Zakaria 11 - BAIBLO ALOO NGMAMI KLƆUKLƆU Ɔ

A ma kpata yiwutsotsɛmɛ ɔmɛ a hɛ mi

¹ Lebanon, bli o sinya amɛ, konɛ la nɛ sã o seda tso ɔmɛ!

² Nyɛ sɛsɛo tsohi, nyɛ nya awe, ejakaa seda tso ɔmɛ nɔɔ si; a kpata jamɛ a tso kpakpa amɛ a hɛ mi! Nyɛ Bashan tso nguahi, nyɛ nya awe, ejakaa a gba hue kusuu ɔ ngɔ pue si.

³ Nyɛɛ bu tue! To hyɛli ɔmɛ ngɛ awe nyae, ejakaa a hɛ mi nyami ɔ ta. Jata amɛ ngɛ huãe, ejakaa a kpata hue ɔ nɛ ngɛ Yordan pa a nya a hɛ mi.

To hyɛli enyɔ ɔmɛ

⁴ Bɔ nɛ Yawɛ, ye Mawu ɔ de mi ji nɛ ɔ nɛ: “Zakaria, ngɔɔ o he kɛ pee to kuu nɛ a yaa gbe mɛ ɔ a hyɛlɔ.

⁵ Totsɛmɛ ɔmɛ juaa to ɔmɛ, nɛ a deɔ ke, ‘Wa ná ní. Nyɛ ha wa je Yawɛ yi.’ Nihi nɛ heɔ to ɔmɛ ɔ, ya gbee mɛ nɛ nɔ ko gbla we a tue. To hyɛli ɔmɛ nitsɛmɛ lɛɛ, to ɔmɛ a he mɔbɔ ko kulaa pee we mɛ.”

⁶ Yawɛ de mi ke, “I be nɔ ko nɔ ko mɔbɔ nae hu ngɛ zugba a nɔ. Imi nitsɛ ma ha ni ɔmɛ tsuo a ti nɔ tsuaa nɔ maa sɛ e nyɛmi kpá mi. Ee, a maa sɛ matsɛ ɔ kpá mi. A ma kpata zugba a hɛ mi, nɛ nɔ ko nɔ ko he be mi jee.”

⁷ To je juali ɔmɛ bɔ mi apaa, nɛ i hyɛ to kuu ɔ nɛ a yaa gbe ɔ nɔ. I ngɔ dɛma tso enyɔ. I wo kake biɛ ke “Dloomi”, nɛ i tsɛ enyɔne ɔ “Kakepeemi”. Nɛ i hyɛ to ɔmɛ a nɔ.

⁸ Nyɔhiɔ kake mi ɔ, to hyɛli etɛ komɛ nɛ sume mi ɔ, i ngmɛɛ a he, ejakaa a sane ba gbe ye nya.

⁹ Kɛkɛ nɛ i de to kuu ɔ ke, “Jehanɛ, i be nyɛ nɔ hyɛe hu. Nyɛ ti ni nɛmɛ nɛ ma gbo ɔ, a gbo. Ni nɛmɛ nɛ a hɛ mi ma kpata a, a hɛ mi nɛ kpata. Ni nɛmɛ nɛ maa piɛ ɔ, a tsɔtslɔɔ a sibi a mi.”

¹⁰ Lɔ ɔ se ɔ, i ngɔ dɛma tso nɛ biɛ ji “Dloomi” ɔ, nɛ i ku mi kɛ tsɔɔ kaa somi nɛ i kɛ je ma amɛ tsuo so ɔ, a po mi.

¹¹ A po somi ɔ mi jamɛ a ligbi ɔ nɔuu, nɛ to je juali ɔmɛ nɛ na nɔ́ nɛ i pee ɔ yɔse kaa Yawɛ sɛ gbi ji nɛ ɔ nɛ.

¹² I de mɛ ke, “Ke nyɛ suɔ ɔ, nyɛɛ wo mi hiɔ, se ke e dɛ ha nyɛ ɔ, nyɛɛ ngɔ faa.” Kɛkɛ nɛ a ngmɛ sika hiɔ yi nyingmi etɛ nɛ a kɛ wo mi hiɔ.

¹³ Yawɛ de mi ke, “Yaa fia sika a ngɔ pue nito he ɔ.” Nɛ i pee ja. Blɔɔ sika nɛ a susu kaa e maa sa mi ji sika hiɔ yi nyingmi etɛ ɔ nɛ.

¹⁴ Jehanɛ, dɛma tso enyɔne ɔ nɛ biɛ ji “Kakepeemi” ɔ, i ku mi kɛ tsɔɔ kaa Yuda kɛ Israel pi nyɛmimɛ hu.

¹⁵ Enɛ ɔ se ɔ, Yawɛ de mi ke, “Jehanɛ lɛɛ ngɔɔ o he ngɔ pee kaa to hyɛlɔ nɛ he be se nami.

¹⁶ Ejakaa i ngɛ to hyɛlɔ ko tsɔe kɛ ma zugba a nɔ. Tohi nɛ a hɛ mi miɔ nɛ e kpata a, a nɔ́ pee we lɛ kɔmɔ. Ní nɛmɛ nɛ laa a, e be a se blɔ hlae. Hiɔtsɛmɛ ɔmɛ hu e be mɛ tsae; nɛ ní nɛmɛ nɛ ngɛ he wami ɔ hu, e be mɛ ní hae; mohu ɔ, e maa ye ní nɛmɛ nɛ wo zɔ ɔ, nɛ e ma kpɔ a nane kokloto tete.

¹⁷ Ye to hyɛlɔ nɛ o he be se nami lee! To hyɛlɔ nɛ tuɔ fo kɛ jeɔ to kuu ɔ he ɔ, klaate maa po e kɔni, kɛ e hiɔ nɔ hɛngmɛ. Ee, á po e kɔni nɛ je nya, nɛ e hiɔ nɔ hɛngmɛ nɛ yu kulaa.”