1 Korinti 12 - Dadiya NT

Nǝtǝm Lǝma Yʊwa Kwaamaɨ

¹ A kǝngkɔ kambɔ, a kɛl nǝtǝm lǝma Yʊwa Kwaamaɨ, mǝ swɨ bɔ jǝ́ lɛ nyǝmtǝm.

² Jǝ́ nyǝm kwamagɔ jǝ́ Bʌtʌbi, ja swag jen jǝ́ bwangtǝn shomtɨn, wʊnɨ mɨ nǝn nyiyoi.

³ A na nyɔ mǝ sʊwa jen nɛ, gɔ mɨ nǝn nʊ nɨ sʊwa kɛl lɛ nǝn Yʊwa Kwaamaɨ sǝ a sʊwa gɔ, “N lag Yesui!” Mɨ nǝn nʊ nɨ sʊwa lɛ gɔ, “Yesu nǝn Tɛlalɔɨ,” na ke bɔ a daagɔ kwaan Yʊwa Kwaamaɨ woi.

⁴ Nǝtǝm lǝmatɨn Yʊwagɔ nǝn dʌmʌn, Yʊwagɔ win.

⁵ Golantɨn maatǝm maajɨgɔ nǝn dʌmʌn, Tɛlalɔ win.

⁶ Maajɨgɔ wo nǝn dʌmʌn, nǝn Kwaama win nǝ ji kwaan maatǝm jinɔ lɛɨ

⁷ Kwaama a nǝ pʌd bǝnɔ win win lǝma Yʊwa gǝnɔ, sǝ bǝ tɨkaka nǝn.

⁸ A wini Kwaama a nǝ gǝn lǝma sʊwatǝm kɛl nǝn yʊlan a gola Yʊwa nɨ. A wini a nǝ gǝn lǝma sʊwatǝm kɛl nǝn nyǝmtǝm a gola Yʊwa nɨ tag.

⁹ A wini a nǝ gǝn lǝma na nǝtǝm bɨlǝngkɛl a gola Yʊwa nɨ tag. A wini a nǝ gǝn lǝma na gungtǝm nǝbɨɨ a gola Yʊwa nɨ.

¹⁰ A wini a nǝ gǝn lǝma na maatǝm jǝ laatǝm kang. A wini a nǝ gǝn lǝma na kuwotǝmkǝga. A wini a nǝ gǝn lǝma na nyǝmtǝm yʊwa nǝn dʌmʌn. A wini a nǝ gǝn lǝma na sʊwatǝm nyiyo nǝn dʌmʌn. A wini a nǝ gǝn lǝma na fɛtatǝm nyiyotɨn.

¹¹ Gwam jinɔ Yʊwagɔ win wʊnɨ maa maajɨ nɨ lɛɨ, nǝn gɔ tǝga ji lǝmagɔ lɛɨ, kanga ga swɨɨ.

Gwam Bǝ Jinʌn Bʊtɔgɔ Win

¹² Kanga bʊtɔgɔ win nǝngǝn nǝn jinʌnɔ a lada nyɨɨ, jinʌn nɨ gwam a lada nyɨɨ, bʊtɔgɔ win, gǝ na nyɔ a mʊrkalɨ nǝb bwangtǝm Kwaamaɨ gǝm, wʊnɨ nǝn gɔ n bʊtɔ Kiristii.

¹³ Yʊwagɔ win a yʊ bǝn mwɛ sagsagɔ gwamɨ, bǝ yǝlam bʊtɔgɔ win, Yahudawagɔ jǝbɔ nǝbɔ Girikaɨ, jwaalɛb jǝbɔ bɛtɨ. Gwam bǝnɔ Kwaama a nǝ bǝn Yʊwagɔ win wʊnɨ a mʊgɔ bǝnɨ.

¹⁴ Bʊtɔgɔ ke bɔ ji win, jinʌnɔ a lada nyɔ.

¹⁵ Na naagɔ a sʊwa gɔ, “A mɨ mǝ ke bɔ kang, mǝ ke bɔ ji bʊtɔ.” Sʊwatǝmɔ nyɨɨ, mɨsɔ wʊlaka gǝn nɛ a yɨm jinʌn bʊtɔ.

