Yuda 1 - BAIBLO ALOO NGMAMI KLƆUKLƆU Ɔ

¹ Imi Yuda, Yesu Kristo tsɔlɔ, kɛ Yakobo nyɛminyumu ɔ, i ngɛ womi nɛ ɔ ngmae kɛ ya ha Kristo se nyɛɛli tsuo, nihi nɛ Tsɛ Mawu suɔ, nɛ e hla mɛ, nɛ a ngɔ mɛ ngɔ to ha Yesu Kristo ɔ.

² Mɔbɔ nami, suɔmi, kɛ he jɔmi nɛ hiɛ babauu ha nyɛ.

Lakpa tsɔɔli

³ Ye nyɛmimɛ nɛ i suɔ! Jinɛ i ngɛ mɔde bɔe nɛ ma ngma nyɛ womi, nɛ wɔ tsuo wa yi wami hemi sane ɔ, ma tsɔɔ nyɛ nya saminya. Se i na kaa e hia kaa ma ngma nyɛ nɔuu ngɛ nɔ́ kpa he mohu. Lɔ ɔ he ɔ, i kɛ womi nɛ ɔ ngɛ nyɛ mumi mi he wami woe, konɛ hemi kɛ yemi ɔ nɛ Mawu ngɔ ha e nihi nɛ e hla mɛ si kake nyɔngloo ɔ, nyɛɛ hɛɛ mi wawɛɛ.

⁴ I ngɛ enɛ ɔ dee, ejakaa ni komɛ nɛ li Mawu ju si ba sɛ wa kpɛti. Sɛ gbi nɛ kɔɔ dloomi nɛ Mawu dloo wɔ ɔ he ɔ, nimli nɛ ɔmɛ plɛ hɛ mi ngɔ bu si, bɔ nɛ pee nɛ a kɛ laa a yakayaka ní peemi ɔmɛ a nɔ. Yesu Kristo, wa Tsɔɔlɔ, kɛ wa Nyɔmtsɛ kake too ɔ hu a kua lɛ. Blema lokoo lɛ ngmami ɔmɛ de to kaa a ma kpata nimli nɛ ɔmɛ a hɛ mi.

⁵ Nyɛ le enɛ ɔ momo lɛɛ, se i suɔ kaa ma kai nyɛ. Benɛ Nyɔmtsɛ ɔ jé Israel bi ɔmɛ si kake nyɔngloo kɛ je Egipt se ɔ, e kpata ni nɛmɛ nɛ he we yi ɔ a hɛ mi.

⁶ Nyɛ kai Mawu bɔfohi nɛ hɛɛ blɔ nya sa a, nɛ pee se ɔ, a tsɔ atuã kɛ je mɛ nitsɛmɛ a si himi he ɔ. Amlɔ nɛ ɔ, a kɛ kɔsɔkɔsɔ fi mɛ, nɛ Mawu ngɔ mɛ ngɔ to gbogboehi a je ngɛ diblii nɛ mi ti mi. Lejɛ ɔ nɛ a maa hi hluu kɛ yaa si ligbi ngua a maa su, nɛ a maa kojo mɛ.

⁷ Nyɛ kai Sodom kɛ Gomora, kɛ mahi nɛ bɔle mɛ kɛ kpe ɔ. Ma nɛ ɔmɛ a mi bi ɔmɛ fiɛ yo kɛ nyumu yakayaka fiɛmi, nɛ a ya nyɛɛ akɔnɔ yayahi a se kaa bɔ nɛ jamɛ a bɔfo ɔmɛ pee ɔ nɔuu. Nimli nɛ ɔmɛ a tue gblami ji kaa a ngɔ mɛ ngɔ wo la nɛ gbo we mi, konɛ a pee okadi kɛ ha nihi tsuo.

⁸ Jã nɔuu lakpa tsɔɔli nɛ ɔmɛ hu bleɔ he lo ɔ; a teɔ si kɛ siɔ Mawu nɔ yemi ɔ, nɛ a jɛɔ ni klɔuklɔuhi nɛ ngɛ hiɔwe ɔ po.

⁹ Mawu bɔfo nɔkɔtɔma Mikael tete po pee we enɛ ɔ. Benɛ e kɛ Abosiami pɛ, nɛ e kɛ lɛ sã nya kaa mɛnɔ lɛ sa kaa e ngɔ Mose flɔ̃ ɔ, Mikael jɛ we Abosiami; e yi e he fɛu hulɔ. Nɔ́ nɛ e de lɛ ji, “Nyɔmtsɛ ɔ nɛ ka o hɛ mi!”

¹⁰ Se nimli nɛ ɔmɛ lɛɛ nɔ́ ko nɛ a nui sisi ɔ, a tuɔ he munyu yaya. Se níhi nɛ a nuɔ he kaa pu mi lohwehi nɛ mɛɛ lɛɛ a susuu we yi mi ɔ, lɔ ɔmɛ nɔuu ji níhi nɛ kpataa a hɛ mi.

¹¹ Musu tloo mɛ pɛ! A ya ngɔ Kain blɔ ɔ. Yayami nɛ Balaam pee ɔ, a ngɔ a he ya wo jamɛ a yayami ɔ mi ngɛ se nami he. A tsɔ atuã kaa bɔ nɛ Kora tsɔ atuã a, nɛ a hɛ mi kpata kaa lɛ.

