2 Bitrus 3 - Dadiya NT

Swatǝm Yaa Bɛtǝm Tɛlalɔɨ

¹ Kɛtǝlam mɨ nɨ mǝ swɨ lɛɨ, wʊnɨ nǝn gǝ langǝn bwangǝn na yogɔ mǝ mʊla jemi. A mʊgɔ jin gwam mǝ maa jem bʊʊlalɨ a nǝl jen sǝ a dǝg jen jǝ́ bwangtǝn Kwaama dǝngdǝng.

² Mǝ swɨ lɛ jǝ́ bʊʊla nǝn sʊwatǝm kɛl nǝbkuwotǝmkǝga sagsagɔ, jǝbɔ diil Tɛlalɔ bǝn Nǝbʊʊlɨɨ, a nyiyo bɛtɔ twamagɨɨ.

³ Nǝn tɨkǝga mǝ swɨ lɛ n bʊʊla jem a kumtɨn dɨltǝm, nǝb mogtǝmɔ jel jel, maa mogtǝmɔ lɛ, jǝ bwangtǝn wɛl bwɨlan jinɔ lɛ.

⁴ Jǝ sʊwa sʊwa gɔ, “N wɛ a bwɨ nǝn swatǝm yaa bɛtǝm gǝnɨ? Nǝn kwama tʊgam tʊgalam bǝnɔ a bʊlalaɨ a ba la nǝn dwiyeni, mɨ nǝn jʊ nɨ a fʌtoi. Nǝn kwama ja fwalǝm yooligɔ ba a la nǝn a dwiyeni, kanjǝlɔ yɔ lɛ dǝngdǝng.”

⁵ Nǝn nyǝmtǝm jin jǝ tangǝm a kɛl nɨ gǝm a sʊwa gɔ, galɨgǝn Kwaama a fɛ dʌbʌlɔ a gola sʊwatǝm kɛl, a jǝgǝm tǝmɔ a mʊgɔ mwɛ, nǝngɔ a kang tǝmɔ nǝn mwɛmɨ.

⁶ Nǝngɔ Kwaama a dǝg mwɛ nɨ a fʌlʌm, a kʌbʌm yooli galɨgɨɨ.

⁷ N gola sʊwatǝm kɛl Kwaama a ya dʌbʌlɔ jǝbɔ tǝmɔ kǝngkǝnɨ sǝ kǝlagɔ ba twɨ jii. Kwaama a ya ji, sǝ a la nǝn a di kɔkɔ nɨ gǝ maa nǝb nɨ gǝm mɨ nyʊwa taal gǝnɔ lɛɨ gǝm biyotǝm borangɨ, sǝ gǝ kal ji.

⁸ Kɛtǝlam mɨ nɨ mǝ swɨ lɛɨ, ka jǝ́ twab lɛ kɛl nɨ win swar gɔ, a daa Tɛlalɔ woi kumɔ win swar a maa na jolɔ fʊlkʊblǝn, jolɔ fʊlkʊblǝn a maa na kumɔ win swar.

⁹ Tɛlalɔ mɨ gǝ tɨla lɛ nǝn swatǝm yaa gǝnɔ, kanga kaamɨ gǝ do tatǝm bʊtɔ lɛɨ. N nǝ bwatǝm nǝl a daa jen woi. A swɨ bɔ kaa nǝl a kala. Swɨ lɛ nǝbɔ gwam a yǝla a bǝla bwɨlangkɛl jinɔ.

¹⁰ Kumɔ Tɛlalɔ bɛm lɛɨ, bɛ na nǝkuu. Dʌbʌlɔ shu shu nǝn diil dʊʊn. Gwam jʊtǝb nɨ a dʌbʌl jǝbɔ tǝmɨ twɨm twɨm, ja kala. Tǝmɔ jǝbɔ kanjǝl nɨ a mʊgɔ gǝnɨ, lɛlam lɛlam.

