Zefania 1 - BAIBLO ALOO NGMAMI KLƆUKLƆU Ɔ

¹ Sɛ gbi nɛ Yawɛ ngɔ kɛ ha Zefania, be mi nɛ Amon bi Yosia ngɛ matsɛ yee ngɛ Yuda ma a nɔ ji nɛ ɔ nɛ. Zefania tsɛ ji Kush, nɛ e nɛmɛ ji Gedalia, Amaria, kɛ Hezekia.

Yawɛ tue gblami ligbi ɔ

² Yawɛ ke, “Ma kpata nɔ́ tsuaa nɔ́ hɛ mi ngɛ je ɔ mi:

³ nimli adesahi, pu mi lohwehi, lohwe pɛlitsɛmɛ, lohi, kɛ yiwutsotsɛmɛ tsuo pɛpɛɛpɛ. Ma kpata nimli adesahi tsuo kulaa a hɛ mi, nɛ nɔ kake ngmelu po be piɛe. Imi, Yawɛ lɛ i de.

⁴ “Ma gbla nihi nɛ ngɛ Yerusalem ma a mi, kɛ Yuda zugba a nɔ tsuo a tue. Baal jali nɛ piɛ ɔ, ma kpata mɛ tsuo a hɛ mi, nɛ nɔ ko nɔ ko be Baal wɔnɔ ɔmɛ kaie hu.

⁵ Nɔ tsuaa nɔ nɛ kuɔɔ kɛ yaa tsu yi mi, nɛ e ya jaa pu, loo nyɔhiɔ, loo dodoe ɔ, ma kpata e hɛ mi. Nihi nɛ a jaa imi Yawɛ, nɛ a woɔ si ke a maa nyɛɛ ye se, se a kɛ mawu ɔ nɛ a tsɛɛ Milkom ɔ biɛ kaa kita a, mɛ hu ma kpata a hɛ mi.

⁶ Jehanɛ, ma kpata nimli nɛ ɔmɛ hu a hɛ mi: ni nɛmɛ nɛ kpale kɛ je ye se, nɛ a nyɛɛ we ye se hu; ni nɛmɛ nɛ bɛ ye ngɔ, loo a ba bi we mi ga womi.”

⁷ Ligbi ɔ nɛ Yawɛ maa gbla ma a tue ɔ su ta. Lɔ ɔ he ɔ, nyɛɛ pee dii ngɛ e hɛ mi. Yawɛ miɔ nɛ e maa gu Yuda he nyɛli ɔmɛ a nɔ nɛ e kɛ kpata Yuda ma a hɛ mi, kaa bɔ nɛ a gbeɔ lohwehi kɛ sãã bɔ ɔ.

⁸ Yawɛ ke, “Jamɛ a ligbi ɔ, ma gbla ma tsɔli ɔmɛ, matsɛbimɛ ɔmɛ, kɛ nihi nɛ peeɔ ma se kusumi níhi tsuo kulaa a tue.

⁹ Nihi nɛ tuɔ kɛ haneɔ kpoku, kaa bɔ nɛ wɔ jali peeɔ, ni nɛmɛ nɛ juɔ, kɛ ni nɛmɛ nɛ gbeɔ nihi nɛ a kpɔɔ níhi ngɛ a dɛ kɛ ba woɔ a mawu jami he ɔ, ma gbla mɛ tsuo kulaa a tue.

¹⁰ “Jamɛ a ligbi ɔ, a maa wo yana ngɛ Lo Agbo ɔ nya ngɛ Yerusalem; a ma nya awe ngɛ Yerusalem ma he ɔ mi, nɛ a ma he ose ngɛ yoku ɔmɛ a nɔ.

¹¹ Nyɛ nihi nɛ nyɛ ngɛ Yerusalem dɔ ɔ si je ɔ, ke nyɛ nu ní nɛ ɔmɛ a he ɔ, nyɛɛ wo yana nɛ nyɛ nya awe. Ejakaa nyɛ jua yeli ɔmɛ tsuo a yi ta!

¹² “Jamɛ a ligbi ɔ, ma su kane kɛ kpa Yerusalem. Nɛ nihi nɛ hii si ngɛ a he yayami mi, nɛ nɔ́ ko pue we a tsui nɔ ɔ, ma ya hla a se blɔ, nɛ ma gbla a tue. Nimli nɛ ɔmɛ deɔ a he ke, ‘Oo, Yawɛ tsa be wɔ nɔ́ ko pee.’

¹³ A maa ha a níhi, nɛ a we ɔmɛ maa pee we dokuhi. Wehi nɛ a ngɛ poe ɔ, a be a mi hie, nɛ wai ngmɔhi nɛ a ngɛ hue ɔ, a be a mi dã nue.”

¹⁴ Jamɛ a ligbi nguaa a nɛ Yawɛ maa gbla e ma a tue ɔ ma kɛ fo; e su si ta! E maa pee aywilɛho ligbi, ejakaa ta buli katsɛmɛ po a hɛ maa dɔ, nɛ a ma fo ya boboobo.

¹⁵ Jamɛ a ligbi ɔ, Mawu mi mi ma fu wawɛɛ nitsɛ; nihi a yi ma fi, nɛ a maa hao; a ma kpata níhi a hɛ mi basabasa; bɔku yumu tslitsliitsli maa wo, nɛ je ɔ mi maa pee tuu.

¹⁶ Jamɛ a ligbi ɔ, ta titimatihi maa pɛ, nɛ ta buli ma he ose, nɛ a ma ba tua mahi nɛ a fia gbogbo kɛ wo a he, kɛ mɔ gagaagahi.

¹⁷ Yawɛ ke, “Jamɛ a ligbi ɔ, i kɛ haomi nɛ nya wa maa ba nimli adesahi a nɔ, nɛ a maa hi si tataae kɛ hi bee kaa hɛ yuyuili. A pee yayami kɛ si imi Yawɛ, lɔ ɔ he ɔ, a ma kpa a muɔ ngɔ pue si kaa nyu, nɛ a gbogboe ɔmɛ maa sa ngɛ zugba.”

¹⁸ Ligbi ɔ nɛ Yawɛ ma je e mi mi fumi ɔ kpo ɔ, nɔ́ ko nɔ́ ko be nyɛe ma he ma a yi wami: sika hiɔ jio, sika tsu jio. E kɛ e mi mi fumi ɔ ma kpata je ɔ tsuo hɛ mi kaa bɔ nɛ la sãã nɔ́ ɔ. E maa gbe níhi tsuo ngɛ je ɔ mi si kake too.