2 Korinti 5 - Dadiya NT

Bʊtɔ Fɨ

¹ Bʊtɔ bǝnɔ gǝ na na gushi. Bǝ nyǝm na ja kʌbi, Kwaama a maa bǝm kaa lɔ a dʌbʌl, wʊnɨ ke bɔ nǝl a mɔ nǝn kang gǝnɨ, wʊnɨ mɨ dɨtǝm woi.

² Kǝngkǝnɨ bǝ dʊna lɛ nǝn bʊtɔ yooli nɨɨ, bǝ ya nǝl lɛ a bʊtɔ nɨ jǝ mal bǝm lɛ na dʌbʌli,

³ sǝ na ja mal bǝm bʊtɔ nɨɨ, mɨsɔ jǝ nya bǝn nɛ sǝlɨgǝn.

⁴ Nǝn kwama bǝ yǝm nǝn bʊtɔ yooli nɨɨ, bǝ dʊna lɛ dʊnaɨ a gaalan nɨ bǝ nyʊwa lɛɨ. A nʊng bɔ bǝ swɨ lɛ bǝ bǝla bʊtɔ yooli nɨɨ. Bǝ swɨ lɛ ja mal bǝm bʊtɔ na dʌbʌlɔ, sǝ bʊtɔ kʊlɨgɔ a fʌlʌm bʊtɔ bwaagɔ.

⁵ Nǝn Kwaama a fɛka bǝm fʌtotǝm nɨɨ, gǝ nɨ a nǝ bǝn Yʊwa gǝnɨ. Mɨ nyǝmatǝm wo, gɔ gǝ nǝ bǝn nǝ tangǝn kanjǝlɔ gwam.

⁶ Gǝ na nyɔ kwangkwang nǝn nǝn kwamǝn nǝl. Nǝ nyǝm na nǝn nǝn bʊtɔ nɨɨ, nǝn kʊtaka jǝbɔ Tɛlalɔ.

⁷ Nǝn yɨ yɨm a gola nǝtǝm bɨlǝngkɛl, ke bɔ na kuwotǝm nu.

⁸ Nǝn nǝn bɨtǝm nǝl. Nǝn swɨ lɛ na laa laa jǝl nǝn wʊlaka nǝn bʊtɔ nɨɨ, nǝn yɨ a daagɔ Tɛlalɔ woi.

⁹ Na nǝ na a mʊgɔ bʊtɔ nɨɨ, na nǝ wʊlaka jǝbɔ bʊtɔ nɨ, swɨtǝm nǝnɔ nǝ fulo gǝm nǝl.

¹⁰ Gwam bǝnɔ bǝ tɨ tɨ a kǝga Kiristii sǝ a maa bǝm borang, sǝ bǝ nya ywatǝm maajɨgɔ bǝ maaɨ, nǝn kwama bǝn a mʊgɔ bʊtɔ nɨɨ, kɛna na a nyaɨ, kɛna ke bɔ a nyaɨ.

Maajɨ Dɔtǝm Kʊm Nǝbɨɨ Jǝbɔ Kwaama

¹¹ Kanga nǝ nyǝm nǝn nyʊwa taal Tɛlalɔɨ lɛɨ, n jʊ a bwɨ nǝn gʊ nǝbɔ lɛ a daagɔ Kwaama woi. Kwaama a nyǝm nǝn, nǝn ya nǝl lɛ jen tʌjen gǝ na nyɔ a nǝl jen.

¹² N ke bɔ gungtǝm dul nǝ nʊng lɛ a daa jen woi. Nǝn nʊng jen gola nɨ jǝ́ maa lɨyal lɛ nǝn nǝnɨ, sǝ jǝ́ nyǝm kanga jǝ́ gar kɛl nǝbɨɨ maa lɨyal lɛ nǝn jʊ jǝ kuwo lɛɨ, ke bɔ jǝbɔ jʊ a nǝl jini.

¹³ Na nǝn maa wabɨ, nǝn maa sǝ a bɛ Kwaama gǝm nǝn dʊʊlǝn. Na nǝn maa bɔ wabɨ, n nyatǝm sʊtǝm jen.

¹⁴ Swɨtǝm Kiristii a daa nǝn woi, nǝn gɔ a dǝg nǝn nǝn maa jʊ nɨ lɛ nǝ maa lɛɨ. Jʊ a bwɨɨ nǝn nǝ bɨlǝngkɛl gɔ, kaa nǝl wo a bʊla a kɛl dul nǝbɨɨ gwam, a na nyɔ, gwam jinɔ jǝ bʊla jǝbɔ gɔ.

¹⁵ A bʊla a kɛl dul nǝbɨɨ pʌd, sǝ nǝb nɨ a nya kʊlɨ fɨɨ kage ja yɨ yɨm dul jin a kǝga nɨ, bɛ ja yɨ yɨm nʊ nɨ a bʊla a gun a kɛl dul jini.

¹⁶ Kǝngkɔ a kǝga nɨ mɨsɔ nǝn dʌng kaa nǝl lɛ a kuwotǝm nǝfilii. Galɨgǝn nǝ dʌng Kiristi wo a kuwotǝm bʊtɔ. Kǝngkɔ mɨsɔ nǝ yǝla lɛ nǝn dʌng gǝn nyɔ.

¹⁷ Gǝ na nyɔ, na nʊ nɨ na a Kiristii, n fwaltǝm fɨ. Kanjǝl galɨgɔ gwam a shu shui, kanjǝlɔ gwam a yǝlam a fɨ.

¹⁸ Jʊ nɨ gwam n maatǝm Kwaamaɨ, nʊ nɨ a dɔ kʊm bǝnɔ nǝn kang gǝn a gola Kiristii, a nǝ nǝn maajɨ dɔtǝm kʊm nǝbɨɨ jǝbɔ Kwaama.

¹⁹ Jʊ nɨ gǝ nʊng gɔ nǝn Kwaama nǝn kang gǝn gǝ dɔ kʊm yooligɔ lɛ jǝbɔ gɨɨ, a gola Kiristii. Mɨ gǝ kiyo bwɨlangkɛl jinɔ lɛ a dul jin. Nǝn gɔ a nǝ nǝn kɛl dɔtǝm kʊm nǝbɨɨ.

²⁰ Gǝ na nyɔ, nǝn do nyiyo Kiristii, Kwaama gǝ jo nǝbɔ a gola nǝn. Nǝn kela jen nɛ a dul kɛl Kiristii, jǝ́ maa fɛkalɨ jǝbɔ Kwaama.

²¹ Gǝ nɨ a maa bɔ bwɨlangkɛlɨ, Kwaama a dǝg gǝn a yǝlam nǝ bwɨlangkɛl a kɛl dul bǝn, sǝ bǝ nya yotǝm Kwaamaɨ a gola gǝn.