Yoshua 8 - BAIBLO ALOO NGMAMI KLƆUKLƆU Ɔ

A tua Ai nɛ a kpata ma a hɛ mi

¹ Jehanɛ, Yawɛ de Yoshua ke, “O kɛ tabo ɔ tsuo nyɛɛ kuɔ yo ɔ kɛ ya Ai. Sawale kó nu mo, nɛ o tsui kó po hulɔ. Ma ha o maa ye Ai matsɛ ɔ, kɛ e ma a a nɔ, nɛ zugba a tsuo maa pee nyɛ nɔ.

² Ó pee Ai kɛ e matsɛ ɔ kaa bɔ nɛ o pee Yeriko kɛ e matsɛ ɔ; se ta yibu ní ɔmɛ, kɛ we mi lohwe ɔmɛ lɛɛ nyɛɛ ha ha nyɛ he. Nyɛ ya wo ma a he ka, nɛ nyɛ tua lɛ kɛ je e se je.”

³ Yoshua kɛ tabo ɔ tsuo dla a he konɛ a ya tua Ai. E hla katsɛmɛ akpe nyingmi etɛ sɔuu, nɛ e wo mɛ blɔ nyɔ mi.

⁴ E fa mɛ ke, “Nyɛ ya wo ma a he ka ngɛ e se je; nyɛɛ kɛ ma a he kó kɛ kulaa; nyɛ tsuo nyɛɛ pee klaalo.

⁵ Imi lɛɛ i kɛ ye we bi ɔmɛ maa su ma a he haa. Ke Ai bi ɔmɛ je kpo kɛ ba na wɔ ɔ, wa maa tu fo kaa bɔ nɛ wa pee kekle ɔ.

⁶ A ma susu kaa wa ngɛ a nya fo tue kaa kekle ɔ, nɛ a maa nyɛɛ wa se saii kɛ je ma a he.

⁷ Kɛkɛ ɔ, nyɛ ka woli ɔmɛ nyɛ maa je se je ɔ kɛ ba tua ma a; ejakaa Yawɛ, nyɛ Mawu ɔ maa ngɔ ma a ngɔ wo nyɛ dɛ.

⁸ Ke nyɛ ngɔ ma a, nyɛɛ mɛ he la kaa bɔ nɛ Yawɛ fa nyɛ ɔ. Nyɛɛ hyɛ nɛ nyɛɛ pee ja pɛpɛɛpɛ.”

⁹ Kɛkɛ nɛ Yoshua wo mɛ blɔ; nɛ a ya wo Ai ma a he ka. A laa a he ngɛ Betel kɛ Ai a kpɛti, ngɛ Ai bonyoku je, nɛ Yoshua kɛ Israel ma nɛ piɛ ɔ hwɔ ma sito he ɔ jamɛ a nyɔ ɔ mi.

¹⁰ Makɛ mla a, Yoshua te si nɛ e bua ma a nya. E kɛ Israel ma nimeli ɔmɛ nyɛɛ ma a hɛ mi kɛ ho Ai ya.

¹¹ Tabo ɔ tsuo nɛ piɛ e he ɔ hu kuɔ kɛ ho ma a nya ya ya gba ta ngɛ Ai omleyi je; nɛ kɔ̃ ngɛ ta buli ɔmɛ kɛ Ai a kpɛti.

¹² Yoshua ngɔ nihi maa pee akpe enuɔ kɛ ya wo ka ngɛ Betel kɛ Ai a kpɛti, ngɛ Ai bonyoku je.

¹³ A gba ta a: ta ngua a ya je Ai omleyi je, nɛ se ta a ya je bonyoku je. Yoshua hwɔ kɔ̃ ɔ mi jamɛ a nyɔ ɔ mi.

¹⁴ Benɛ Ai matsɛ ɔ na Yoshua ta a, e kɛ e ta buli ɔmɛ tsuo te si mɔtu kpla nɛ a ya tua Israel bi ɔmɛ ngɛ Yordan kɔ̃ ɔ mi, he nɛ a kɛ mɛ kpe ngɛ kekle ɔ. Se matsɛ ɔ li tete kaa a wo lɛ ka ngɛ ma a se je.

¹⁵ Kɛkɛ nɛ Yoshua kɛ Israel ta a tsuo kulaa pee kaa nɔ́ nɛ a ngɛ mɛ fiee, nɛ a tu fo kɛ pule nga a nɔ blɔ.

¹⁶ A tsɛ ma a mi bi ɔmɛ tsuo, nɛ a nyɛɛ Yoshua kɛ e we bi ɔmɛ a se kɛ fo kɛ je ma a mi kɛ ya se saii.

¹⁷ Nyumu ko nyumu ko píɛ ngɛ Ai nɛ ji kpo kɛ nyɛɛ we Israel se kɛ ta; a si ma a ngɔ fɔ si gu.

¹⁸ Jehanɛ, Yawɛ de Yoshua ke, “Wo akplɔ nɛ o hɛɛ ɔ kɛ tsɔɔ Ai; ejakaa ma ngɔ ma a ngɔ wo o dɛ.” Yoshua pee kaa bɔ nɛ a de lɛ ɔ.

¹⁹ Benɛ ka woli ɔmɛ na okadi nɛ ɔ, a te si esɔesɔ kɛ je a laami he ɔ, nɛ a kɛ fo sɛ ma a mi. A ngɔ ma a, nɛ a mɛ he la nɔuu.

