2 Tasalonikaɨ 2 - Dadiya NT

Fɔlɔ Kutʌm Bwɨla

¹ Kambɔ, a kɛl yǝlatǝm Tɛlalɔ bǝn Yesu Kiristii, jǝbɔ mʊrkatǝm bǝnɔ sǝ bǝ tǝgaka bǝnɔ gɨɨ, nǝn kela jen nɛ,

² bɛ ka nǝl jenɔ ya mǝga lɛ. Ka jǝ́ gung lɛ nǝl jenɔ a nyʊwatǝm kaa kɛl kuwotǝmkǝga, kaa kiyotǝm fulon kaa langǝn bwangǝn, wʊnɨ kaamɨ gɔ a jel a daa nǝn woi gɔ, kɔkɔ bɛtǝm Tɛlalɔɨ a kwɛl a bɛɨ.

³ Bɛ ka jǝ́ jǝla lɛ kaa nǝl a swag jen dǝm, jʊ a bwɨɨ, kɔkɔ nɨ mɨsɔ lǝga lɛ a bɛ, na ja maa bɔ gotatǝm nɨ nǝn kwamagɔ fɔlɔ kutʌm bwɨla nɨ jelʌm lɛɨ, nʊ nɨ kala lɛɨ.

⁴ Nʊ gɔ n nǝ kii. Maa kii lɛ jǝbɔ jʊ nɨ gwam nǝn dun Kwaamaɨ, jǝbɔ kanjǝl nɨ nǝbɔ bǝlá lɛɨ. A gung dul gǝnɔ a laa kanjǝl nɨ gwam. Yɨ yɨ a Kan Kwaaman Kwaamaɨ, sʊwa lɛ gɔ nǝn gɔ gǝ nǝn Kwaama.

⁵ Jǝ́ bʊʊla bɔ ka? Mɨ mǝ sʊwa jen kanjǝl nɨ lɛ kwama bǝ dakinii ka?

⁶ Jǝ́ nyǝm jʊ kʌshi gǝn nɛ kǝngkɨɨ, kage a jel kwama gǝnɔ a la bɔ.

⁷ A kǝngkɔ kwaan nǝ kutʌm bwɨla nɨ a kwɛl a ta maajɨ daddad. Nʊ nɨ kʌshi gǝn nɛɨ ja ja kǝga nǝn kʌshitǝm gǝnɔ ba la nǝn kwama jǝ dem nʊ nɨ kʌshi gǝn nɛɨ.

⁸ Sǝla fɔlɔ kutʌm bwɨla nɨ a jel. Tɛlalɔ Yesu jʌ gǝn nǝn fǝbǝm nyiyo gǝnɔ. A kalǝm gǝn nǝn dʊʊlǝn gǝnɔ a di kɔkɔ bɛtǝm gǝnɔ gǝm.

⁹ Fɔlɔ kutʌm bwɨla nɨ bɛ a kwaan fɔlɔn Mammɨ, maa kanjǝl laatǝm kang gabakɛl lɛ, jǝbɔ kanjǝl nʊngtǝm, jǝbɔ kanjǝl tatǝm kang a nyiyo.

¹⁰ Maa maa maajɨ nǝn kanjǝl bwɨla sǝ a swag nǝb nɨ a gola bʊlatǝmɨ, jʊ a bwɨɨ ja kɔ swɨtǝm bɨlǝngkɛl wʊnɨ jǝ bʊʊm lɛɨ.

¹¹ A dul kɛl nɨ, Kwaama tʊng jim tʊng gʌleng swagtǝm sǝ ja nǝ bɨlǝngkɛl a gabakɛl,

¹² sǝ a mwɛ nǝb nɨ gwam a kɔ nǝtǝm bɨlǝngkɛlɨ, jǝ nyʊwa lǝma maatǝm shil lɛɨ.

Yɨtǝm Yɨm Nyan

¹³ Jǝ́ kɛtǝlam mɨɨ, nǝbɔ Tɛlalɔ swɨ lɛɨ, a yǝlam nyɔ nǝn buu Kwaama gǝm kang a dul jen, jʊ a bwɨɨ Kwaama a jǝgam jen nǝn tɨkǝga sǝ jǝ́ nya bʊʊtǝm a gola butitǝm Yʊwa Kwaamaɨ, a gola nǝtǝm bɨlǝngkɛl bɨlǝngǝn.

¹⁴ N kɛl dul jʊ nɨ a jo jeni, a gola fulon kɛl lǝmɨ nɨ nǝn sʊwa jeni, sǝ jǝ́ nya dʊʊlǝn Tɛlalɔ bǝn Yesu Kiristii.

¹⁵ A na nyɔ kambɔ, bɛ jǝ́ tɨ a kwam, jǝ́ ta diiltɨn nɨ nǝn mɛla jemi gwanggwang, a nyiyo jǝbɔ mʊlalɨ.

¹⁶ Bɛ Tɛlalɔ bǝn Yesu Kiristi nǝn dul gǝn, jǝbɔ Kwaama Tɛtɛ bǝn wʊnɨ a swɨ bǝn a gola lǝma gǝnɨ, a kʊʊ bǝm nǝl nɨ mɨ dɨtǝm woi, a nǝ bǝn yatǝm nǝl nyan,

¹⁷ a kʊʊ jem nǝl, a nǝ jen kwaan bʊtɔ tag a gola maajɨ nyan jǝbɔ kiyotǝm kɛl.