Zakaria 7 - BAIBLO ALOO NGMAMI KLƆUKLƆU Ɔ

Yawɛ bu ma a fɔ kaa a yi anɔkuale ngɛ ngma hiɔmi mi

¹ Matsɛ Darius yi nɔ jeha nɛ ji eywiɛ ɔ, nyɔhiɔ nɛɛne nɛ a tsɛɛ Kislev ɔ we ligbi eywiɛne ɔ, Yawɛ ha mi sɛ gbi ko.

² Betel bi tsɔ Sharezer, kɛ Regemelek, kɛ a we bi ke a ya Yawɛ Tabohiatsɛ ɔ ngɔ, nɛ a ya fa kue ha lɛ, konɛ e gbaa mɛ.

³ Jehanɛ, á bi osɔfo ɔmɛ, kɛ gbali ɔmɛ munyu ke, “Jeha babauu nɛ be ɔ, kɔmɔ nɛ wa yeɔ nɛ wa haa hwɔ nyɔhiɔ enuɔne ɔ, anɛ waa ya nɔ waa hi pee kpamisa lo?”

⁴ Kɛkɛ nɛ Yawɛ Tabohiatsɛ ɔ de mi ke,

⁵ “Bi ni ɔmɛ tsuo, kɛ osɔfo ɔmɛ ke, nɛ a ha hwɔ daa nyɔhiɔ enuɔne ɔ, kɛ kpaanyɔne ɔ jeha nyingmi kpaago ɔ, imi a ha hwɔ ha lo?

⁶ Ke a ye ní nɛ a nu ní ɔ, imi a pee kɛ ha lo? Pi mɛ nitsɛmɛ a he nɛ a pee ha lo?”

⁷ Munyu nɛ ɔmɛ nɔuu ji sɛ gbi nɛ Yawɛ ha kɛ gu gbali nɛ sɛ hlami ɔ a nɔ. Jamɛ a be ɔ, Yerusalem na ní kpɔtɔɔ. Jamɛ a be ɔ, nihi babauu ngɛ Yerusalem ma a mi; nɛ kɔpe ɔmɛ nɛ bɔle ma a, kɛ zugba a nɛ ngɛ leneyi je, kɛ yo ɔmɛ a kuɔ si ɔ tsuo hyi tɔ kɛ nimli.

Tue gbomi ha a nuu ni ɔmɛ kɛ ho ma se ya

⁸ Yawɛ ha Zakaria sɛ gbi nɛ ɔ ke,

⁹ “Blema lokoo ɔ, i wo ye ma a mlaa nɛ ɔmɛ ke, ‘Nyɛɛ hyɛ nɛ a ye dami sane; nyɛ mi mi nɛ jɔ, nɛ nyɛɛ na nyɛ sibi mɔbɔ.

¹⁰ Yalɔyihi, awusahi, nibwɔhi, kɛ nihi nɛ e fi mɛ ɔ, nyɛ ko wa mɛ yi mi. Jehanɛ hu, nyɛ ko to nyɛ sibi a he ga yaya.’

¹¹ “Se ye ma a bui mi tue fɛɛ; a si a konɔ wo mi, nɛ a tsi a tue, konɛ a ko nu nɔ́ nɛ i ngɛ mɛ dee ɔ.

¹² A kplii a tsui konɛ a ko nu mlaahi, kɛ níhi nɛ i ha gbali ɔmɛ nɛ sɛ a hlami ɔ tsɔɔ mɛ ɔ. Enɛ ɔ he ɔ, imi Yawɛ Tabohiatsɛ ɔ, ye mi mi fu mɛ wawɛɛ nitsɛ.

¹³ Akɛnɛ ke i de nɔ́ ko nɛ a bui tue he je ɔ, ke a fa kue ɔ, i he we nɔ.

¹⁴ I gbɛ mɛ ngɔ fĩa je mahi nɛ a li nɔ kaa nɔ́ nɛ lasiogblee lɛ muɔ mɛ; nɛ a si zugba a ngɔ fɔ si, nɛ nɔ ko bi ngɛ lejɛ ɔ. Nɛ zugba kpakpa nɛ ɔ ba pee ma doku.”