1 Korinti 2 - Dadiya NT

Kiyotǝm Kɛl Kiristii Wʊnɨ Ja Kʊʊɨ

¹ Nǝn kwama mǝ bɛ a daa jen woi kambɔ, sǝ n sʊwa jen jʊ nɨ Kwaama a nʊng ɨɨ, mǝ bɛ bɔ nǝn daltɔ yʊlan jǝbɔ nyǝmtǝm sʊwatǝm kɛl.

² N kwɛl n do a nǝl mɨ kwama mǝ yǝm nǝbɔ jeni, mɨsɔ mǝ sʊwa kaa kɛl lɛ na ke bɔ a Yesu Kiristii, wʊnɨ ja kʊʊɨ.

³ Mǝ bɛ a daa jen woi nǝn gɨyatǝm jǝbɔ taal, jǝbɔ katǝm bʊtɔ kʌbkʌb.

⁴ Sʊwatǝm kɛl mǝndɨ jǝbɔ kiyotǝm fulon kɛl lǝmɨ mǝndɨ, a jelka bɔ kɛl nɔɔtǝm dul jǝbɔ yʊlan. Gǝ nʊng kwaan Yʊwa Kwaamaɨ,

⁵ kage jǝ́ nǝ bɨlǝngkɛl a yʊlan nǝbɨɨ, bɛ a yǝlam a kwaan Kwaamaɨ.

Yʊlan Kwaamaɨ

⁶ A dul kɛl nɨ, nǝ sʊwa yʊlanɔ wo a nǝb nɨ a kwam a kɛl Kwaamaɨ. Ke bɔ a yʊlan kal nɨ. Ke bɔ a nǝb fɔlɔn yooli nɨ, wʊnɨ shu lɛɨ.

⁷ Nǝn sʊwa kɛlɔ a yʊlan Kwaamaɨ nɨ a bwa bwaɨ, wʊnɨ galɨgǝn a yʊm yʊmɨ, yʊlan nɨ Kwaama a ya a kɛl dʊʊlǝn bǝnɨ, na lǝga bɔ a fwal yooligɨɨ.

⁸ A kʊm nǝb maatǝm fɔlɔn kal nɨ, mɨ nʊ nɨ wo a nyǝm fɛkalɨ nɨɨ. Na na ja nyǝm fɛkalɨ nɨɨ, na ja kʊʊ bɔ Tɛlalɔ, nǝ dʊʊlǝn.

⁹ Kanga a mʊla mʊlaɨ sʊwa lɛ gɔ, “Kanjǝl nɨ nugɔ a kuwo bɔ woi, lɔlɔ a nyʊwa bɔ woi, a dɔ bɔ mʊgɔ nǝl nǝlɨ woi, n kanjǝlɔ Kwaama a fɛka nǝb nɨ gǝm swɨ gǝn nɛɨ.”

¹⁰ Nǝbǝn Kwaama a nʊng bǝn a gola Yʊwaɨ, jʊ a bwɨɨ Yʊwagɔ nǝn gɔ saa kanjǝlɔ lɛ gwamɨ, jǝbɔ kanjǝl nɨ a tushi tushii a Kwaamaɨ.

¹¹ Nuwo a kʊm nǝbɨɨ a nyǝm bʊʊlalɨ kaa nǝlɨ, na ke bɔ yʊwa nʊgɨɨ? Gǝ na nyɔ tag, mɨ nʊ nɨ wo a nyǝm bʊʊlalɨ Kwaamaɨ, na ke bɔ Yʊwa Kwaamaɨ.

¹² A bǝnɔ ke bɔ yʊwa yooli bǝ nyaɨ, n Yʊwa wʊnɨ a bɛ a daagɔ Kwaama woi, sǝ bǝ fɛ bǝ nyǝm kanjǝlɔ Kwaama a nǝ bǝn nǝn kwanɨ.

¹³ Kɛl nɨ nǝ sʊwa lɛɨ, ke bɔ a yʊlan mɛlatǝm nǝfilii, n kɛlɔ Yʊwagɔ a nǝ nǝn gɔ nǝn sʊwaɨ. Nǝn nʊng kanjǝl na Yʊwa a nǝb nɨ nǝn Yʊwa Kwaamaɨ.

¹⁴ Nǝb nɨ mɨ nǝn Yʊwaɨ, jǝ kɔ kɔ kanjǝl Yʊwa Kwaamaɨ, jʊ a bwɨɨ n jǝ fʌmʌn a daa ji woi. Mɨsɔ jǝ dwal nyǝmtǝmɔ lɛ, jʊ a bwɨɨ n Yʊwa Kwaamaɨ gǝ fɛta ji lɛɨ.

¹⁵ Nʊ nɨ nǝn Yʊwaɨ, gǝ tɛl tɛl kanjǝlɔ gwam nǝn dʌmʌn. Gǝ nǝn kang gǝn mɨ nʊ nɨ gǝ tɛl gǝn nɛɨ.

¹⁶ “Nuwo a nyǝm bʊʊlalɨ Tɛlalɔɨ woi, la mɛla gǝm lɛɨ?” Bǝn, bʊʊlalɨ bǝnɔ na a Kiristii.