Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Yoshua 9 - BAIBLO ALOO NGMAMI KLƆUKLƆU Ɔ


Gibeon bi ɔmɛ sisi Yoshua

1 Kunimihi nɛ Israel bi ɔmɛ ye ɔ, ha a he sanehi gbɛ fĩa zugba a tsuo kulaa nɔ kɛ ya su ma amɛ nɛ ngɛ Yordan pa a se, ngɛ bonyoku je, ngɛ yoku ɔmɛ a nɔ, kɔ̃ ɔmɛ a mi, Mediterenia wo ɔ nya tsuo, kɛ Lebanon ngɛ omleyi je. Matsɛmɛ nɛ ngɛ zugba a nɔ ji Hit bi, Amor bi, Kanaan bi, Periz bi, Hiv bi, kɛ Yebus bi a matsɛmɛ ɔmɛ.

2 Matsɛmɛ nɛ ɔmɛ tsuo bua a he nya, nɛ a so konɛ a kɛ Yoshua kɛ Israel nɛ hwu ta.

3 Se benɛ Gibeon bi ɔmɛ nɛ ji Hiv bi ɔmɛ nu bɔ nɛ Yoshua pee Yeriko kɛ Ai ma amɛ ɔ,

4 a to ga kaa a maa sisi Yoshua. A ya hla niye ní, nɛ a muɔ kotoku momohi, kɛ lohwe he womi tɔ momohi nɛ gba nɛ a kpɛ, nɛ a to ngɔ pue a teji ɔmɛ a nɔ.

5 A wo tade gbagbɛhi, kɛ tokota momohi nɛ́ a tsla; abolo nɛ a hɛɛ kɛ to a dɛ ɔ gbli nɛ e fu ja.

6 A ba na Yoshua kɛ Israel bi ɔmɛ ngɛ ma sito he ɔ ngɛ Gilgal, nɛ a de mɛ ke, “Wa je he kɛ. Wa suɔ nɛ waa kɛ nyɛ nɛ so.”

7 Se Israel bi ɔmɛ he nɔ ke, “Mɛni he je waa kɛ nyɛ maa so ɔ? Eko piɔ, kpo nya hiɛ ɔ he ko nyɛ je.”

8 A de Yoshua ke, “Wa ma sɔmɔ mo.” E bi mɛ ke, “Mɛnɔmɛ ji nyɛ? Jije nyɛ je?”

9 A de lɛ ke, “Wa kpa mo pɛɛ, wa je ma se tsitsaa he ko; nɛ wa nu Yawɛ, nyɛ Mawu ɔ he. Níhi tsuo nɛ e pee ngɛ Egipt ɔ, wa nu he,

10 kɛ bɔ nɛ e pee Amor bi ɔmɛ a matsɛmɛ enyɔ ɔmɛ nɛ a ngɛ Yordan beleku je ɔ: Heshbon matsɛ, Sihon, kɛ Bashan matsɛ, Og nɛ hi Ashtarot ɔ.

11 Wa ma nimeli ɔmɛ, kɛ wa zugba a nɔ bi ɔmɛ tsuo de wɔ ke wa hla niye ní kɛ to wa dɛ, nɛ waa hia blɔ kɛ ba nɛ wa ba na nyɛ. A de wɔ ke, ke wa ba a, wa ba de nyɛ ke wa ma sɔmɔ nyɛ. Lɔ ɔ he ɔ, waa kɛ nyɛ maa so.

12 Nyɛɛ hyɛ wa niye ní ɔ ha! Benɛ waa kɛ maa hia blɔ ɔ, la ngɛ he. Se piɔ lɛɛ, e gbli nɛ e fu ja.

13 Lohwe he womi tɔ ɔmɛ nɛ wa wo a mi dã kɛ hia blɔ ɔ, ní hehi, se piɔ ɔ, nyɛɛ hyɛ, a gba. Wa tade ɔmɛ, kɛ wa tokota amɛ hu wo momo ngɛ blɔ ɔ kɛmi sɔuu he.”

