1 Tasalonikaɨ 4 - Dadiya NT

Yɨm Nɨ Dǝngdǝng A Kǝga Kwaamaɨ

¹ A dɨltǝmɔ gǝmɨ kambɔ, nǝn kela jen nɛ, nǝn ga jem diil lɛ a kɛl Tɛlalɔ Yesui sʊwa lɛ gɔ, jǝ́ yɨ yɨm nɨ yɔ lɛ dǝngdǝng, jǝ́ fulo Kwaama gǝm nǝl, kanga jǝ́ mɛla a daa nǝn woi. Kanga jǝ́ maam lɛ kǝngkɨɨ, bɛ jǝ́ sʊtǝn maatǝmɔ nyɔ nǝn bɨlǝngǝn.

² Jǝ́ nyǝm diil nɨ nǝn nǝ jen nǝn fɔlɔn Tɛlalɔ Yesui.

³ Wʊnɨ nǝn gɔ n jǝlatǝm Kwaamaɨ gɔ, bɛ jǝ́ yɨ yɨm sagsag, jǝ́ kɨla yɨm bulonɔ.

⁴ Bɛ gwam jenɔ jǝ́ mɛla kanga jǝ́ tam dul jenɔ lɛ sagsag jǝbɔ nǝtǝm dʊʊnɨ,

⁵ ke bɔ a gola bulon kanga Bʌtʌbɔ gǝ maam lɛɨ, nǝb nɨ a nyǝm bɔ Kwaamaɨ.

⁶ A mʊgɔ jʊ nɨ ka nǝl ya maa lɛ kɨla gɔ gǝm bwɨlangkɛl, a ja mɨbam gǝnɔ. Jʊ a bwɨɨ Tɛlalɔ biyo gǝm biyo borang a dul kanjǝl nɨɨ, kanga nǝn sʊwa jen a tǝltǝmɨ, nǝn gʊ jem lɔlɨ.

⁷ Kwaama a jo bǝn bɔ sǝ bǝ yɨ yɨm nɨ mɨ sagsagɨɨ. A jo bǝn sǝ bǝ yɨ yɨm sagsag.

⁸ Gǝ na nyɔ, gwam nʊ nɨ a kɔ jǝlatǝm nǝn mɛlalɨ nɨɨ, n ke bɔ nǝl ga kɔɨ, nǝn Kwaama ga kɔɨ, gǝ nɨ nǝ jen Yʊwa gǝnɔ lɛɨ.

⁹ A kɛl dul swɨtǝm kambɨɨ, a yǝlam bɔ nyɔ nǝn mʊla jem mʊlaɨ, jʊ a bwɨɨ, jen nǝn kang jen Kwaama a mɛla jem gɔ bɛ jǝ́ swɨka.

¹⁰ N bɨlǝngǝn jǝ́ swɨ kambɔ gwam a tǝm Makidoniyaɨ. Nǝn kel jen nɛ kambɔ, jǝ́ sʊtǝn maatǝmɔ nǝn bɨlǝngǝn dangǝn.

¹¹ Jǝ́ sʊtǝn kwaan, jǝ́ yɨ yɨm kwamɨgǝn, jǝ́ fɛ jǝ́ dʌng kanjǝl nɨ a kǝga jeni, jǝ́ maa maajɨ nǝn kang jenɔ, kanga nǝn sʊwa jeni.

¹² Jǝ́ maa nyɔ sǝ nǝb nɨ ke bɔ nǝb bwangtǝmɨ ja nǝ jen dʊʊn. Ka jǝ́ ya lɛ nǝbɔ gǝm tuulo.

Bɛtǝm Tɛlalɔɨ

¹³ Kambɔ, nǝn swɨ bɔ jǝ́ yǝlam nǝb nɨ mɨ nǝn nyǝmtǝm a dul nǝb nɨ a bʊlalaɨ. Nǝn swɨ bɔ jǝ́ maa fitǝm nǝl kanga nǝb nɨ mɨ nǝn yatǝm nǝlɨ gǝ maa lɛɨ.

¹⁴ Kanga bǝ nǝ bɨlǝngkɛl bǝngɔ Yesu a bʊla, a guni, bǝ nǝ bɨlǝngkɛl bǝngɔ nǝbɔ a bʊla a bwangtǝm Yesui, Kwaama yǝla yǝla nǝn ji jǝbɔ gɔ.

¹⁵ Nǝn nǝ jen lɔl kɛl lɛ a sʊwatǝm Tɛlalɔɨ gɔ, bǝn nɨ a bǝla nǝn kʊlɨ, ba la nǝn di bɛtǝm Tɛlalɔɨ, mɨsɔ bǝ laa nǝb nɨ lɛ a bʊlaɨ guntǝm.

¹⁶ Jʊ a bwɨɨ Tɛlalɔ nǝn dul gǝn gǝla gǝla a dʌbʌl kwama nǝn jotǝm jangajǝng nǝn kwaan, jǝbɔ diil dalɨ bwɛ twama Kwaamaɨ jǝbɔ guutǝm jum Kwaamaɨ. Nǝb nɨ a bʊla a mʊgɔ Kiristii, nǝji jǝ tǝl guntǝmɔ lɛɨ.

¹⁷ A bwangtǝnɨ, bǝn nɨ a bǝla nǝn kʊlɨ a kwama gɨɨ, jǝ do bǝn do sǝ bǝ nya ji a mʊgɔ lul, sǝ bǝ tǝgaka jǝbɔ Tɛlalɔ a dʌbʌl kwama. A kwama gɔ bǝ yɨ dakini bǝnɔ Tɛlalɔ mɨ dɨltǝm wo.

¹⁸ Gǝ na nyɔ, bɛ ya jǝ́ kʊʊka nǝl lɛ nǝn kɛl nɨɨ.