1 Korinti 14 - Dadiya NT

Nǝtǝm Lǝma Nyiyo Jǝbɔ Kuwotǝmkǝga

¹ Jǝ́ kwam tʌgo a swɨkanɔ gǝm. Jǝ́ ya kwaan a saatǝm kanjǝl nǝtǝm lǝma Yʊwa. Jǝ́ do kuwotǝmkǝgagɔ a laa ji.

² Nʊ nɨ sʊwa kɛl lɛ nǝn kaa nyiyoi, ke bɔ nǝb gǝ sʊwa kɛl lɛ jǝbɔ jii, gǝ sʊwa Kwaama. Mɨ nʊ nɨ wo a nyǝm jʊ gǝ sʊwa lɛɨ, jʊ a bwɨɨ n jʊ nɨ ja yʊ yʊɨ gǝ sʊwa lɛ a gola Yʊwa Kwaamaɨ.

³ Nʊ nɨ maa kuwotǝmkǝga lɛɨ, n nǝb gǝ sʊwa kɛl lɛ jǝbɔ jii, sǝ a nǝ ji kwaan, a kʊʊ jim nǝl, sǝ a nǝ ji kʊtǝm nǝl.

⁴ Nʊ nɨ gwam sʊwa kɛl lɛ nǝn kaa nyiyoi, gǝ fɛ dul gǝn. Nʊ nɨ maa kuwotǝmkǝga lɛɨ, gǝ fɛ mʊrkalɨ nǝb bwangtǝm Kwaamaɨ.

⁵ Mǝ swɨ lɛ gwam jenɔ jǝ́ sʊwa kɛl nǝn kaam nyiyo. Jʊ mǝ swɨ lɛ a laa jǝlɨ, jǝ́ maa kuwotǝmkǝga. Nʊ nɨ a maa kuwotǝmkǝgaɨ, a laa nʊ nɨ a sʊwa kɛl nǝn kaam nyiyoi. Na kaa nǝl fɛta fɛta nǝbɔ jʊ nɨ gǝ sʊwa lɛɨ, ga fɛ mʊrkalɨ nǝb bwangtǝm Kwaamaɨ.

⁶ Kambɔ, na n bɛ jem mǝ sʊwa kɛl lɛ nǝn kaam nyiyoi, n wɛ maa jem lɛɨ, na mǝ bɛ jem bɔ nǝn jʊ Kwaama a nʊng ɨɨ jǝbɔ nyǝmtǝm jǝbɔ kuwotǝmkǝga jǝbɔ mɛlalɨ kɛl Kwaamaɨ?

⁷ Na kanjǝl nɨ mɨ nǝn kʊlɨɨ, bǝ jwal jǝbɔ gǝlǝnggǝlǝng, diil jinɔ mɨ jel lɛ dangǝnɨ, maa nyǝn nǝl nyǝm jʊ lɛ jǝ guu lɛ jǝbɔ jʊ jǝ ga lɛɨ?

⁸ Na ja guu bɔ jumɔ nǝn diili, nuwo fɛka lɛ a jel kuni?

⁹ Gǝ na nyɔ a daa jen woi. Na jǝ́ sʊwa kɛl nǝn kaa nyiyo, a wʊnɨ ja nyǝm bɨɨ, maa nyǝn nǝl nyǝm jʊ lɛ jǝ́ sʊwa lɛɨ? Jǝ́ sʊwa kɛl nǝn kwan!

¹⁰ Bɨlǝngǝn nyiyotɨnɔ nǝn dʌmʌn a yooli nɨ, mɨ nʊ nɨ wo mɨ nǝn jʊ nʊng lɛɨ.

¹¹ Na mǝ nyʊwa bɔ nyiyo nǝlɨ, n yǝlam faabɨ a daa nʊ nɨ sʊwa ɨ kɛl lɛɨ. Nʊ nɨ sʊwa ɨ kɛl lɛɨ, a yǝlam faabɨ a daa mǝ woi.

¹² Gǝ na nyɔ a daa jen woi. Na nɨ jǝ́ saa nǝtǝm lǝma Yʊwagɨɨ, jǝ́ ya kwaan a fɛkalɨ mʊrkalɨ nǝb bwangtǝm Kwaamaɨ.

