Zakaria 1 - BAIBLO ALOO NGMAMI KLƆUKLƆU Ɔ

Yawɛ ngɛ e ma a tsɛe ke a kpale kɛ ba e ngɔ

¹ Persia matsɛ, Darius tsɛ yemi be ɔ jeha enyɔne ɔ, nyɔhiɔ kpaanyɔne ɔ we kekleekle ligbi ɔ, Yawɛ ngɔ e sɛ gbi ngɔ ha Ido bibi gbalɔ Zakaria, Berekia bi ɔ ke,

² “Imi Yawɛ, ye mi mi fu nyɛ nɛmɛ ɔmɛ wawɛɛ nitsɛ,

³ se jehanɛ lɛɛ i ngɛ nyɛ dee ke, nyɛɛ kpale kɛ ba ye ngɔ, nɛ imi hu ma ná nyɛ he tsui ekohu.

⁴ Nyɛ ko pee kaa nyɛ nɛmɛ ɔmɛ. Blema lokoo nɛ gbali ɔmɛ ngɔ ye sɛ gbi ngɔ ha mɛ ke a kpa yayami peemi, nɛ́ a ba a je mi bɔ nɛ sa; se a bui mi tue fɛɛ, nɛ a yi ye munyu ɔmɛ a nɔ hulɔ.

⁵ Amlɔ nɛ ɔ, jije nyɛ nɛmɛ ɔmɛ ngɛ? Nɛ gbali ɔmɛ nɛɛ! A ngɛ je mi kɛ mwɔɔ?

⁶ Mlaahi nɛ i wo nyɛ nɛmɛ ɔmɛ, kɛ kɔkɔ nɛ i bɔ mɛ kɛ gu ye tsɔli nɛ ji gbali ɔmɛ a nɔ ɔ, tse a na mi nɔ́! Kɛkɛ nɛ jehanɛ a tsake a tsui, nɛ a de ke, Yawɛ Tabohiatsɛ ɔ gbla a tue bɔ nɛ sa mɛ ngɛ a ní peemi ɔmɛ a he kaa bɔ nɛ e to e yi mi ke e ma pee ɔ.”

Okpɔngɔhi a he nina

⁷ Matsɛ Darius tsɛ yemi be ɔ jeha enyɔne ɔ, nyɔhiɔ nyɔngma kɛ kakene nɛ a tsɛɛ Shebat ɔ we ligbi nyingmi enyɔ kɛ eywiɛne ɔ, Yawɛ ha imi Zakaria, Berekia bi ɔ sɛ gbi kɛ gu nina ko mi.

⁸ Nyɔ mi ɔ, i na Yawɛ bɔfo ko ngɛ okpɔngɔ tsutsuu ko nɔ. E ha e we okpɔngɔ ɔ da si ngɛ mɔmɔ tso komɛ a kpɛti ngɛ kɔ̃ ko mi. Okpɔngɔ kpahi daa si ngɛ a se, okpɔngɔ tsutsuuhi, okpɔngɔ futaahi, kɛ ekomɛ nɛ hɛɛ kɔbɛi su.

⁹ I bi Yawɛ bɔfo ɔ ke, “Ye nyɔmtsɛ, okpɔngɔ nɛ ɔmɛ ɔ, mɛni a tsɔɔ?” E he nɔ ke, “Ma tsɔɔ mo.

¹⁰ Jehanɛ ɔ, nyumu ɔ nɛ daa si ngɛ mɔmɔ tso ɔmɛ a kpɛti ɔ he nɔ ke, ‘Ni nɛ ɔmɛ ji nihi nɛ Yawɛ tsɔ mɛ ke a ya slaa je ɔ mi tsuo.’ ”

¹¹ Nihi nɛ hii si ngɛ okpɔngɔ kpa amɛ a nɔ ɔ bɔ Yawɛ bɔfo amaniɛ ɔ ke, “Wa ya slaa je ɔ mi tsuo, nɛ wa na kaa tue mi jɔmi ngɛ je ɔ mi he tsuaa he.”

¹² Kɛkɛ nɛ Yawɛ bɔfo ɔ de ke, “Yawɛ Tabohiatsɛ, jeha nyingmi kpaago sɔuu ji nɛ ɔ nɛ Yerusalem kɛ Yuda ma amɛ ha nɛ o mi mi wo la. Mɛni be nɛ o bua maa jɔ, nɛ o maa na mɛ mɔbɔ?”

¹³ Yawɛ kɛ bɔfo ɔ tu munyu, nɛ e wo lɛ bua.

¹⁴ Bɔfo ɔ de mi ke ma fiɛ nɔ́ nɛ Yawɛ Tabohiatsɛ ɔ de ɔ ke, “Yerusalem, ye ma klɔuklɔu Zion ɔ, i suɔ e sane saminya, nɛ e he nɔ́ dɔɔ mi.

¹⁵ Se mahi nɛ a he mi jɔ mɛ, nɛ a tue mi hu jɔ mɛ ɔ, ye mi mi fu mɛ wawɛɛ nitsɛ. Ejakaa imi lɛɛ be bɔɔ ko kɛkɛ ye mi mi fu ye ma a, se jamɛ a ma kpa amɛ lɛɛ a ha ye ma a nɔ́ nami ɔ ngɛ nɔ yae mohu.

¹⁶ Lɔ ɔ he ɔ, i kpale kɛ ba Yerusalem, konɛ ma ba na ma a mɔbɔ. A maa ma ye sɔlemi we ɔ ekohu, nɛ a ma dla maa fia Yerusalem ma a hulɔ.”

¹⁷ Bɔfo ɔ de mi hulɔ ke ma fiɛ ke, “Yawɛ Tabohiatsɛ ɔ ke e ma amɛ ma ná ní kpɔtɔɔ ekohu. Yawɛ maa kpale ba ngɔ Yerusalem ekohu kaa lɛ nitsɛ e ma; nɛ e maa wo Zion bua.”

Kolihi a he nina

¹⁸ I na nina kpa; i na lohwe koli eywiɛ.

¹⁹ Kɛkɛ nɛ i bi Yawɛ bɔfo ɔ nɛ kɛ mi tu munyu ɔ ke, “Koli nɛ ɔmɛ ɔ, mɛni a tsɔɔ?” E he nɔ ke, “Mɛ ji je ɔ mi he wami ɔmɛ nɛ gbɛ Yuda, Israel, kɛ Yerusalem bi ɔmɛ fĩa a nɛ.”

²⁰ Jehanɛ Yawɛ tsɔɔ mi ga ní tsuli eywiɛ.

²¹ I bi ke, “Mɛni nimli nɛ ɔmɛ hu ma peemi?” E he nɔ ke, “Ni nɛ ɔmɛ ba konɛ koli ɔmɛ nɛ kpata Yuda hɛ mi pɛsɛpɛsɛ, nɛ a gbɛ ye ma a ngɔ fĩa a, a ba wo a he gbeye, nɛ́ a kpata a hɛ mi.”