɔ Bitrusi.

⁶ A shig a daa Saminu woi wʊnɨ sʊn tɛ lɛɨ, wʊnɨ lɔ gǝnɔ a kʌng wɨmaɨ.”

⁷ Bwɛ twama Kwaamaɨ a sʊwa gǝn kɛlɔ a shui, nǝngɔ Karniliyas a jo bɛtɔ jwaalɛn gǝnɔ yo, jǝbɔ kaa sʊwajaam nǝ bwangtǝm Kwaamaɨ a mʊgɔ nǝb nɨ maa gǝm maajɨ lɛɨ.

⁸ Nǝngɔ a sʊwa ji kɛltɨn nɨ a bwɨ gwamɨ. Nǝngɔ a twam ji a Yafaɨ.

Dʊgam Nyangnyang Bitrusi

⁹ Nǝn tǝmsɛlɨ, bɛtɔ jwaalɛn Karniliyasɨ yɔ yɔm jinɔ lɛ wo dɨn, ba ja dwama tuulɔngɔ Bitrus woi, nǝngɔ Bitrus a gwi kan dʌbʌlɔ nǝn sɨ kɔkɔ sǝ a maa kelii.

¹⁰ Jʊwanɔ a ta gǝn, swɨ lɛ a ja kaa jǝl. Jǝ fɛka jǝjalǝnɔ lɛ wo dɨn, nǝngɔ a kuwo a mʊgɔ dʊgam nyangnyangɨ.

¹¹ A kuwo dʌbʌlɔ a wumo, kaa jǝl gǝla lɛ na dalɨ dwang kwabtǝm, jǝ shig lɛ a tǝm, kanǝnɔ naal.

¹² A mʊgɔ gǝn, yʊwaltɨnɔ wo gwam nǝn dʌmʌn, nǝbɔ naatɨnɔ naalɨ wo, jǝbɔ nǝbɔ wuul lɛ nǝn fʌl a tǝmɨ, jǝbɔ lǝbɨtɨnɔ.

¹³ Nǝngɔ a nyʊwa kaa diil a sʊwa gǝn gɔ, “Bitrus, gun tɨ tɨɨ, biyo, ń wo.”

¹⁴ Nǝngɔ Bitrus a sʊwa gɔ, “Mɨ nyɔ Tɛlalɔ! Mǝ wo bɔ kaa jǝl wo, wʊnɨ mɨ sagsagɨ, jǝbɔ a wʊnɨ nǝn dutoi.”

¹⁵ Nǝngɔ a nyʊwa diil na yogɔ sʊwa lɛ gɔ, “Jʊ nɨ Kwaama a fɛka sagsagɨɨ, ka ń jo gǝn nɛ mɔʊ mɨ sagsag.”

¹⁶ Jʊ nɨ a bwɨ naagɔ taal. Nǝngɔ la ja gʊm jʊgɔ ja shu nǝn a dʌbʌli.

¹⁷ Bitrus a do komtǝm dangǝn a dul dʊgam nyangnyang nɨ ja nʊng gǝnɨ. Nǝngɔ nǝb nɨ Karniliyas a twamɨ, ba tɨm a nyanga kanɨ, ja kwɛl ja bʌ bʌi lɔ Saminui.

¹⁸ Jǝ yal jǝl lɛ, jǝ bʌ lɛ gɔ kɛna Saminu wʊnɨ jǝ jo lɛ gɔ Bitrusi a shig a daa nɨɨ.

¹⁹ Bitrus maa bʊʊlalɨ lɛ a dul dʊgam nyangnyang nɨɨ, nǝngɔ Yʊwa Kwaamaɨ a sʊwa gǝn gɔ, “Saminu, nǝbɔ wɔ taal jǝ saa ń nɛ.

²⁰ Gun gǝla bwang jim. Ka ń kɨɨ lɛ nǝl. Nǝmǝ mǝ twam jii.”

²¹ Nǝngɔ Bitrus a gǝla a yɔ a daa ji woi, a sʊwa ji gɔ, “Mǝ wɔ, jǝ́ saa mǝ. N wɛ nyɨɨ a bɛ nǝn jeni?”

