1 Bitrus 3 - Dadiya NT

Batǝm Jǝbɔ Nɔɔtǝm

¹ Jǝ́ nɔɔtǝm naatǝmɔ, a dul kɛl nɨɨ, jǝ́ nǝ batǝlam jenɔ shigtǝm dul, sǝ na kaam batǝlam jenɔ nɨ mɨ bwangtǝn kɛl Kwaamaɨ lɛɨ, nɔɔtǝlam jinɔ a sʊwa ji bɔ kɛl Kwaamaɨ sul, shigtǝm dul jinɔ gʊ ji gʊ.

² Kuwotǝm yɨm sagsag jenɔ jǝbɔ shigtǝm dul jenɔ, n jʊ a gʊ jii.

³ Ka bʊmǝn jenɔ a yǝlam dʊʊl bʊtɔ na yooli, na mumtǝm dul jǝbɔ kanjǝl mʊn, jǝbɔ dwang bʊmǝntɨn nǝn kwan.

⁴ Bɛ bʊmǝn jenɔ a yǝlam a bʊʊlalɨ mʊgɔ nǝl. Bɛ dʊʊl jenɔ, jǝbɔ yʌbtǝm dul jenɔ, jǝbɔ lǝma nǝl jenɔ wʊnɨ mɨsɔ dumo lɛ woi a yǝlam jǝ yotǝm nyan a kǝga Kwaamaɨ.

⁵ Galɨgǝn nɔɔtǝm sagsag nɨ a ya nǝl jinɔ a daagɔ Kwaama woi, jǝ fɛ bʊtɔ jinɔ lɛ a bʊm. Jǝ shig dul jinɔ nyɔ a daagɔ batǝlam jinɔ woi,

⁶ kanga Saratu a nǝ shigtǝm dul a daagɔ Ibrahim woi, jo gǝn nɛ gɔ tɛlalɔ gɨɨ. Jen jǝ́ bɛtɔ lɔ gɨɨ, na jǝ́ maa maa jʊ nɨ dǝngdǝngɨ, na jǝ́ nyʊwa bɔ taalɨ.

⁷ Jǝ́ batǝmɔ tʌjen, jǝ́ yɨ yɨm nyan jǝbɔ nɔɔtǝlam jenɔ, jǝ́ nǝ ji dʊʊn, jʊ a bwɨɨ, jǝ fatǝm nɨ mɨ nǝn kwaanɨ. Jen jǝbɔ nɔɔtǝlam jenɔ jǝ́ yo lǝma Kwaamaɨ nɨ n kʊlɨɨ, jǝ́ maa nyɔ ka kaa jǝl a kal keli jenɔ.

Nɔɔtǝm Gaalan A Maatǝm Jǝ Nya

⁸ A dɨltǝmɔ gǝm, gwam jenɔ, jǝ́ yɨ yɨm mʊrkatǝm dul a kʊm jen. Jǝ́ yǝlam nǝb jikokatǝm bʊnǝn. Jǝ́ yǝlam nǝb swɨkatǝm, jǝbɔ nʊngtǝm nǝl lǝmǝn, jǝbɔ yʌbtǝm dul.

⁹ Ka jǝ́ ywa lɛ bwɨlan nǝn bwɨlan, tuwol nǝn tuwol. Bɛ jǝ́ dǝg jim bwili. N kɛl dul jʊ nɨ ja jo jen sǝ jǝ́ nya bwilii.

¹⁰ Jǝ́ maa jʊtǝb nɨ jʊ a bwɨɨ, a mʊla mʊlaɨ sʊwa lɛ gɔ, “Pʌd nʊ nɨ swɨ lɛ a nyʊwa lǝma yɨm gǝnɔ a yooli nɨɨ, bɛ ga ta ben gǝnɔ a sʊwalatǝm kɛl bwɨlan bɛ ga ta nyiyo gǝnɔ a sʊwalatǝm kɛl swagtǝm.

¹¹ Bɛ ga bǝla bwɨlanɔ, ga maa jǝ nya. Bɛ ga saa yɨm lǝma, ga ta gwanggwang.

