1 Bitrus 2 - Dadiya NT

¹ A dul kɛl nɨɨ, jǝ́ bǝla maatǝm shilɔ wo, jǝbɔ swagkatǝmɔ, jǝbɔ maatǝm fento, jǝbɔ nungon, jǝbɔ tuwolkatǝmɔ gwam.

² Kanga bɛtɔ fetʌnɔ swɨ mwɛ yʊl lɛɨ, jen tʌjen bɛ jǝ́ swɨ kɛl Kwaamaɨ nyangǝn, sǝ jǝ́ dʊʊl nǝn, sǝ a yɔ nǝn jen a nyatǝm bʊʊtǝm.

³ Jʊ a bwɨ jǝ́ maa jʊ nɨɨ jǝ́ kwɛl jǝ́ twɨ twɨɨ lǝma Tɛlalɔɨ.

Tɛl Kʊlɨgɔ Jǝbɔ Dʊʊm Sagsagɔ

⁴ Bɛ jǝ́ bɛ a daa gǝ woi, wʊnɨ n tɛl kʊlɨɨ. Nǝn gɔ tɛl nɨ nǝbɔ a kɔɨ, wʊnɨ Kwaama a jǝgǝm gǝn n jǝ bʊmǝn nyan a daa gǝ woi.

⁵ Jen tʌjen jǝ́ na na tatǝn kʊlɨ. Bɛ Kwaama a mɔ jen na lɔ gǝnɔ nɨ nǝn yʊwaɨ, sǝ jǝ́ yǝlam nya nǝbkǝlam Kwaamaɨ sagsag, jǝ́ twɨtǝm yulʌn nyan, wʊnɨ Kwaama yo lɛɨ, a gola Yesu Kiristii.

⁶ A mʊgɔ mʊlalɨ kɛl Kwaamaɨ a sʊwa gɔ, “N wɔ n ya tɛl fʌlʌm kanɔ a Sihiyona, n jǝgǝm, n tɛl bʊmǝn nyan a daa mǝ woi. Pʌd nʊ nɨ nǝ bɨlǝngkɛl lɛ a daa gǝ woi, mɨsɔ nyʊwa gunidul lɛ.”

⁷ Kǝngkɔ jen nɨ jǝ́ nǝ bɨlǝngkɛlɨ, tɛl nɨ n jǝ nyan. A daagɔ nǝb nɨ a kɔ nǝtǝm bɨlǝngkɛlɨ, “Tɛl nɨ nǝb mɔtǝm kanɔ a kɔɨ, nǝn gɔ a yǝlam tɛl fʌlʌm kanɨ,”

⁸ nǝngɔ tag, “N tɛl nɨ dǝg nǝbɔ fǝtǝm naa lɛɨ, nǝn gɔ dǝg yalatǝm lɛɨ.” Ja maa fǝtǝm naa a kɛlɔ gǝm, jʊ a bwɨɨ ja kɔ bwangtǝm kɛl gǝnɔ. N jʊ a yǝlam jim nyɨɨ.

⁹ A jenɔ jǝ́ dʊʊm jǝgamtǝm, jǝbɔ nya nǝbkǝlam fɔlɔgɨɨ, jǝbɔ nǝbɔ sagsagɨɨ, jǝbɔ nǝbam Kwaamaɨ, sǝ jǝ́ kiyo maajɨ nya a nʊ nɨ a jo jeni nǝn kwama jen a kumtojilii, jǝ́ dɔ bǝlátǝm nyalǝm nyan gǝnɨ.

¹⁰ Galɨgǝn jǝ́ ke bɔ nǝbɔ wini, kǝngkɔ jǝ́ nǝbam Kwaamaɨ. Galɨgǝn jǝ́ yo bɔ bʊnatǝm gǝnɔ, kǝngkɔ jǝ́ yo bʊnatǝm gǝnɔ.

Jǝ́ Yɨ Yɨm Na Bɛtɔ Jwaalɛn Kwaamaɨ

¹¹ Fatǝm nyan mǝndɨ, jǝ́ faabǝm, jǝ́ Bʌtʌb a yooli nɨ. Mǝ kela jen nɛ, jǝ́ bǝla swɨtǝm bʊʊlalɨ mʊgɔ nǝl nǝfilii wo, wʊnɨ ta kun nɛ jǝbɔ nǝl jeni.