¹⁶ Na lɔlɔ a sʊwa gɔ, “A mɨ mǝ ke bɔ nu, mǝ ke bɔ ji bʊtɔ.” Sʊwatǝmɔ nyɨɨ, mɨsɔ wʊlaka gǝn nɛ a yɨm jinʌn bʊtɔ.

¹⁷ Na na bʊtɔgɔ gwam n nui, na jǝ́ nyʊwa nǝn wɛ? Na na bʊtɔgɔ gwam n lɔlɨ, na jǝ́ nyʊn jʊ nǝn wɛ?

¹⁸ N wɔ Kwaama a fɛka jinʌn bʊtɔgɔ gwam jinɔ kanga ga swɨɨ.

¹⁹ Na na bʊtɔgɔ gwam n ji wini, a yǝlam bɔ bʊtɔ.

²⁰ N wɔ jinʌnɔ a lada, bʊtɔgɔ win.

²¹ Mɨ gola wo nugɔ a sʊwa kangɔ gɔ, “Mɨ mwɛ mɨ wo jǝbɔ mɔ.” Mɨ gola wo dulɔ a sʊwa naagɔ gɔ, “Mɨ mwɛ mɨ wo jǝbɔ mɔ.”

²² Mɨ nyɔ, jinʌn bʊtɔ nɨ jǝ́ kuwo lɛ maamɔ a gɨya gɨyaɨ, nǝji ja laa kaamɨ.

²³ Jinʌn bʊtɔ nɨ jǝ́ kuwo lɛ maamɔ a la bɔ tangǝnɔ bʊmǝnɨ, bǝ fɛ bǝ nǝ ji dʊʊnɔ. Jinʌn nɨ a bʊm bɔ kuwotǝmɨ, bǝ fɛ bǝ sɔ ji.

²⁴ Jinʌn bǝnɔ nɨ a bʊm kuwotǝmɨ, mɨ jǝ maa jim kaa jǝl lɛ. Kwaama a mʊrka bʊtɔgɨɨ, nǝ dʊʊn nɛ a lada a jinʌn nɨ ja sogaɨ.

²⁵ Kwaama a maa nyɔ kage kɛl wʊlakatǝmɔ a dɔ bʊtɔ. Kwaama a maa nyɔ sǝ jinʌnɔ a dʌngko dʌngkotǝm nyan.

²⁶ Na jigɔ win a nyʊwa gaalanɨ, gwam jinʌnɔ a nyʊwa. Na ja bǝlá jigɔ wini, tangǝnɔ a maa fulotǝm nǝl.

²⁷ Jǝ́ bʊtɔ Kiristii, gwam jenɔ jǝ́ jinʌn gǝn.

²⁸ A mʊgɔ mʊrkalɨ nǝb bwangtǝm Kwaamaɨ, Kwaama a dǝg kaamɨ a yǝlam, na win, bɛtɔ twama, na yo, nǝbkuwotǝmkǝga, na taal, nǝb mɛlalɨ. Kaamɨ a nǝ ji lǝma na maatǝm jǝ laatǝm kang, kaamɨ a nǝ ji gungtǝm nǝb bɔɔlam, kaamɨ n nǝb tɨkalɨ, kaamɨ n nǝb nɨ yɔ lɛ nǝn mʊrkalɨ nǝb bwangtǝm Kwaamaɨ, kaamɨ n nǝbɔ sʊwa kɛl lɛ nǝn nyiyogɔ nǝn dʌmʌni.

²⁹ Gwam jinɔ n bɛtɔ twama ka? Gwam jinɔ n nǝbkuwotǝmkǝga ka? Gwam jinɔ n nǝb mɛlalɨ ka? Gwam jinɔ n nǝb maatǝm jǝ laatǝm kang ka?

³⁰ Gwam na jǝ nǝngǝn nǝn lǝma gungtǝm nǝb a bɔɔlaɨ ka? Gwam jinɔ na jǝ sʊwa kɛl lɛ nǝn nyiyontɨnɨ ka? Gwam na ja nǝ ji lǝma fɛtatǝm nyiyontɨnɨ ka?

³¹ Bɛ jǝ́ saa nǝtǝm lǝma nɨ a laa jii. Mǝ nʊng jen nʊng gola nɨ a laa jii.