14 Israel bi ɔmɛ bi we Yawɛ ga womi kulaa, kɛkɛ nɛ a he ni ɔmɛ a dɛ mi niye ní ɔ.

15 Yoshua he Gibeon bi ɔmɛ atuu, nɛ e kɛ mɛ so kaa a be mɛ gbee. Kɛkɛ nɛ Israel ma nimeli ɔmɛ hu ka kita ngɔ fɔ nɔ.

16 Benɛ a kɛ mɛ so se ligbi etɛ ɔ, Israel bi ɔmɛ na le kaa ni ɔmɛ je a kasa nya haa.

17 Enɛ ɔ he je ɔ, Israel bi ɔmɛ hia kɛ je he nɛ a ngɛ ɔ, nɛ ligbi etɛ se ɔ, a ba su ma amɛ a mi he nɛ ni ɔmɛ je kɛ ba na mɛ ɔ. Ma amɛ ji Gibeon, Kefira, Beerot, kɛ Kiriat Yearim.

18 Se Israel bi ɔmɛ gbi ni ɔmɛ; ejakaa Israel ma nimeli ɔmɛ ka mɛ kita ngɛ Yawɛ, Israel Mawu ɔ hɛ mi kaa a be mɛ gbee. Enɛ ɔ ha ma kpekpemi ɔ tu munyu huitihuiti kɛ si ma nimeli ɔmɛ.

19 Se ma nimeli ɔmɛ hu de mɛ ke, “Wa ná ka mɛ kita momo ngɛ Yawɛ, Israel Mawu ɔ hɛ mi; lɔ ɔ he ɔ, e sɛ kaa wa peeɔ mɛ yayami ko.

20 Wa ma ha nɛ a yi nɛ na wami ngɛ somi ɔ nya; ke pi ja a, Mawu maa gbla wa tue.

21 A kó gbe mɛ, se a pee lɛ́ lɛli, kɛ pa yali kɛ ha wɔ.” Ga nɛ ma nimeli ɔmɛ wo ji nɛ ɔ nɛ.

22 Yoshua fa nɛ a kɛ Gibeon bi ɔmɛ ba e hɛ mi, nɛ e bi mɛ ke, “Mɛni he je nyɛ sisi wɔ ke nyɛ je he kɛ, be mi nɛ hiɛmɛ nɛ ɔ nɔuu nyɛ je ɔ?

23 Nɔ́ nɛ nyɛ pee nɛ ɔ he je ɔ, Mawu gbiɛ nyɛ. Nyɛɛ kɛ nyɛ nina maa pee nyɔguɛhi; nyɛ ma gba lɛ́, nɛ nyɛ maa ya pa kɛ ba ye Mawu ɔ we ɔ.”

24 Ni ɔmɛ he nɔ ke, “Wa kpa mo pɛɛ, wa pee ja niinɛ. Wa na le kaa anɔkuale mi ɔ, Yawɛ, nyɛ Mawu ɔ fa e tsɔlɔ Mose ke e ngɔ zugba a tsuo ngɔ ha nyɛ, nɛ e kpata ni ɔmɛ nɛ ngɛ zugba a nɔ tsuo a hɛ mi ngɛ nyɛ blɔ mi. Wa ye gbeye wawɛɛ kaa nyɛ ma ba gbe wɔ; lɔ ɔ he nɛ wa to ga nɛ ɔ nɛ.

25 Wa ngɛ nyɛ dɛ mi. Nɔ́ tsuaa nɔ́ nɛ sa o hɛ mi kaa o pee wɔ ɔ, moo pee wɔ.”

26 Nɔ́ nɛ Yoshua pee ji: e baa ni ɔmɛ a yi. E ha we Israel bi ɔmɛ blɔ nɛ a kpata ni ɔmɛ a hɛ mi.

27 Se kɛ̃ ɔ, e pee mɛ nyɔguɛhi, nɛ a lɛɔ lɛ́, nɛ a yaa pa kɛ haa Israel bi ɔmɛ, kɛ Yawɛ bɔ sami la tɛ ɔ. Kɛ ba si mwɔnɛ ɔ, mɛ nɛ a tsuɔ ní tsumi nɛ ɔ ngɛ he nɛ Yawɛ hla ke a ja lɛ ngɛ ɔ.

Bible in Dangme © Bible Society of Ghana, 2018.

Bible Society of Ghana
ကြှနျုပျတို့နောကျလိုကျပါ:



ကြော်ငြာတွေ