¹² Bɛ jǝ́ yɨ yɨm nyan a kʊm Bʌtʌbiɨ, sǝ na jǝ tuwo jen nɛɨ gɔ jǝ́ nǝb bwɨlamɨ, jǝ kuwo kuwo maajɨ nyantɨn jenɔ, jǝ dʊʊl dʊʊl Kwaama nǝn kum nɨ bɛm lɛɨ.

¹³ A kɛl dul Tɛlalɔɨ, jǝ́ nǝ shigtǝm dul a daagɔ nǝb maatǝm borangɔ woi gwam. Jǝ́ nǝ shigtǝm dul a daa fɔlɔ dʊʊnɔ woi,

¹⁴ jǝbɔ daagɔ gwamnatɨnɔ woi, wʊnɨ n nǝbɔ fɔlɔgɔ a twam ji sǝ ja mwɛ nǝb nɨ a maa bɔ dǝngdǝngɨ, sǝ ja wana nǝb nɨ a maa dǝngdǝngɨ.

¹⁵ N jǝlatǝm Kwaamaɨ a gola maatǝm jǝ nya, jǝ́ mǝlǝm gola nǝb nɨ a swɛla swɛlaɨ.

¹⁶ Bɛ jǝ́ maa yɨm nyatǝm dul. Ka jǝ́ do lɛ nyatǝm dulɔ a yǝlam jem jǝ maatǝm shil. Bɛ jǝ́ yɨ yɨm jwaalɛb Kwaamaɨ.

¹⁷ Bɛ jǝ́ nɨ nǝbɔ pʌd dʊʊn. Jǝ́ swɨ kɛtǝlam nǝb bwangtǝmɔ. Jǝ́ nyʊwa taal Kwaamaɨ. Jǝ́ nǝ fɔlɔgɔ dʊʊn.

Mɛlalɨ Nǝn Nɔɔtǝm Gaalan Kiristii

¹⁸ Jǝ́ jwaalɛbɔ, bɛ jǝ́ nǝ shigtǝm dul a tɛlalɔtɨn jenɔ gǝm nǝn nǝtǝm dʊʊn nyangǝn. Ka jǝ́ nǝ lɛ shigtǝm dul a nǝb nɨ gǝm nǝlɔ a yʌb yʌbi kwaaji, jǝ́ nǝ shigtǝm dul a nǝb nɨ gǝm nǝlɔ a shilo shiloi tʌji.

¹⁹ Nʊ nɨ a nɔɔ gaalan a dul jʊ nɨ ga maa bɨɨ, na ga nɔɔ a dul bʊʊlalɨ kɛl Kwaamaɨ, n jǝ bǝlátǝm.

²⁰ Jǝ maatǝm lɨyalɔ n fee na jǝ́ kʊ nǝl nǝn bʊgǝnɔ jǝ́ nya a dul bwɨlangkɛl nɨ jǝ́ maaɨ? Na jǝ́ maa maajɨ nyan, jǝ́ nɔɔ gaalanɔ a dul gǝnɨ, jǝ́ kʊ nǝl tagɨ, nǝn gɔ n jǝ yotǝm a daagɔ Kwaama woi.

²¹ Kwaama a jo jen sǝ jǝ́ nɔɔ gaalan, jʊ a bwɨɨ Kiristi a nɔɔ gaalan a kɛl dul jen. A bǝla jem mɛlalɨ nɨ sǝ jǝ́ bwangtǝn.

²² “A maa bɔ bwɨlangkɛl wo dǝm. Ja nyʊwa bɔ swagtǝm a nyiyo gǝn.”

²³ Nǝn kwama ja tuwo gǝnɨ, a yǝla bɔ a tuwo ji. Nǝn kwama a nɔɔ gaalan tagɨ, a wum bɔ nyiyo. A ya nǝl a daagɔ nǝ maatǝm borang dǝngdǝngɔ woi.

²⁴ Gǝ nǝn dul gǝn a dem bwɨlangkɛltɨn bǝnɔ a bʊtɔ gǝn a dʌbʌl tɨya kʊʊtǝm, sǝ bǝ yɨ yɨm bǝnɔ bʌlʌn a bwɨlangkɛl, nyatǝm kʊlɨ tag a dǝngdǝng. N kɛl dul dɛɛbǝl gǝnɔ ja gung jeni.

²⁵ Galɨgǝn, jǝ́ lɛla lɛlaɨ na kwamɨtɨn. Kǝngkɔ jǝ́ yǝla jǝ́ bɛ a daagɔ Nǝ tɔɔtǝmɔ woi, nʊ nɨ kɨla kʊlɨtɨn jenɔ lɛɨ.