Zakaria 12 - BAIBLO ALOO NGMAMI KLƆUKLƆU Ɔ

A ma he Yerusalem yi wami hwɔɔ se

¹ Sɛ gbi nɛ je Yawɛ ngɔ nɛ kɔɔ Israel he ji nɛ ɔ nɛ. Yawɛ ji nɔ nɛ bɔ hiɔwe kɛ zugba; lɛ nɛ ha nɔmlɔ adesa wami. Yawɛ ke,

² “Hyɛ, ma ha Yerusalem maa pee kaa kplu kɛ e mi duɔ ha je ma amɛ tsuo nɛ bɔle lɛ ɔ. Ke he nyɛli ba sá Yerusalem yi ɔ, a ma sá Yuda zugba a hu yi ja nɔuu.

³ Jamɛ a be ɔ, ma ha Yerusalem maa pee tɛ nɛ jiɔ ha je ma amɛ tsuo. Ma tsuaa ma nɛ ma wo tɛ nɛ ɔ nɔ ɔ, e maa ye e he awi. Je ma amɛ tsuo ma bla, nɛ a maa te si kɛ wo Yerusalem.

⁴ Jamɛ a be ɔ, ma ha gbeye maa nu okpɔngɔ ɔmɛ tsuo, nɛ okpɔngɔ nɔ hili ɔmɛ maa nu godo. Ma bu Yuda ma a he, se a he nyɛli ɔmɛ a we okpɔngɔ ɔmɛ lɛɛ ma ha a hɛ ma yu.

⁵ Kɛkɛ ɔ, Yuda we puɔ nya amɛ ma de a he ke, ‘Nihi nɛ ngɛ Yerusalem ɔ, Yawɛ Tabohiatsɛ Mawu ɔ ji nɔ nɛ woɔ mɛ he wami.’

⁶ “Jamɛ a be ɔ, ma ha Yuda we puɔ nya amɛ maa pee kaa buɛ kɛ e he la gegeege nɛ a to lɛ́ ngɔ wo sisi, loo kaa blɛfo nɛ a kpɔ, nɛ a bua nya pue jatɛ kɛ e nya la nɔ. Je ma amɛ nɛ bɔle mɛ ɔ tsuo a hɛ mi ma kpata, se Yerusalem lɛɛ e maa ma e ma he ɔ nɔuu.

⁷ “Imi Yawɛ, ma ha Yuda bo tsu ɔmɛ maa ye kunimi kekle, bɔ nɛ pee nɛ hɛ mi nyami nɛ David nina a, kɛ nihi nɛ ngɛ Yerusalem ɔ ma ná a kó pe Yuda nɔ́ ɔ.

⁸ Ma bu nihi nɛ ngɛ Yerusalem jamɛ a be ɔ a he. A ti nɔ wudɔwudɔ pe kulaa po maa pee kaa David. David nina maa nyɛɛ a hɛ mi kaa Yawɛ bɔfo, loo imi Mawu nitsɛ.

⁹ Jamɛ a be ɔ, je ma tsuaa je ma nɛ maa te si kɛ si Yerusalem ɔ, ma kpata e hɛ mi.

¹⁰ “David nina, kɛ ni kpahi nɛ ngɛ Yerusalem ɔ, ma ngɔ mumi nɛ naa mɔbɔ, kɛ mumi nɛ faa kue ngɔ wo a mi tɔ. Kɛkɛ ɔ, ke a na nɔ nɛ a gbɔ lɛ nɔ́ ɔ, a maa nyɛ ya ha lɛ kaa bɔ nɛ a nyɛɛ ya ha bi kake too. A ma nya awe kaa nihi nyaa awe ha a bitɛte.

¹¹ Jamɛ a be ɔ, a maa nyɛ ya wawɛɛ ngɛ Yerusalem kaa bɔ nɛ a pee ha Hadadrimon ngɛ Magido nga a nɔ ɔ.

^12-14 Zugba a tsuo maa nyɛ ya weku nya weku nya. Weku tsuaa weku maa pee e nɔ́ kɔklɔɔ. David we ɔ maa pee a nɔ́ kɔklɔɔ, nɛ a yi ɔmɛ hu maa pee a nɔ́. Natan we ɔ maa pee a nɔ́ kɔklɔɔ, nɛ a yi ɔmɛ hu maa pee a nɔ́. Levi we ɔ maa pee a nɔ́ kɔklɔɔ, nɛ a yi ɔmɛ hu maa pee a nɔ́; nɛ Shimei we ɔ hu maa pee a nɔ kɔklɔɔ nɛ a yi ɔmɛ hu maa pee a nɔ́. Weku kpa amɛ nɛ piɛ ɔ hu maa pee a nɔ́ kɔklɔɔ, nɛ a yi ɔmɛ hu maa pee a nɔ́ ja nɔuu.”