²⁰ Benɛ Ai bi ɔmɛ hyɛ a se ɔ, ne la su ku nɛ ngɛ jee ngɛ ma a mi kɛ yaa hiɔwe. A nɛ he nɛ a maa ma fo kɛ gu. Ejakaa Israel bi ɔmɛ nɛ ngɛ fo tue kɛ gu nga a nɔ blɔ ɔ plɛ a hɛ mi kɛ kpee mɛ jehanɛ.

²¹ Benɛ Yoshua kɛ ma a kulaa na kaa ka woli ɔmɛ a nine su ma a nɔ, nɛ ma a mle kɛ la a, a kpale a se, nɛ a ba gbe Ai bi ɔmɛ.

²² Israel bi kpa amɛ nɛ sɛ Ai ma a mi ɔ hu ba piɛ a nyɛmimɛ ɔmɛ a he kɛ sá Ai bi ɔmɛ a yi. A gbe Ai bi ɔmɛ tsuo pɛpɛɛpɛ. A ti nɔ kake po na we blɔ nɛ e tu fo kɛ je; nɔ ko nɔ ko yi na we wami.

²³ Se Ai matsɛ ɔ lɛɛ, a nu lɛ kɛ ba ha Yoshua.

²⁴ Israel bi ɔmɛ gbe Ai bi ɔmɛ nɛ nyɛɛ a se kɛ ho nga a nɔ ya a tsuo pɛpɛɛpɛ. Lɔ ɔ se ɔ, a kpale kɛ ba Ai ma a mi, nɛ a gbe nihi nɛ piɛ ngɛ lejɛ ɔ.

^25-26 Yoshua hɛɛ akplɔ ɔ kɛ tsɔɔ Ai hluu kɛ ya si a kpata nɔ tsuaa nɔ hɛ mi ngɛ ma a mi, loko e ba lɛ si. Nihi abɔ nɛ a gbe jamɛ a ligbi ɔ ji nyumuhi kɛ yihi akpe nyɔngma kɛ enyɔ.

²⁷ Lohwehi kɛ ta yibu níhi pɛ nɛ Israel bi ɔmɛ ha ha a he.

²⁸ Yoshua sã Ai ma a, nɛ e ha e plɛ pee ma doku kɛ ba si mwɔnɛ ɔ.

²⁹ Se Ai matsɛ ɔ lɛɛ Yoshua sɛu lɛ ngɛ tso nɔ, nɛ e si e gbogboe ɔ ngɛ lejɛ ɔ kɛ ya si gbɔkuɛ nya si. Benɛ pu nɔ si ɔ, Yoshua fa nɛ a ya je gbogboe ɔ kɛ je tso ɔ nɔ. A sake lɛ ngɔ fɔ ma agbo ɔ nya, nɛ a to tɛhi glekuu ngɔ pue e nɔ; nɛ tɛ ɔmɛ ngɛ lejɛ ɔ kɛ ba si mwɔnɛ ɔ.

A kane mlaa a ngɛ Ebal yo ɔ nɔ

³⁰ Pee se ɔ, Yoshua ma bɔ sami la tɛ ngɛ Ebal yo ɔ nɔ kɛ ha Yawɛ Israel Mawu ɔ.

³¹ E ma lɛ kaa bɔ nɛ Yawɛ tsɔlɔ Mose fa Israel bi ɔmɛ ke a pee ɔ. Bɔ nɛ a ngma ngɛ Mose mlaa womi ɔ mi ji nɛ ɔ nɛ: “Bɔ sami la tɛ nɛ a kɛ tɛhi nɛ a kɛ dade kó we ma.” A sã sami bɔhi ngɛ nɔ kɛ ha Yawɛ, nɛ a sã tue mi jɔmi bɔhi hulɔ.

³² Lɔ ɔ se ɔ, Yoshua hyɛ Mose mlaa a nɔ, nɛ e ngma mlaa amɛ ja pɛpɛɛpɛ kɛ fɔ tɛ ɔmɛ a nɔ ngɛ Israel bi ɔmɛ a hɛ mi.

³³ Jehanɛ Israel tsuo pɛpɛɛpɛ, ma nimeli, ma nɔ hyɛli, kojoli, nibwɔhi, kɛ ma a mi bi ɔmɛ tsuo ya da si ngɛ somi daka a kasa nya hiɛ kɛ hiɛ, ngɛ Levi bi osɔfo ɔmɛ nɛ hɛɛ Yawɛ somi daka a a hɛ mi. Nihi fa plɛ a se ngɔ wo Gerizim yo ɔ, nɛ nihi fa hu plɛ a se ngɔ wo Ebal yo ɔ. Yawɛ tsɔlɔ Mose nɛ wo mɛ mlaa kaa a pee enɛ ɔ, ke a maa gbaa Israel ma a.

³⁴ Lɔ ɔ se ɔ, Yoshua kane mlaa a mi munyu ɔmɛ tsuo, gbaami kɛ gbiɛmi, kaa bɔ nɛ a ngma ngɛ Mose mlaa womi ɔ mi ɔ pɛpɛɛpɛ.

³⁵ Yoshua kane Mose mlaa amɛ tsuo fitsofitso nɛ e si we ekoeko ha Israel ma kpekpemi ɔ; yihi, jokuɛwi kɛ nibwɔhi nɛ ngɛ a kpɛti tsuo piɛ he.