²² Nǝngɔ ja sʊwa gɔ, “Na kaa dʊʊ sʊwajaam, dun gǝnɔ nǝn Karniliyas, a twam nǝnɨ. N nǝ dǝngdǝng, n nǝ nyʊwatǝm taal Kwaamaɨ, wʊnɨ Yahudawagɔ gwam sʊwa kɛl nyan nɛ a dul gǝnɨ. Nǝngɔ kaa bwɛ twama Kwaamaɨ sagsag a sʊwa gǝn gɔ, a twam mʊn sǝ ń yɔ a lɔ gɔ, sǝ a nyʊwa jʊ mʊ sʊwa lɛɨ.”

²³ Nǝngɔ Bitrus a dɔ nǝn jii, a nǝ ji daa daamɨ. Nǝn tǝmsɛlɨ nǝngɔ a gun ja shu dakinii. Kaam nǝb bwangtǝm Kwaamaɨ a tuulɔ Yafa ya ywa ji.

²⁴ Kaa tǝmsɛlɨ nǝngɔ ja dɔ Kaisarɨ. Karniliyas ya nǝl lɛ a bɛtǝm jinɔ gǝm, nǝngɔ a jo kɛtǝlam gǝnɔ jǝbɔ fatǝlam gǝnɨ.

²⁵ Bitrus a dɔ mʊgɔ lɔngɨ, nǝngɔ Karniliyas a tǝga gǝnɨ, a jʊng a kǝga gǝn, a nǝ gǝn dʊʊnɨ.

²⁶ Nǝngɔ Bitrus a dǝg gǝn gɔ ga gun, gɔ, “Gun, mǝ tǝmɨ mǝ nǝfili.”

²⁷ Bitrus kiyo kɛlɔ lɛ jǝbɔ gɨɨ, nǝngɔ a dɔ a nya nǝbɔ a lada nyɔ ja mʊrkaɨ.

²⁸ Nǝngɔ a sʊwa ji gɔ, “Jen nǝn kang jen jǝ́ nyǝm nyǝmɨ a bʊm bɔ bwɛ Yahudiya a mʊrka dul jǝbɔ Bwɛ bʌl, a bɛ gǝm fɔla. Kǝngkɔ Kwaama a nʊng ɨ gɔ ka n sʊwa lɛ kaa nǝl mǝʊ, mɨ sagsag, nǝ duto.

²⁹ N dul kɛl nɨ ja twam ɨ gɔ n bɛɨ, mǝ kɔ bɔ bɛtǝmɔ. Kǝngkɔ mǝ swɨ lɛ n nyǝm jʊ a bwɨ jǝ́ jo i lɛɨ.”

³⁰ Nǝngɔ Karniliyas a jǝla gɔ, “Kumɔ taal nɨ a shui, kang kwama nɨ, kemʌnɔ taal na kwaamɨ, mǝ maa keli lɛ a lɔ mɨ. Nǝngɔ kaa balɨ a tɨ a kǝga mɨɨ, dwang malǝng gǝnɔ beta lɛ nyɔ.

³¹ Balɨgɔ a sʊwa gɔ, ‘Karniliyas, Kwaama a yo keli mʊnɔ. A bʊʊla nǝn tɨkalɨ nǝb bʊnǝnɔ mʊ maa lɛɨ.

³² Tʊng a Yafa ja jo Saminu, wʊnɨ jǝ jo lɛ gɔ Bitrusi, a shig a lɔ Saminu wʊnɨ sʊn tɛ lɛɨ, wʊnɨ lɔ gǝnɔ a kʌng wɨmaɨ.’

³³ N kɛl dul jʊ nɨ mǝ twam mǝʊ ja jo ńi. Ń maa a bʊm, mʊ bɛɨ. N wɔ nǝn mʊrka a kǝga Kwaamaɨ, sǝ nǝn nyʊwa twamagɔ Tɛlalɔ a sʊwa ńɨ.”

Bitrus A Kiyo Kɛl Kwaamaɨ A Lɔ Karniliyasɨ

³⁴ Nǝngɔ Bitrus a tǝl sʊwa ji kɛlɔ lɛ gɔ, “N nyǝm n bɨlǝngkɛl, Kwaama mɨ nʊng swɨtǝm dul lɛ.

³⁵ Gǝ yo yo nǝbɔ a bǝlǝntǝmɔ gǝm gwam, nǝb nɨ nyʊwa taal gǝnɔ lɛɨ, jǝbɔ nʊ nɨ maa jʊ nɨ lɛ dǝngdǝngɨ, jǝbɔ maatǝm jʊ nɨ Kwaama swɨ lɛɨ.

