Zakaria 8 - BAIBLO ALOO NGMAMI KLƆUKLƆU Ɔ

Yawɛ wo si kaa e ma wo Yerusalem kɛ ma si ekohu

¹ Yawɛ Tabohiatsɛ ɔ ha Zakaria sɛ gbi nɛ ɔ ke,

² “I suɔ Zion sane wawɛɛ nitsɛ. Ye suɔmi ɔ ha ye mi mi ngɛ mi sããe ngɛ e he.

³ Ma kpale kɛ ba Zion, nɛ ma ba hi Yerusalem. Jehanɛ lɛɛ a ma tsɛ ma a ke ma nɛ yeɔ anɔkuale; nɛ a ma tsɛ Yawɛ Tabohiatsɛ yo ɔ ke yo klɔuklɔu.

⁴ Nimowi, kɛ yimowi nɛ bwɔ kotokoto kɛ a dɛ mi dɛma tso maa hi gbɛjegbɛ ɔmɛ a nɔ.

⁵ Nɛ gbɛjegbɛ ɔmɛ a nɔ tsuo ma hyi tɔ kɛ nyumuwi, kɛ yiwi nɛ ngɛ fiɛe!

⁶ “Ke e he maa wa ha nihi nɛ piɛ ngɛ ma a mi be nɛ ɔ mi kaa ní nɛ ɔmɛ ma nyɛ ba ma a mi ɔ, anɛ imi hu e he maa wa ha mi lo?

⁷ Yawɛ Tabohiatsɛ ɔ ke ma ya kpɔ ye ma a kɛ je beleku je, kɛ bonyoku je ma amɛ a mi.

⁸ Ma ya kpale mɛ kɛ ba Yerusalem, nɛ a maa pee ye ma, nɛ imi hu ma pee a Mawu. Ma ye mɛ anɔkuale, nɛ ma pee nɔ́ nɛ da.”

⁹ Yawɛ Tabohiatsɛ ɔ ke, “Munyuhi nɛ gbali ɔmɛ tu nyɛ benɛ nyɛ ngɛ ye we ɔ sisi tomi ɔ fiae ekohu ɔ, lɔ ɔmɛ nɔuu nyɛ ngɛ nue nɛ ɔ nɛ. Lɔ ɔ he ɔ, nyɛ wlua nyɛ kɛ tsu ní ɔ.

¹⁰ Benɛ jamɛ a be ɔ na we nɛ e su ɔ, nɔ ko nɔ ko nyɛ we nɛ e bɔ nɔmlɔ, loo lohwe apaa kɛ tsu ní. Nɔ ko nɔ ko nyɛ we nɛ e je kpo ya tsu nɔ́ ko, ejakaa he nyɛli ha we nɔ he jɔmi kulaa. I ha nɛ nɔ tsuaa nɔ te si kɛ wo e nyɛmi.

¹¹ Se amlɔ nɛ ɔ lɛɛ nihi nɛ piɛ ngɛ ma a mi ɔ, i kɛ mɛ be ní toe hu kaa sa a. Yawɛ Tabohiatsɛ ɔ lɛ de.

¹² Ma ha tue mi jɔmi maa ba zugba a tsuo nɔ. Hiɔmi maa nɛ; zugba a maa ba ní, nɛ wai tso ɔmɛ maa wo yiblii. Ma ngɔ ní nɛ ɔmɛ tsuo kɛ ha nihi nɛ maa piɛ ngɛ zugba a nɔ.

¹³ Nyɛ Yuda bi, kɛ Israel bi, sa a, nyɛ ngɛ kaa gbiɛmi kɛ ha je ma amɛ, se jehanɛ lɛɛ ma he nyɛ yi wami, nɛ nyɛ maa pee gbaami. Lɔ ɔ he ɔ, nyɛ wlua nyɛ; nɛ nyɛ ko ye gbeye!”

¹⁴ Bɔ nɛ Yawɛ Tabohiatsɛ ɔ de ji nɛ ɔ nɛ: “Benɛ nyɛ nɛmɛ ɔmɛ wo ye mi mi la a, i kpata nyɛ hɛ mi kaa bɔ nɛ i to ye yi mi ɔ, nɛ mɔbɔ nami ko kulaa be mi.

¹⁵ Jã kɛ̃, amlɔ nɛ ɔ, kpakpa nɛ i to kaa ma pee ekohu ji kaa ma gbaa Yerusalem kɛ Yuda tsuo. Lɔ ɔ he ɔ, nyɛ ko ye gbeye.

¹⁶ Níhi nɛ sa kaa nyɛɛ pee ji nɛ ɔmɛ: nyɛɛ ye nyɛ sibi anɔkuale; nyɛɛ kɛ juɛmi kpakpa nɛ ye dami sane ngɛ nyɛ kojomi he ɔmɛ, konɛ tue mi jɔmi nɛ ba.

¹⁷ Nyɛ ko so nyɛ sibi a yi nɔ. Nyɛ ko kã lakpa kita. I nyɛɛ ní nɛ ɔmɛ. Yawɛ lɛ de.”

¹⁸ Yawɛ Tabohiatsɛ ɔ ha Zakaria sɛ gbi ekohu ke,

¹⁹ “Nyɔhiɔ eywiɛne, enuɔne, kpaagone, kɛ nyɔngmane ɔ nɛ nyɛ haa hwɔ ngɛ a mi ɔ, a ma ba pee bua jɔmi, ní yemi kɛ nyami be ha Yuda ma a. Enɛ ɔ he ɔ, nyɛɛ suɔ anɔkuale, kɛ tue mi jɔmi.”

²⁰ Yawɛ Tabohiatsɛ ɔ ke, “Be ma nɛ nihi maa je ma slɔɔtohi babauu a mi kɛ ba.

²¹ Ma kake mi bi ma ya na ma kpa mi bi nɛ a ma de mɛ ke, ‘Wa yaa nɛ wa ya ja Yawɛ Tabohiatsɛ ɔ. Wa yaa nɛ wa ya kpa lɛ pɛɛ nɛ e gbaa wɔ. Nyɛɛ ba nɛ waa ho!’

²² Nihi babauu maa je ma nguanguahi a mi kɛ ba Yerusalem ba ja Yawɛ Tabohiatsɛ ɔ, nɛ a ma kpa lɛ pɛɛ ke e gbaa mɛ.

²³ Jamɛ a be ɔ, nibwɔhi maa je ma slɔɔtohi a mi kɛ ba Yuda; ni nyɔngma ma ba nu Yuda no kake nɛ a maa pɛtɛ e tade he, nɛ a ma de lɛ ke, ‘Waa kɛ mo maa ya, ejakaa wa nu kaa Mawu kɛ nyɛ ngɛ.’ ”