1 Yohana 2 - Dadiya NT

Kiristi N Tɨkalɨ Bǝn

¹ Jǝ́ bɛtɔ dwalǝn mǝndɨ, mǝ mʊla jem jʊ nɨ lɛ kage jǝ́ maa bwɨlangkɛl. Na kaa nǝl a maa bwɨlangkɛlɨ, bǝn nǝn nʊ nɨ maa keli lɛ a kɛl dul bǝn a daagɔ Tɛtɛ woi, nǝn gɔ nǝn Yesu Kiristi, Nǝ dǝngdǝng.

² Gǝ nǝn kang gǝn nǝn gɔ a tǝla tʊʊm gǝnɔ na kǝlǝmtǝm bwɨlangkɛltɨn bǝnɨ, n ke bɔ a bǝn kwaagɔ, pʌd jǝbɔ bwɨlangkɛl yooligɔ gwam.

³ Na bǝ bwangtǝn diiltɨn gǝnɔ lɛɨ, n gola nɨ bǝ nyǝm lɛ bǝ nyǝm gǝnɨ.

⁴ Nʊ nɨ a sʊwa gɔ, “N nyǝm gǝn,” mɨ bwangtǝn diiltɨn gǝnɔ lɛɨ, n nǝ gabakɛl. Bɨlǝngkɛlɔ mɨ jǝbɔ gɔ.

⁵ Na bǝ kɨla kɛl gǝnɨ, n bɨlǝngǝn swɨtǝmɔ bǝ maa Kwaama gǝm lɛɨ a yii dǝngdǝng. N gola nɨ bǝ nyǝm lɛ bǝ na a mʊgɔ gǝnɨ.

⁶ Nʊ nɨ gwam sʊwa lɛ gɔ gǝ yǝm a mʊgɔ Yesui, bɛ ga yɨ yɨm nɨ Yesu a yɨɨ.

Diil Fɨgɔ

⁷ Jǝ́ fatǝm nyan mǝndɨ, n ke bɔ kaa diil fɨ mǝ mʊla jem lɛɨ. N diil galɨ nɨ jǝ́ nǝngǝn nǝn tɨkǝgaɨ. Diil galɨ nɨ nǝn gɔ kɛl nɨ jǝ́ nyʊwaɨ.

⁸ A kaa golaɨ, diil nɨ mǝ mʊla jem lɛɨ n diil fɨ, wʊnɨ n bɨlǝngǝn a daa Kiristi woi jǝbɔ jen, jʊ a bwɨɨ, kumtojiligɔ shu lɛ, nyalǝm bɨlǝngkɛlɔ a kwɛl beta lɛ.

⁹ Na kaa win a do gɔ gǝ na a mʊgɔ nyalǝmɨ, nǝngɔ maa kii lɛ jǝbɔ kɨla gɨɨ, gǝ na a mʊgɔ kumtojili dɨn.

¹⁰ Nʊ nɨ swɨ kɨla gɔ lɛɨ, yǝm a mʊgɔ nyalǝm. Mɨsɔ yǝlam tɛl fǝtǝm naa kaa nǝlɨ lɛ.

¹¹ Nʊ nɨ kɔ kɨla gɔ lɛ tagɨ, gǝ na a kumtojili, n kumtojili gǝ yɔ lɛ woi. A nyǝm bɔ daa nɨ gǝ fam naa gǝnɔ lɛɨ, jʊ a bwɨɨ kumtojiligɔ a kul nǝn gɔ.

¹² Jǝ́ bɛtɔ dwalǝn mǝndɨ, mǝ mʊla jem lɛ, jʊ a bwɨɨ, Kwaama a kǝlǝm jem bwɨlangkɛl jenɔ a kɛl dun Yesui.

¹³ Mǝ mʊla jem lɛ jǝ́ tɛbɔ, jʊ a bwɨɨ jǝ́ nyǝm gǝn wo nǝn tɨkǝga a fwaltǝm yooligɔ gǝm. Mǝ mʊla jem lɛ jǝ́ bayǝlǝmɔ, jʊ a bwɨɨ jǝ́ ku jelʌn a dul nǝ bwɨla nɨ. Mǝ mʊla jem lɛ jǝ́ bɛtɔ dwalǝnɔ, jʊ a bwɨɨ jǝ́ nyǝm Tɛtɛ.

¹⁴ Mǝ mʊla jem lɛ jǝ́ tɛbɔ, jʊ a bwɨɨ jǝ́ nyǝm gǝn wo nǝn tɨkǝga a fwaltǝm yooligɔ gǝm. Mǝ mʊla jem lɛ jǝ́ bayǝlǝmɔ, jʊ a bwɨɨ jen nǝn kwaan, kɛl Kwaamaɨ yǝm a mʊgɔ jen, jǝ́ ku jelʌn a dul nǝ bwɨla nɨ gǝm.