¹² Ke nimli nɛ ɔmɛ ba futu nyɛ kɛ ngɛ suɔmi niye ní yee ɔ, a woɔ ní ɔ he mu. A yeɔ ní tsuatsuaatsua nɛ a susuu we ni kpahi a he. A ngɛ kaa bɔku nɛ nyu be mi nɛ kɔɔhiɔ ngɛ lɛ fiae kɛ bee. A ngɛ kaa tsohi nɛ ní kpami be po a nɛ yiblii ngɛ a nɔ; tsohi nɛ gbo, nɛ a hia mɛ kɛ sipoku tsuo ngɔ fɔ si.

¹³ A ngɛ kaa wo mi oslɔke nɛ ngɛ kue hamahama, nɛ a zo ní ɔmɛ je kpo paa kaa hwɔli. A ngɛ kaa dodoehi nɛ ngɛ si bɔlee kɛ ngɛ yae kɛ ngɛ bae; nimli nɛ ɔmɛ ɔ, Mawu dla he ko ngɔ to mɛ momo ngɛ gbogboehi a je diblii nɛ mi ti ɔ mi.

¹⁴ Henok, Adam nina tutuutu ekpane ɔ, nɔ́ nɛ e gba blema lokoo ngɛ nimli nɛ ɔmɛ a he ji nɛ ɔ nɛ: “Nyɔmtsɛ ɔ ma kɛ e bɔfo klɔuklɔuhi akpeakpe abɔ.

¹⁵ E maa kojo nimli tsuo; nihi nɛ li Mawu ɔ, e maa gbla a tue bɔ nɛ sa ngɛ a ní yayami ɔmɛ, kɛ musu bɔmi munyuhi nɛ a tu kɛ si Mawu ɔ a he.”

¹⁶ Daa nɛ ɔ, nimli nɛ ɔmɛ ngɛ munyu huitihuiti tue kɛ ngɛ bee; nɔ́ muɛ a hɛ gblegbleegble. Mɛ nitsɛmɛ a he akɔnɔ yayahi a se nɛ a dii. A fĩaa; a peeɔ nya puu, nɛ a gbee nihi a yi mi, konɛ a kɛ na ni ɔmɛ a he blɔ.

A ngɛ Kristo se nyɛɛli ɔmɛ ga woe

¹⁷ Se nyɛ ye nyɛmimɛ nɛ i suɔ! Nyɛɛ lɛɛ nyɛ kai níhi nɛ wa Nyɔmtsɛ Yesu Kristo bɔfo ɔmɛ de to ɔ.

¹⁸ A de ke, “Nyagbe be ɔ mi ɔ, nihi maa ba nɛ a maa ye nyɛ he fɛu; a maa pee ní yayamihi nɛ mɛ nitsɛmɛ a tsui suɔ.”

¹⁹ Nimli nɛ ɔmɛ ji nimli nɛ kɛ mi gbami baa a nɛ. A he lo ɔ lɛ yeɔ a nɔ; a be mumi ɔ.

²⁰ Se nyɛ ye nyɛmimɛ nɛ i suɔ! Nyɛɛ lɛɛ nyɛɛ hɛɛ nyɛ hemi kɛ yemi klɔuklɔu ɔ mi wawɛɛ nɛ nyɛ nane nɛ pi si ngɛ mi. Nyɛɛ sɔle ngɛ Mumi Klɔuklɔu ɔ he wami ɔ nya.

²¹ Be mi nɛ nyɛ ngɛ wa Nyɔmtsɛ Yesu Kristo blɔ hyɛe nɛ e ba na nyɛ mɔbɔ, nɛ e ha nyɛ neneene wami ɔ, nyɛɛ hyɛ nyɛ he nɔ saminya. Kɛkɛ ɔ, suɔmi nɛ Mawu ngɛ kɛ ha nyɛ ɔ maa hi si daa.

²² Ni nɛmɛ nɛ a yi mi peeɔ mɛ sikɔsikɔ ɔ, nyɛɛ na mɛ mɔbɔ;

²³ nyɛ je ni komɛ hu kɛ je la a mi; nyɛɛ na ni kpa komɛ hu mɔbɔ nɛ gbeye yemi ngɛ mi. Se tadehi nɛ a wo ɔ tete po nyɛɛ hie; ejakaa a kɛ he lo akɔnɔ wo he mu.

Yi jemi sɔlemi

²⁴ Lɛ nɔ nɛ e ngɛ he wami nɛ e kɛ maa hyɛ nyɛ nɛ nyɛ be si nɔe, nɛ e maa hɛɛ nyɛ kɛ bua jɔmi kɛ ba e hɛ mi nyami klɔuklɔu ɔ mi nɛ piami ko be nyɛ he hie ɔ,

²⁵ lɛ Mawu kake too, wa kpɔlɔ ɔ, a gu wa Nyɔmtsɛ Yesu Kristo nɔ kɛ wo e hɛ mi nyami. E nɔ́ ji agboje, kɛ he wami, kɛ he blɔ kɛ je blema lokoo kɛ ba si amlɔ nɛ ɔ, kɛ yaa neneene tɔɔ! Amen.