¹³ Nʊ nɨ sʊwa kɛl lɛ nǝn kaa nyiyoi, bɛ ga maa keli, Kwaama a nǝ gǝn lǝma fɛtatǝmɔ.

¹⁴ Na n maa keli nǝn kaa nyiyoi, n dʊʊmɨ mɨ maa keli lɛɨ, bʊʊlalɨ mǝndɨ a maa mɨ bɔ kaa jǝl.

¹⁵ Mǝ maa nyǝn? Mǝ maa keli nǝn dʊʊmɨ mɨ, mǝ maa nǝn bʊʊlalɨ mɨ tag. Mǝ ma nafɨ Kwaamaɨ nǝn dʊʊmɨ mɨ, mǝ ma nǝn bʊʊlalɨ mɨ tag.

¹⁶ Na mʊ bǝlá Kwaama nǝn dʊʊmɨ mʊnɔ kwaagɨɨ, maa nyǝn nʊ nɨ a nyǝm bɨɨ sʊwa lɛ gɔ, “A daa nyɔ,” a dul buutǝm kang nɨ mʊ maa lɛɨ, na a nyǝm bɔ jʊ nɨ mʊ sʊwa lɛɨ?

¹⁷ Ń buu Kwaama gǝm kang dangǝn sul, kɨla mɔ a sʊ bɔ nǝn kaa jǝl.

¹⁸ N buu Kwaama gǝm kang mǝ sʊwa kɛl lɛ nǝn kaam nyiyo a laa a jenɔ gwam.

¹⁹ A mʊrkalɨ nǝb bwangtǝm Kwaamaɨ, laa mɨ laa jǝl n sʊwa katɨgɔ nʊ wʊnɨ nǝbɔ nyǝm lɛɨ na n mɛla jimi, na mǝ sʊwa sʊwa kaamɨ katɨgɔ fʊlkʊblǝn kʊb nǝn kaa nyiyo nɨ ja nyǝm bɨɨ.

²⁰ Kambɔ, ka jǝ́ maa lɛ bʊʊlalɨ bɛtɨɨ. A daa shil, bɛ jǝ́ yǝlam na bɛtɔ fetʌn. A daa maatǝm bʊʊlalɨ, bɛ jǝ́ yǝlam na dʊʊm.

²¹ A mʊla mʊlaɨ a mʊgɔ diilɔ gǝm sʊwa lɛ gɔ, “Mǝ sʊwa sʊwa kɛl jǝbɔ nǝb nɨ a gola nǝb nɨ nǝngǝn nǝn nyiyo fɨɨ, jǝbɔ nyiyo faabǝmɨ, mɨsɔ jǝ nyʊwa ɨ lɛ tag, a sʊwatǝm Tɛlalɔɨ.”

²² Nyiyotɨnɔ n jǝ nʊngtǝm, ke bɔ a daa nǝb nǝtǝm bɨlǝngkɛlɔ woi, na a nǝb nɨ a nǝ bɔ bɨlǝngkɛlɨ. Kuwotǝmkǝga gɔ na a nǝb nǝtǝm bɨlǝngkɛlɨ, ke bɔ a nǝb nɨ a nǝ bɔ bɨlǝngkɛlɨ.

²³ Na mʊrkalɨ nǝb bwangtǝm Kwaamaɨ gwam a mʊrkaɨ, jǝ sʊwa kɛlɔ lɛ nyiyogɔ nǝn dʌmʌni, na kaam faabǝm, jǝbɔ nǝb nɨ ja nǝ bɔ bɨlǝngkɛlɨ ja dɔɨ, mɨsɔ jǝ sʊwa lɛ gɔ wabɨ twɛl jen nɛɨ ka?

²⁴ Na gwam jǝ́ maa kuwotǝmkǝga lɛɨ, kaa nʊ nɨ a nyǝm bɔ bɨlǝngkɛlɨ jǝbɔ nʊ nɨ a nyǝm bɔ jǝlɨ a dɔɨ, kɛl jenɔ dɔ gǝn dɔ a nyǝm gɔ gǝ nǝ bwɨlangkɛl, jǝ maa gǝm maa borang.

²⁵ Jʊ nɨ ga yʊ a nǝl gǝnɨ, jel jel a talɨ. Gǝla jʊng jʊng a bǝlá Kwaama, sʊwa lɛ gɔ, “Bɨlǝngǝn Kwaama gǝ na a kʊm jen.”