¹¹ Kanjǝl nɨ gwam kala kala. A dul kɛl nɨɨ, n yɨm won a bʊm jǝ́ maa lɛ kǝngkɨɨ? Bɛ jǝ́ yɨ yɨm sagsag. Bɛ jǝ́ yɨ yɨm nǝn nǝl Kwaamaɨ.

¹² Bɛ jǝ́ yɨ nyɔ nǝn kwama jǝ́ yam kɔkɔ Kwaamaɨ lɛɨ. Maatǝmɔ nyɨɨ, sʊtǝn sʊ kwaan bɛtǝm gǝnɔ! Nǝn bɛtǝm gǝnɔ, jǝ kul kul dʌbʌlɔ gǝm kǝla, sǝ gwam kanjǝl nɨ a mʊgɔ gǝnɨ kǝlagɔ twɨm twɨm sǝ a yʊbam.

¹³ A swatǝm yaa gǝnɨ, bǝ yam dʌbʌl fɨ jǝbɔ tǝm fɨ. N daa yɨm nǝb nɨ maa kanjǝl nɨ lɛ dǝngdǝngɨ.

¹⁴ A dul kɛl nɨɨ, kɛtǝlam mɨ nɨ mǝ swɨ lɛɨ, nǝn kwama jǝ́ yam kanjǝl nɨ lɛɨ, jǝ́ maa kwaan ja nya jen mɨ jen nǝn kʊlan, mɨ jen nǝn duto. Jǝ́ maa kwaan ja nya jen jǝ́ yɨ yɨm lǝma a kǝga gǝn.

¹⁵ Bɛ jǝ́ nyǝm bwatǝm nǝl Tɛlalɔ bǝnɨ, gǝ nʊng gǝ swɨ lɛ nǝbɔ a bʊʊ. Kɨla bǝn Bulus wʊnɨ bǝ swɨ lɛɨ, a mʊla jem nyɔ tǝgǝn a nyǝmtǝm nɨ Kwaama a nǝ gǝnɨ.

¹⁶ A mʊla a dul jʊ nɨ nyɔ, kanga gǝ maam lɛ pʌd a tangǝn mʊlalɨ langǝn bwangǝntɨn gǝnɨ. Kaam kanjǝlɔ wo a mʊgɔ jin wʊnɨ a bwa nyǝmtǝmɨ, wʊnɨ nǝb nɨ mɨ nǝn nyǝmtǝmɨ jǝbɔ nǝb nɨ a kwam bɔ a mʊgɔ nǝtǝm bɨlǝngkɛl jinɔ gǝmɨ, jǝ fʌto jʊ, jʊ nɨ nʊng lɛɨ. N gola gɔ jǝ gʊ dul jinɔ gǝm kalatǝm lɛɨ. Jǝ maa nyɔ tag jǝbɔ kaam mʊlalɨ kɛl Kwaamaɨ.

Dɨltǝm Mʊlalɨ Bitrusi

¹⁷ Kɛtǝlam mɨ nɨ mǝ swɨ lɛɨ, kanga jǝ́ kwɛl jǝ́ nyǝm kanjǝl nɨ bwɨ bwɨɨ, bɛ jǝ́ nyǝm kaam nǝb nɨ mɨ sa taal Kwaamaɨ lɛɨ, kage mɛlalɨ gabakɛl jinɔ a wɔɔm bʊʊlalɨ jenɔ jǝ́ bǝla bwangtǝm bɨlǝngkɛlɔ.

¹⁸ Bɛ ya jǝ́ dʊʊl lɛ a mʊgɔ lǝma Tɛlalɔ bǝn Yesu Kiristi Nǝbʊʊlɨɨ, sǝ jǝ́ sʊtǝn nyǝmtǝm gǝnɔ kwangkwang. Bɛ dʊʊlǝnɔ a ta tʌgo a daa gɔ woi kǝngkɔ, mɨ dɨltǝm wo! A daa nyɔ.