Zefania 2 - BAIBLO ALOO NGMAMI KLƆUKLƆU Ɔ

Tsui tsakemi

¹ Nyɛ ma nɛ zo be nyɛ hɛ mi, nyɛ bua nyɛ he nya nɛ nyɛɛ pee juɛmi,

² nɛ nyɛ ko ba ngla nɛ nyɛ gbo kaa dwɔmi nɛ Yawɛ mi mi fumi ɔ nɛ ba nyɛ nɔ, nɛ ligbi ɔ nɛ Yawɛ mi mi ma fu nyɛ ɔ nɛ e su.

³ Nyɛ nihi tsuo nɛ nyɛ ngɛ je ɔ mi, nɛ nyɛ baa nyɛ he si, nɛ nyɛ yeɔ Yawɛ mlaa amɛ a nɔ, nyɛ hla e se blɔ. Nyɛɛ pee nɔ́ nɛ da, nɛ nyɛɛ ba nyɛ he si; alini, ligbi ɔ nɛ Yawɛ mi mi ma fu wawɛɛ, nɛ e maa gbla nihi a tue ɔ, nyɛɛ lɛɛ a maa laa nyɛ nɔ.

Yawɛ maa gbla je mahi nɛ bɔle Israel ɔ a tue

⁴ Nɔ ko nɔ ko be piɛe ngɛ Gaza ma a mi. Ashkelon ma a maa pee ma doku. Piani katakata a, a maa fie Ashdod bi ɔmɛ kpatakpata kɛ maa je a ma a mi. Ekron ma a hu, a maa pee lɛ butuu.

⁵ Nyɛ Filisti bi nɛ nyɛ ngɛ wo nya, kɛ nyɛ ni nɛmɛ nɛ nyɛ ngɛ Kanaan zugba a nɔ, musu tloo nyɛ! Yawɛ bu nyɛ hu fɔ. Yawɛ ma kpata nyɛ hɛ mi, nɛ nyɛ ti nɔ kake ngmelu po he be mi jee.

⁶ Nyɛ zugba a nɛ ngɛ wo ɔ nya a ma plɛ pee lohwe lɛmi he, nɛ a maa ma tsuhi ngɛ nɔ kɛ ha to hyɛli kɛ a tohi.

⁷ Yuda wɛtso ɔ mi nihi bɔɔ nɛ a yi ma na wami ɔ, nyɛ zugba a nɔ lejɛ ɔ ji he nɛ a maa hi. A maa lɛ a lohwe ɔmɛ ngɛ lejɛ ɔ, nɛ a ma ya hwɔ we ɔmɛ a mi ngɛ Ashkelon. Yawɛ, a Mawu ɔ kɛ mɛ maa hi si, nɛ e ma ha nɛ a maa bɔ ekohu.

⁸ Yawɛ Tabohiatsɛ ɔ ke, “Jɛmi nɛ Moab bi ɔmɛ kɛ Amon bi ɔmɛ ngɛ ye ma a jɛe, ahlua nɛ a ngɛ mɛ bɔe, kɛ a he nɔ nɛ a ngɛ woe nɛ a ngɛ dee ke a ma kpɔ a zugba a, i nu.

⁹ Lɔ ɔ he ɔ, ligbi abɔ nɛ imi, Yawɛ Israel Mawu ɔ, ye hɛ ngɛ ɔ, i ngɛ kita kae ke ja a kpata Moab kɛ Amon ma amɛ a hɛ mi kaa bɔ nɛ a pee Sodom kɛ Gomora a. Moab kɛ Amon maa pee ma dokuhi; ma amɛ a mi maa hɛ kɛ hu, nɛ zugba a maa pee kaa nɔ́ nɛ a kɛ ngo pue lejɛ ɔ. Ye ma mi bi ɔmɛ nɛ a yi ma na wami ɔ maa ha a níhi, nɛ a maa ngɔ a zugba a.”

¹⁰ Tue gblami nɛ Moab bi ɔmɛ kɛ Amon bi ɔmɛ ma na ji nɛ ɔ nɛ; ejakaa a wo a he nɔ, nɛ a bɔ Yawɛ Tabohiatsɛ ɔ ma a ahlua.

¹¹ Yawɛ hɛ maa dɔ kɛ wo mɛ. Yawɛ ma kpata wɔ ɔmɛ tsuo a hɛ mi ngɛ zugba a nɔ, nɛ je ma amɛ, wo kpo ɔ, kɛ zugbahi nɛ wo bɔle mɛ ɔ tsuo ma ja lɛ, nɔ tsuaa nɔ ngɛ lɛ nitsɛ e zugba nɔ.

¹² Sudan bi ɔmɛ hu, Yawɛ kɛ klaate maa gbe mɛ.

¹³ Yawɛ maa gbla omleyi je ma amɛ a tue. E ma kpata Asiria hɛ mi, nɛ Asiria ma nguaa a nɛ a tsɛɛ Nineve ɔ maa pee ma doku kaa nga kplanaa nɔ.

¹⁴ Nineve ma plɛ pee tohi kɛ pu mi lohwe slɔɔtoslɔɔtohi a hi he. Ablɛgogoe maa pee muɔ ngɛ lejɛ ɔ. Okpoku kɛ klomi maa hi hwɔe kɛ je saflɛ mi ngɛ mɔ kokoe ɔmɛ a nɔ, nɛ kuakualabite maa hi pɛe kuaakuaa ngɛ sinya tso ɔmɛ a yi mi. Seda ma kpɔ ngɛ tso ɔmɛ a he.

¹⁵ Ma nɛ e mi bi woɔ a he nɔ, nɛ a fĩaa ngɔ fɔɔ mɛ nitsɛmɛ a he wami nɔ, nɛ a deɔ a he ke ma ko be nɛ kɛ mɛ sɔ ɔ, nɔ́ nɛ maa ba jamɛ a ma a nɔ ji nɛ ɔ nɛ. Nineve maa pee ma doku, nɛ pu mi lohwehi ma ba jɔɔ a he ngɛ lejɛ ɔ. Nɔ tsuaa nɔ nɛ ma ba be ngɛ lejɛ ɔ, ma huanya e yi, nɛ e ma de ke, “Tsia!”