³⁶ Jǝ́ nyǝm twamagɔ a twam nǝbɔ Israilaɨ gǝmɨ, jǝ sʊwa ji fulon kɛl lǝmɨ na yɨm kwamɨgǝn nɛ a gola Yesu Kiristii. Nǝn gɔ nǝn Tɛlalɔ bǝn gwamɨ.

³⁷ Jǝ́ nyǝm kanga fulon kɛl nɨ a kɛla mʊgɔ Yahudiyagɔ gwamɨ, a tǝl a mʊgɔ tǝm Galili, a gul yʊtǝm mwɛ sagsag nɨ Yohana a sʊwa nǝbɨɨ.

³⁸ Jǝ́ nyǝm fulon kɛl Yesu Bwɛ Nazaratɨ, kanga Kwaama a gul gǝm bwiyel Yʊwa gǝnɨ jǝbɔ kwaanɨ. Jǝ́ nyǝm kanga kɛla lɛ maa maajɨ lǝma lɛɨ, gung nǝb nɨ lɛ Mammɔ nǝ ji gaalan nɛɨ, jʊ a bwɨɨ Kwaama gǝ na dakini jǝbɔ gɔ.

³⁹ “Nǝn nǝ kuwo kanjǝlɔ gwam Yesu a maa a tǝm nǝbɔ Yahudiyaɨ jǝbɔ mʊgɔ Urushalimaɨ. Nǝngɔ ja jʌ gǝn a gola kʊʊtǝm a dʌbʌl tɨyaɨ.

⁴⁰ Kwaama a gung gǝn a kum na taal. Kwaama a yǝla a nʊng dul gǝnɔ a daagɔ nǝbɔ woi.

⁴¹ A nʊng bɔ dul gǝnɔ a daagɔ nǝbɨɨ gwam. A nʊng a daagɔ nǝn woi, nǝn nǝbɔ Kwaama a jǝgam galɨgǝn sǝ nǝn yǝlam nǝb nǝtǝm nyiyoi. Nǝnǝn nǝn ja, nǝn nɔɔ jǝbɔ gɨɨ nǝn kwama a gunʌm a bwaaɨ.

⁴² Nǝngɔ a nǝ nǝn diil sǝ nǝn kiyo nǝbɔ gǝm kɛl Kwaamaɨ. A nǝ nǝn diil tag sǝ nǝn sʊwa nǝn gɔ Kwaama a jǝgǝm gǝn sǝ a maa nǝb nɨ kʊlɨgǝnɨ, jǝbɔ nǝbɔ a bʊla bʊlaɨ gǝm borangɨ.

⁴³ Nǝbkuwotǝmkǝgagɔ gwam ja sʊwa kɛl a dul gǝn, gɔ a mʊgɔ dun gǝn nʊ nɨ gwam a nǝ bɨlǝngkɛlɨ, nya nya kǝlǝmtǝm bwɨlangkɛltɨn.”

Ja Nǝ Bʌtʌbɔ Yʊwa Kwaamaɨ

⁴⁴ Bitrus kiyo kɛlɔ lɛ wo dɨn, nǝngɔ Yʊwa Kwaamaɨ a gǝla a dul nǝb nɨ nyʊwa kɛl gǝnɔ lɛɨ.

⁴⁵ Yahudawagɔ nǝb bwangtǝmɔ, wʊnɨ ja bɛ jǝbɔ Bitrusi, ja kuwo nǝb nɨ n Bʌtʌb tʌjii ja nya nǝtǝm lǝma Yʊwa Kwaamaɨ, ja ta kang a nyiyo.

⁴⁶ Jʊ a bwɨɨ, ja nyʊwa jǝ kiyo kɛlɔ lɛ nǝn kaam nyiyotɨn, jǝ nǝ Kwaama dʊʊn nɛ. Nǝngɔ Bitrus a sʊwa gɔ,

⁴⁷ “Kaa nǝl wo kuwo lɛ gɔ ka ja yʊ lɛ nǝb nɨ mwɛ sagsag ka? Ji tʌji ja nya Yʊwa Kwaamaɨ kanga bǝn tǝbǝn bǝ nyaɨ.”

⁴⁸ Nǝngɔ Bitrus a nǝ ji diilɔ gɔ ja yʊ ji mwɛ sagsagɔ a mʊgɔ dun Yesu Kiristii. Nǝngɔ ja kela gǝn gɔ ga sʊtǝn kumtɨnɔ dǝm a daa ji woi.