1 Bitrus 5 - Dadiya NT

Jǝ́ Maa Tɔɔtǝm Kʌm Kwamɨ Kwaamaɨ

¹ Mǝ kel jen nɛ jǝ́ nǝb dʊʊm bwangtǝmɔ a kʊm jeni, mǝ nɨ mǝ nǝ dʊʊ bwangtǝm na jeni, nǝ kuwotǝm nɔɔtǝm gaalan Kiristii, nʊ nɨ mʊrka dul gǝnɔ lɛ a dʊʊlǝn nɨ Kwaama nǝ bǝn nɛɨ. Mǝ nǝn jʊ nɨ mǝ sʊwa jen nɛɨ.

² Bɛ jǝ́ tɔɔ kʌm kwamɨ Kwaamaɨ nɨ a kang jeni. Bɛ ka jǝ́ maa lɛ maamɔ ja dǝg jen nǝn kwaan. Bɛ jǝ́ maa a mʊgɔ jǝlatǝm, ke bɔ a kɛl kemʌn. Bɛ a yǝlam a swɨtǝm maatǝm.

³ Ka jǝ́ nʊng lɛ nǝb nɨ a kang jeni dʊʊlǝn. Bɛ jǝ́ yǝlam jǝ mɛlalɨ a kʌm kwamɨ nɨ.

⁴ Na Fɔlɔ Nǝ Tɔɔtǝm kwamɨ nɨ a bɛɨ, jǝ́ nya nya dwang dul dʊʊn nɨ mɨsɔ dumo lɛ woi.

⁵ Jǝ́ bayǝlǝmɔ, jǝ́ nǝ shigtǝm dul a nǝb dʊʊm bwangtǝmɔ gǝm. Pʌd jenɔ bɛ jǝ́ nǝbka shigtǝm dul, jʊ a bwɨɨ, “Kwaama maa kii lɛ jǝbɔ nǝb gungtǝm dulɔ, maa nǝb shigtǝm dulɔ gǝm lǝma lɛ.”

⁶ Bɛ jǝ́ shig dultɨn jenɔ a kǝga Kwaamaɨ, nǝ kwaanɔ, sǝ a gung jen a dʌbʌl nǝn di kɔkɔ dǝngdǝngɔ.

⁷ Bɛ jǝ́ tʊng komtǝm jenɔ a daa gǝ woi, jʊ a bwɨɨ, nǝn gɔ kɨla jen nɛɨ.

⁸ Bɛ jǝ́ ta dul jenɔ, jǝ́ yɨ nǝn fɛkalɨ. Nǝ kii jenɔ mammɔ kɛla lɛ na tulʌm nɨ yʊʊl lɛɨ, saa nʊ nɨ lɛ gǝ wo lɛɨ.

⁹ Bɛ jǝ́ kɔ gǝn, jǝ́ tɨ nǝn kwaan a nǝtǝm bɨlǝngkɛl jenɔ gǝm. Jǝ́ kwɛl jǝ́ nyǝm nyǝmɨ kɛtǝlam jenɔ a yooli nɨɨ pʌd, ja kwɛl ja ya jim yaɨ nɔɔtǝm gaalanɔ.

¹⁰ Na nǝn kwama nɨ jǝ́ nɔɔm gaalan nǝn dǝm nyɨɨ, Kwaama nǝ nǝtǝm lǝma pʌd, wʊnɨ a jo jen a gola Yesu Kiristii a yɔ nǝn a yɨm dʊʊn gǝnɔ jǝbɔ gɔ, mɨ dɨtǝm woi, nǝn gɔ dǝg jen nɛ jǝ́ yii dǝngdǝngɨ, nǝn gɔ fǝka jen nɛɨ, sǝ a sʊ jem kʊʊtǝm nǝl tag.

¹¹ Fɔlɔnɔ bɛ a ta tʌgo a daa gǝ woi gwanggwang mɨ dɨtǝm wo. A daa nyɔ.

Dɨltǝm Yaltǝmɔ

¹² N mʊla jem nǝn kʌb nyɔ nǝn tɨkalɨ Silaɨ, wʊnɨ a kuwotǝm mǝndɨ a la nyɔ jǝ jo gǝn nɛ gɔ kɛ nʊ nɨ a ta swatǝm yaa gǝnɨ. Mǝ mʊla sǝ n sʊ jem kwaan, sǝ n sʊwa jen a talɨ kanga jʊ nɨ mǝ mʊla a lǝma Kwaamaɨ n bɨlǝngǝn. A dul kɛl nɨɨ, bɛ jǝ́ tɨ nǝn kwaan a lǝma Kwaamaɨ.

¹³ Kɛtǝlam jenɔ, nǝb bwangtǝm nɨ a Babilaɨ, wʊnɨ ja jǝg jen dakinii, twam jem yaltǝm lɛ jǝbɔ bʊla mɨ Markus.

¹⁴ Bɛ jǝ́ yalka gwam a kʊm jen nǝn kwalkatǝm swɨkan. Bɛ yɨm kwamɨgǝnɔ a ta tʌgo gwanggwang a jen gǝm gwam, jen nɨ jǝ́ na a Kiristii.