Jǝ́ Maa Bǝlátǝmɔ Kanga A Daa Tʌgoi

²⁶ Kambɔ bǝ maa jʊ nɨ nyǝn? Kwama jǝ́ mʊrka dakinii, kaa gǝ ma nafɨ bǝlátǝm Kwaamaɨ, kaa gǝ maa mɛlalɨ kɛl Kwaamaɨ, kaa gǝ sʊwa jʊ Kwaama a nʊng gǝnɨ, kaa gǝ sʊwa kɛl nǝn kaa nyiyo, kaa fɛtatǝm nyiyo. Bɛ jǝ́ maa kanjǝlɔ gwam sǝ a fɛ mʊrkalɨ nǝb bwangtǝm Kwaamaɨ.

²⁷ Na kaamɨ sʊwa sʊwa kɛl nǝn kaa nyiyoi, ka shu lɛ nǝbɔ yo, na lada bʊrɨ nǝbɔ taal. Ji tʌji na nʊ nɨ a sʊwaɨ, kaa a bwangtǝn a fɛta.

²⁸ Na mɨ nǝ fɛtatǝm woi, bɛ ja yɨ shig a mʊgɔ mʊrkalɨ nǝb bwangtǝm Kwaamaɨ, gǝ sʊwa dul gǝn jǝbɔ Kwaama.

²⁹ Nǝbkuwotǝmkǝgagɔ, nǝbɔ yo a yɔ nǝn a taal ja sʊwa kɛl, tangǝnɔ ja dʌng kɛl jinɔ.

³⁰ Na Kwaama a nʊng kaa nǝl win wʊnɨ yǝm yǝmɨ, nǝ tɨkǝga nɨ sʊwa kɛl lɛɨ, bɛ ga yɨ shig.

³¹ Gwam jenɔ jǝ́ maa maa kuwotǝmkǝga win win sǝ nǝbɔ a mɛla, ja nya kʊʊtǝm nǝl.

³² Yʊwa kuwotǝmkǝgagɔ gǝ na a daa nǝbkuwotǝmkǝgagɔ woi.

³³ Jʊ a bwɨɨ, Kwaama n ke bɔ Kwaama bwaalɨ, n Kwaama yɨm kwamɨgǝn. Kanga kaam mʊrkalɨ nǝb bwangtǝm Kwaamaɨ maa lɛɨ, bɛ jǝ́ maa nyɔ tʌjen.

³⁴ Bɛ nɔɔtǝmɔ a yɨ shig a mʊrkalɨtɨn nǝb bwangtǝm Kwaamaɨ, ja nǝ ji bɔ gola sʊwatǝm kɛl. Bɛ ja bwangtǝn nǝb dʊʊmɔ kanga diil Musaɨ a sʊwaɨ.

³⁵ Na kaa jǝl wo a wʊnɨ jǝ swɨ lɛ ja nyǝmɨ, bɛ ja bʌ batǝlam jinɔ a lɔ, jʊ a bwɨɨ n jǝ gunidul nɔɔlɨ a sʊwa kɛl a kʊm mʊrkalɨ nǝb bwangtǝm Kwaamaɨ.

³⁶ N dul jen kɛl Kwaamaɨ a tǝlɨ ka? N daa jen woi kɛl Kwaamaɨ a la kwaagɨɨ ka?

³⁷ Na kaa nǝl do dul gǝnɔ lɛ gɔ gǝ nǝkuwotǝmkǝgaɨ, na gǝ na nǝn nǝtǝm lǝma Yʊwaɨ, bɛ ga nyǝm, jʊ nɨ mǝ mʊla jem lɛɨ n diil a daagɔ Tɛlalɔ woi.

³⁸ Na a kɔ nyʊwatǝm jʊ nɨɨ, gǝ tǝgǝn mɨsɔ jǝ nyʊwa gǝn nɛ.

³⁹ Kambɔ, bɛ jǝ́ ya kwaan jenɔ a kuwotǝmkǝga. Ka jǝ́ kaa lɛ nǝ sʊwatǝm kɛl nǝn kaam nyiyo.

⁴⁰ Bɛ jǝ́ maa kanjǝlɔ gwam a gola nɨ a bʊmɨ, nǝn fɛkalɨ.