Zakaria 14 - BAIBLO ALOO NGMAMI KLƆUKLƆU Ɔ

Yerusalem kɛ je ma amɛ

¹ Hyɛ, be ko ma ha Yawɛ! Jamɛ a be ɔ, nyɛ níhi nɛ a ha a, a maa dla ngɛ nyɛ hɛ mi paa.

² Yawɛ ma bua je ma amɛ tsuo a nya kɛ ba tua Yerusalem. A maa ngɔ ma a; a maa ha ní ngɛ we ɔmɛ a mi, nɛ a maa pee yi ɔmɛ basabasa. A maa nuu ma a mi dlami enyɔ mi kake kɛ ho ma se ya; se ni nɛmɛ nɛ maa piɛ ngɛ Yerusalem ɔ, a be a hɛ mi kpatae.

³ Jehanɛ, Yawɛ kɛ je ma amɛ maa to ní kaa bɔ nɛ e peeɔ ngɛ ta nga nɔ ɔ.

⁴ Jamɛ a be ɔ, Yawɛ maa da si ngɛ Oliv yo ɔ nɔ ngɛ Yerusalem beleku je. Kɛkɛ ɔ, kɔ̃ agbo ko ma gba Oliv yo ɔ mi enyɔ kɛ maa je beleku je kɛ yaa si bonyoku je. Yo ɔ kasa fa ma ya je omleyi je, nɛ kasa fa hu ma ya je leneyi je.

⁵ Nyɛ maa tu fo kɛ maa gu kɔ̃ ɔ nɛ gba yo ɔ mi enyɔ ɔ mi, ejakaa kɔ̃ ɔ nɛ gba Yawɛ yo ɔ mi enyɔ ɔ ma ya su Azal tɔɔ. Nyɛ maa tu fo kaa bɔ nɛ nyɛ pee blema ngɛ Yuda matsɛ, Uzia yi nɔ, benɛ zugba mimiɛ ɔ. Yawɛ, ye Mawu ɔ maa ba kɛ ni klɔuklɔu ɔmɛ tsuo.

⁶ Jamɛ a be ɔ, fĩɛ nɛ nya wa

⁷ be si hie hu. Du be bue gblegbleegble. Nyɔ mi hu je mi maa tɛ paa kaa piani. Be nɛ nɔ́ nɛ ɔ maa ba mi ɔ, Yawɛ pɛ lɛ le.

⁸ Jamɛ a be ɔ, nyu nɛ haa wami maa je Yerusalem kɛ be; fa ma ya sɛ Ngo wo ɔ mi, nɛ fa hu ma ya sɛ Mediterenia wo ɔ mi. Nyu ɔ maa hi bee daa, sapu, kɛ hiɔmi nɛmi be mi tsuo.

⁹ Nɛ Yawɛ maa ye tsɛ ngɛ je ɔ mi he tsuaa he. Nɔ tsuaa nɔ ma ja Mawu kake too ɔ, nɛ e biɛ pɛ a ma tsɛ.

¹⁰ Zugba a tsuo, kɛ je Geba ngɛ omleyi je kɛ yaa su Rimon ngɛ Yerusalem leneyi je ɔ maa pee kplanaa. Se Yerusalem lɛɛ bɔ nɛ e maa si gojoo ɔ, ja nɔuu e maa hi, kɛ je Benyamin agbo ɔ he kɛ ya agbo momo ɔ, kɛ Kɔ nya agbo ɔ he; jehanɛ kɛ je Hananel mɔ ɔ he kɛ ya su matsɛ dã ngami he ɔmɛ tsuo.

¹¹ Nimli maa kpale ba hi Yerusalem, ejakaa gbiɛmi nɛ a gbiɛ mɛ ɔ se maa po. Tue mi jɔmi maa ba Yerusalem.

¹² Nihi nɛ ma je ta kɛ wo Yerusalem ɔ, nɔ́ nɛ Yawɛ maa pee mɛ ji nɛ ɔ nɛ: be mi nɛ a ngɛ a nane nya a, a he lo ma pɔtɔ; a hɛngmɛ ma pɔtɔ ngɛ to puɔ mi, nɛ a lilɛ ma pɔtɔ ngɛ a nya mi.

¹³ Jamɛ a be ɔ, Yawɛ ma ha nɛ a juɛmi ma tsaka, nɛ a maa nu a sibi a kɔni si, nɛ a maa hi a sibi nɔ́ fiae.

¹⁴ Yuda kɛ Yerusalem po maa hwu ta. A maa ha je ma amɛ nɛ bɔle mɛ ɔ a ní babauu ɔ: sika tsu, sika hiɔ, kɛ heha ní.

¹⁵ Kikɛmɛ hiɔ nɛ ɔ nɔuu maa nu okpɔngɔ, teji okpɔngɔ, afukpɔngɔ, teji, kɛ lohwe saisaa nɛ ngɛ a ta a mi.

¹⁶ Mahi tsuo nɛ te si kɛ wo Yerusalem ɔ, a mi nihi nɛ a yi ma na wami ɔ, daa jeha a, a maa ya Yerusalem nɛ a ya ja Yawɛ Tabohiatsɛ ɔ kaa matsɛ, nɛ a maa ye Gbasisihimi nyami be ɔ ngɛ lejɛ ɔ.

¹⁷ Je ma ko nɛ be yae nɛ a ya ja Yawɛ Tahohiatsɛ ɔ kaa lɛ ji matsɛ ɔ, hiɔmi be nɛe ha mɛ.

¹⁸ Ke Egipt bi hu ma kua ke a be yae nɛ a ya ye Gbasisihimi nyami be ɔ, Yawɛ ma ha haomihi nɛ ba je ma amɛ nɛ kua yami nɛ a ya ja lɛ ɔ a nɔ ɔ nɔuu maa ba Egipt bi ɔmɛ a nɔ.

¹⁹ Egipt bi, kɛ je ma kpahi tsuo nɛ ma kua ke a be yae nɛ a ya ye Gbasisihimi nyami be ɔ, bɔ nɛ a maa gbla mɛ tsuo a tue ji nɛ ɔ nɛ.

²⁰ Jamɛ a be ɔ, a maa ngma ngɛ okpɔngɔ kuɛ ngmlɛ ɔmɛ a nɔ ke, “Klɔuklɔu kɛ ha Yawɛ.” Buɛhi nɛ ngɛ Mawu we ɔ maa pee klɔuklɔu kaa kãhi nɛ ngɛ bɔ sami la tɛ ɔ hɛ mi ɔ nɔuu.

²¹ Buɛhi tsuo nɛ ngɛ Yerusalem, kɛ Yuda zugba a nɔ ɔ maa pee klɔuklɔu ha Yawɛ Tabohiatsɛ ɔ. Nihi nɛ ma ba sã bɔ ɔ, ma ba ngɔ buɛ nɛ ɔmɛ, nɛ a maa hoo lohwe nɛ a kɛ sã bɔ ɔ ngɛ mi. Jamɛ a be ɔ, jua yelɔ ko jua yelɔ ko be Yawɛ, Tabohiatsɛ ɔ we ɔ mi hie hu.