Ka Jǝ́ Swɨ Lɛ Yooligɔ

¹⁵ Ka jǝ́ swɨ lɛ yooligɔ, jǝbɔ kanjǝl nɨ a mʊgɔ gǝnɨ. Nʊ nɨ swɨ yooligɔ lɛɨ, mɨ swɨ Tɛtɛ lɛ.

¹⁶ Kanjǝlɔ a mʊgɔ yooli nɨɨ nǝn gɔ wɛl bʊtɔ, jǝbɔ dǝlatǝm nu, jǝbɔ gungtǝm dul a jʊ nɨ gǝ nǝngǝnɨ. Kanjǝl nɨ a bɛ bɔ a daagɔ Tɛtɛ woi. A bɛ a yooli nɨ gǝm.

¹⁷ Yooligɔ shu shu jǝbɔ kanjǝl wɛl gǝnɔ. Nʊ nɨ a maa jʊ nɨ Kwaama swɨ lɛɨ, nya nya kʊlɨ nɨ mɨ dɨtǝm woi.

Nǝ Kii Kiristii

¹⁸ Jen jǝ́ bɛtɔ dwalǝnɔ, n jol dɨltǝm. Kanga jǝ́ nyʊwaɨ, nǝ kii Kiristii bɛ lɛ, kǝngkɔ nyɔ nǝb kiim Kiristii a lada nyɔ ja bɛ. N jʊ a bwɨ bǝ nyǝm lɛ jol dɨltǝmɔ a bɛɨ.

¹⁹ Ja jel a mʊgɔ bǝn sul, jǝ ke bɔ a bǝn. Na na jǝ na a bǝnɨ, na jǝ yǝm dakini jǝbɔ bǝn. Ja jel sǝ a nʊng jǝ ke bɔ a bǝn.

²⁰ A jenɔ Nǝ Sagsagɔ a gul jem bwiyel. Pʌd jenɔ jǝ́ nyǝm bɨlǝngkɛlɔ.

²¹ Mǝ mʊla jem lɛ a nʊng bɔ jǝ́ nyǝm bɔ bɨlǝngkɛl. Mɨ nyɔ. Mǝ mʊla jem jʊ a bwɨɨ jǝ́ nyǝm nyǝmɨ, jǝ́ nyǝm mɨ gabakɛl gǝ jel lɛ a mʊgɔ bɨlǝngkɛl.

²² Nuwo n nǝ gabakɛlɨ, na ke bɔ nʊ nɨ a kana gɔ Yesu nǝn Kiristii? Nʊ gɔ nǝn gɔ nǝ kii Kiristii, nʊ nɨ kana Tɛ bwɛ lɛ jǝbɔ Bwɛɨ.

²³ Mɨ nʊ nɨ wo kana Bwɛ lɛɨ, a nya Tɛ bwɛɨ. Nʊ nɨ a yo Bwɛɨ, a yo Tɛ bwɛ tǝgǝn.

²⁴ Jen, jʊ nɨ jǝ́ nyʊwa nǝn tɨkǝgaɨ, bɛ a yɨ a mʊgɔ jen. Na jǝ́ maa nyɨɨ, jen tʌjen jǝ́ yɨ yɨ a mʊgɔ Bwɛɨ jǝbɔ Tɛ bwɛ.

²⁵ Jʊ nɨ nǝn gɔ n swatǝm yaagɔ a maa bǝmɨ, n kʊlɨ nɨ mɨ dɨtǝm woi.

²⁶ Mǝ mʊla jem kanjǝl nɨ a dul nǝb nɨ swɨ lɛ a swag jeni.

²⁷ Kiristi a kwɛl a nǝ jen Yʊwa Kwaamaɨ wʊnɨ yǝm a mʊgɔ jeni. Mɨsɔ jǝ́ saa kaa nǝ mɛlalɨ lɛ, jʊ a bwɨɨ, Yʊwagɔ mɛla jem kanjǝlɔ lɛ gwam. Mɛlalɨ gǝnɔ n bɨlǝngǝn, ke bɔ gabakɛl. Bɛ jǝ́ yɨ a mʊgɔ Kiristii kanga a mɛla jemi.

Bɛtɔ Lɔ Kwaamaɨ

²⁸ Kǝngkɔ, jǝ́ bɛtɔ dwalǝnɔ, jǝ́ yɨ a mʊgɔ gǝn, sǝ na kwama nɨ a bɛɨ, a jǝla nǝn bǝn, mɨsɔ gunidulɔ yʊ bǝn nɛ a kǝga gǝn a kɔkɔ bɛtǝm gǝnɔ gǝm.

²⁹ Kanga jǝ́ nyǝm gǝn n nǝ dǝngdǝngɨ, mɨ nyǝmatǝm wo. Pʌd nʊ nɨ maa jʊ nɨ lɛ dǝngdǝngɨ, nǝn bʊla Kwaamaɨ.