Zakaria 4 - BAIBLO ALOO NGMAMI KLƆUKLƆU Ɔ

Kane tso ɔ he nina

¹ Bɔfo ɔ nɛ kɛ mi tu munyu ɔ ba ekohu, nɛ e ba hɛli mi si kaa bɔ nɛ a tsɛ̃ɛ̃ɔ nɔ ngɛ mahe mi.

² E bi mi ke, “Mɛni o na?” I he nɔ ke, “I na kane tso nɛ a kɛ sika tsu pee. Tɔ maa si ngɛ e yi mi. Kane kpaago ngɛ kane tso ɔ he. Kane ɔmɛ eko fɛɛ eko hɛɛ puɔ kpaago.

³ Oliv tso enyɔ ngɛ kane tso ɔ kasa nya; kake ngɛ hiɔ nɔ, nɛ kake hu ngɛ muɔ nɔ.”

⁴ I bi bɔfo ɔ ke, “Ye Nyɔmtsɛ, mɛni enɛ ɔmɛ tsɔɔ?”

⁵ Kɛkɛ nɛ bɔfo ɔ nɛ kɛ mi tu munyu ɔ he nɔ nɛ e de mi ke, “Anɛ o li ní nɛ ɔmɛ lo?” I he nɔ ke, “Ye Nyɔmtsɛ, i li.”

^10b Bɔfo ɔ de mi ke, “Kane tso kpaago ɔmɛ daa si ha Yawɛ hɛngmɛ kpaago nɛ e kɛ hyɛɛ nɔ́ ngɛ je ɔ mi tsuo ɔ.”

¹¹ Jehanɛ, i bi lɛ ke, “Oliv tso enyɔ ɔmɛ nɛ ngɛ kane tso ɔ hiɔ nɔ kɛ muɔ nɔ ɔ, mɛni a tsɔɔ?”

¹² I bi lɛ ekohu ke, “Oliv tso kɔni enyɔ ɔmɛ nɛ ngɛ sika tsu bɛ enyɔ ɔmɛ nɛ nu ngɛ bee ngɛ a mi ɔ kasa nya a, mɛ hu mɛni a tsɔɔ?”

¹³ Kɛkɛ nɛ e bi mi ke, “Anɛ o li?” I he nɔ ke, “Ye nyɔmtsɛ, i li.”

¹⁴ E ya nɔ nɛ e de mi ke, “Ni nɛ ɔmɛ ji ni enyɔ nɛ a pɔ mɛ nu, nɛ a daa si ngɛ je ɔ tsuo Nyɔmtsɛ ɔ hɛ mi ɔ nɛ.”

Mawu wo Zerubabel si

⁶ Mawu bɔfo ɔ de mi ke ma ngɔ Yawɛ sɛ gbi nɛ ɔ kɛ ya ha Zerubabel: “Pi o nyɛ́mi, loo o he wami nya; se ye mumi ɔ nɛ ma tsu enɛ ɔ. Yawɛ Tabohiatsɛ ɔ lɛ de.

⁷ Mo yo gagaa, mɛni kulaa ji mo ngɛ Zerubabel hɛ mi? E maa ba mo si, nɛ o maa pee kaa nga kplanaa. Be nɛ o kɛ nyagbe tɛ ɔ maa ma e blɔ he ngɛ tsu ɔ yi mi ɔ, ma a tsuo ma he ose ke, ‘Afɛu nɔ oo, afɛu nɔ!’ ”

⁸ Jehanɛ hu Yawɛ ha mi sɛ gbi kpa ke,

⁹ “Zerubabel nɛ fia Mawu we nɛ ɔ sisi tomi ɔ, lɛ nɔuu nɛ maa ma tsu ɔ kɛ gbe nya. Ke nɔ́ nɛ ɔ ba mi pɛ ye ma a maa le kaa imi Yawɛ Tabohiatsɛ ɔ nitsɛ nɛ i tsɔ mo a ngɔ.

¹⁰ Amlɔ nɛ ɔ nɛ ní tsumi ɔ yɛ nɔ kpakpa ko ɔ, nɛ ni ɔmɛ pee kaa nɔ́ nɛ a kɔni mi jɔ̃. Se ke a na Zerubabel nɛ ngɛ Mawu we ɔ mae ekohu ɔ, a bua maa jɔ.”