1 Bitrus 4 - Dadiya NT

Yɨm Na Kwaamaɨ

¹ Kanga Kiristi a nɔɔ gaalan a bʊtɔɨ, jen tʌjen bɛ jǝ́ fɛka sǝ jǝ́ maa nyɔ, jʊ a bwɨɨ nʊ nɨ a nɔɔ gaalan a bʊtɔɨ, a bǝla maatǝm bwɨlangkɛlɔ.

² A kǝga nɨ, gǝ tagǝm tagǝm yɨm gǝnɔ na bʊtɔ, mɨsɔ gǝ bwangtǝn wɛl nǝl gǝnɔ lɛ, ga bwangtǝn jʊ nɨ Kwaama swɨ lɛɨ.

³ Jǝ́ kwɛl jǝ́ tɨla dangǝn a yɨm nɨ jǝ́ yɨ galɨgǝnɨ, wʊnɨ Bʌtʌbɔ swɨ maatǝm lɛɨ, a wʊlam nyɔ. Kanjǝl nɨ nǝn gɔ maatǝm bulon, jǝbɔ maatǝm wɛl, jǝbɔ yǝlatǝm dul, jǝbɔ nɔɔlatǝm jǝl ya maa jen nɛ, jǝbɔ jalatǝm kanjǝl bwɨlan nɨ a bʊm bɨɨ, jǝbɔ boga fʌl, jǝbɔ bwangtǝm bwɨlang shomtɨn.

⁴ A yǝlam fatǝlam jenɔ gǝm galɨgǝnɨ jǝ tatǝm kang a nyiyo gɔ, mɨ jǝ́ mʊrka dul lɛ jǝbɔ ji kǝngkɔ a maatǝm kanjǝl bwɨlantɨn. Jǝ tuwo jen nɛ.

⁵ Jǝ kiyo kiyo jʊtǝb nɨ ja maaɨ a kǝga Tɛlalɔɨ, wʊnɨ a fɛka fɛkaɨ sǝ a maa nǝbɔ gǝm nǝn kʊlɨɨ jǝbɔ nǝb nɨ a bʊlalaɨ gǝm borangɨ.

⁶ N jʊ a bwɨ ja kiyo fulon kɛl lǝmɨgɔ a nǝb nɨ gǝm mɨ nǝn kʊlɨɨ, nǝb nɨ ja biyo jim borang a mʊgɔ bʊtɔɨ, sǝ ja nya ja yɨ a mʊgɔ yʊwa, na Kwaama.

⁷ Dɨltǝm kanjǝlɔ gwam a dwama. A dul kɛl nɨɨ, jǝ́ yɨ nǝn fɛkalɨ, jǝ́ ta dul jenɔ sǝ jǝ́ dwal jǝ́ maa keli.

⁸ Jʊ a laa bʊmǝnɨ, bɛ jǝ́ maa swɨkatǝm a kʊm jen nǝn nǝlɔ win, jʊ a bwɨɨ, swɨkanɔ gǝ kǝlǝm kǝlǝm bwɨlangkɛl a lada.

⁹ Ya jǝ́ yobka lɛ a mʊgɔ lɔtɨn jenɔ gǝm, mɨ kʊngatǝm wo.

¹⁰ Kwaama a nǝ jen nǝtǝm win win. Bɛ ya jǝ́ tɨkaka lɛ nǝn, jǝ́ ta swatǝm yaa nɨ Kwaama a nǝ jen a mʊgɔ lǝma gǝnɨ.

¹¹ Pʌd nʊ nɨ nǝtǝm gǝnɔ n kiyotǝm kɛlɨ, bɛ ga kiyo kɛl Kwaamaɨ. Nʊ nɨ pʌd maa tɨkalɨ lɛɨ, bɛ ga maa nǝn kwaan nɨ Kwaama a nǝ gǝnɨ, sǝ a mʊgɔ kanjǝlɔ gǝm gwam jǝ́ dʊʊl Kwaama a gola Yesu Kiristii. Bɛ dʊʊlǝnɔ, jǝbɔ fɔlɔnɔ a ta tʌgo gwanggwang a daa gǝ woi mɨ dɨtǝm wo. A daa nyɔ!

Nɔɔtǝm Gaalan Nǝ Bwangtǝmɨ

¹² Fatǝm nyan mǝndɨ, ka jǝ́ ta lɛ kang a nyiyo a nɔɔtǝm gaalanɔ nya jen nɛ sǝ a tɛl jeni. Ka jǝ́ bʊʊla lɛ na kaa faabɨ jǝl bwɨ lɛ nǝn jeni.

¹³ Na jǝ́ nɔɔ gaalan na Kiristii, bɛ jǝ́ maa fulotǝm nǝl, sǝ na nǝn kwama a yǝla a bɛ a mʊgɔ dʊʊlǝn gǝnɨ, jǝ́ maa maa fulotǝm nǝl tag.

¹⁴ Na ja tuwo jen a kɛl dun Kiristii, bwiligɔ na a jen, jʊ a bwɨɨ Yʊwa dʊʊlǝnɔ, Yʊwa Kwaamaɨ, gǝ na jǝbɔ jen.

¹⁵ Na jǝ́ nɔɔ gaalanɨ, ka gaalan jenɔ ya yǝlam lɛ na mwɛl jʌtǝm dul, jǝbɔ kuul, jǝbɔ kaa maajɨ bwɨla, jǝbɔ dǝgtǝm nyiyo.

¹⁶ Na kaa nǝl a nɔɔ gaalan a kɛl dul gǝ nǝ bwangtǝm Kiristii, ka ga nyʊwa lɛ gunidul. Bɛ ga dʊʊl Kwaama a kɛl dun nɨɨ.

¹⁷ Kwamagɔ a la, jǝ tǝl maatǝm borangɔ a dul nǝb Kwaamaɨ. Na jǝ tǝl nǝn bǝnɨ, n wɛ bwɨ lɛ a dɨltǝmɔ gǝm a nǝb nɨ a kɔ bwangtǝm fulon kɛl lǝmɨ Kwaamaɨ?

¹⁸ Kanga a mʊla mʊlaɨ gɔ, “Na bwa bwa nʊ nɨ dǝngdǝngɨɨ a nya bʊʊtǝmɨ, n wɛ bwɨ lɛ nǝn nǝbɔ mɨ sagsagɨɨ jǝbɔ nǝb bwɨlangkɛlɨ?”

¹⁹ A kɛl dul jʊ nɨɨ, nǝb nɨ a nɔɔ gaalan a dul jʊ nɨ Kwaama swɨ lɛ a bwɨɨ, bɛ ja dǝg kʊlɨ jinɔ a daagɔ nǝ yiitǝm swatǝm yaa jinɔ woi, nǝ fwaltǝm jinɔ, ja ja kǝga nǝn maatǝm jʊ nɨ dǝngdǝngɨ.