¹² Nu Tɛlalɔɨ dʌng nǝb nɨ maa maajɨ lɛ dǝngdǝngɨ. Lɔl gǝnɔ nyʊwa kelitɨn jinɔ lɛ. Tɛlalɔ a jǝla bɔ nǝn nǝbɔ maa jǝ bwɨlan nɛɨ.”

¹³ Nuwo nyʊwa jem twɨla lɛɨ, na jǝ́ sʊtǝn kwaan maatǝm jʊ nɨ lɛ a bʊmɨ?

¹⁴ Na jǝ́ nɔɔ nɔɔ gaalan a dul maatǝm jʊ nɨ n dǝngdǝngɨ, jǝ́ nǝb bwilitɨn. “Ka jǝ́ nyʊwa lɛ taal jinɔ. Ka jǝ́ kom lɛ dul jenɔ.”

¹⁵ A mʊgɔ nǝl jen, jǝ́ nǝ Kiristi dʊʊn na Tɛlalɔ. Kwangkwang jǝ́ yɨ nǝn fɛkalɨ, jǝ́ sʊwa nǝb nɨ gwam a bʌ jen yatǝm nǝlɔ jǝ́ nǝnɨ. Bɛ jǝ́ sʊwa ji nǝn yʌbtǝm dul jǝbɔ nǝtǝm dʊʊn.

¹⁶ Ka jǝ́ maa lɛ jʊ nɨ bɛ jem lɛ nǝn guniduli, sǝ na ja tuwo jen a kɛl dul maatǝm jǝ nyan jenɔ a bwangtǝm Kiristii, jǝ nyʊwa nyʊwa gunidul.

¹⁷ Na n swɨtǝm Kwaamaɨ jǝ́ nɔɔ gaalanɨ, a bʊm nyɔ jǝ́ nɔɔ gaalan a dul maatǝm jǝ nya, a bʊm bɔ jǝ́ nɔɔ gaalan a dul maatǝm jʊ nɨ mɨ dǝngdǝngɨ.

¹⁸ A Kiristii a bʊla naa win swar, mɨ sʊtǝm wo, sǝ a tʊngǝm bwɨlangkɛltɨn bǝnɔ. Nǝ dǝngdǝngɔ a bʊla a kɛl dul nǝb nɨ ke bɔ nǝb dǝngdǝngɨ, sǝ a yɔ nǝn bǝn a daagɔ Kwaama woi. Ja jʌ gǝn a bʊtɔ, a gung gǝn a Yʊwa.

¹⁹ A mʊgɔ yʊwa tag a yɔ a daagɔ yʊwatɨn nɨ a mʊgɔ lɔsomii, a kiyo jimi.

²⁰ Nǝb nɨ galɨgǝn a bwangtǝn bɔ Kwaama a joltɨn Nuhui, Kwaama a kʊ nǝl nǝn ji nǝn kwama Nuhu swiyom tɨyamwɛng dʊʊnɔ lɛɨ. Nǝn kwama gɔ, nǝbɔ nǝn dǝm nyɔ a bʊʊɨ, nǝbɔ naalǝb a bʊʊ a gola mwɛɨ.

²¹ Mwɛ nɨ a nʊng yʊtǝm mwɛ sagsag, wʊnɨ a bʊʊ nǝn jen kǝngkɨɨ. Yʊtǝm mwɛ nɨ ke bɔ saaltǝm duto a bʊtɔ, n gola keli Kwaamaɨ nyangǝn sǝ a nǝ ji mʊgɔ nǝl nɨ mɨ gunidul woi. Yʊtǝm mwɛ nɨ nǝn gɔ a bʊʊ nǝn jen a gola guntǝm Yesu Kiristii a bwaaɨ.

²² Yesu Kiristi a shu a dʌbʌl, yǝm a kang jajǝng Kwaamaɨ, nǝn gɔ a dul bɛtɔ twama Kwaamaɨ jǝbɔ yʊwatɨn kwaanɔ jǝbɔ yʊwa dʊʊntɨnɔ.