Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Yoshua 7 - BAIBLO ALOO NGMAMI KLƆUKLƆU Ɔ


Akan pee yayami

1 Yawɛ wo Israel bi ɔmɛ mlaa ke níhi nɛ a ma ya na ngɛ Yeriko, nɛ ji níhi nɛ a ma kpata a hɛ mi ɔ, a ti nɔ ko kó ta eko he, se a tɔ mlaa a. Nɔ ko nɛ a tsɛɛ lɛ Akan ɔ ya ngɔ ní ɔmɛ ekomɛ, nɛ lɔ ɔ he ɔ, Yawɛ mi mi fu Israel bi ɔmɛ wawɛɛ. Akan tsɛ ji Karmi, nɛ e nɛ̃ ji Zabdi. E je Zera we puɔ nya, ngɛ Yuda wɛtso ɔ mi.

2 Yoshua tsɔ nihi kɛ je Yeriko ke a ya slaa Ai nɛ ngɛ Betaven kasa nya, ngɛ Betel beleku je ɔ. Benɛ a kpale kɛ ba a,

3 a de Yoshua ke, “Ko ha nɛ ma a tsuo nɛ ya. Ha nihi maa pee akpe enyɔ, loo akpe etɛ kɛkɛ ya tua Ai. Ko ha nɛ ma a tsuo gba a he nya nɛ a ya lejɛ ɔ, ejakaa ma wayoo kɛkɛ ji Ai.”

4 Lɔ ɔ he ɔ, nihi maa pee akpe etɛ ho ya tua Ai ma a; se a nyɛ we nya nɛ a da.

5 Ai bi ɔmɛ wo mɛ fo kɛ je ma a agbo ɔ nya kɛ ya su he nɛ a gbaa tɛ ngɛ ɔ, nɛ a gbe Israel bi ɔmɛ maa pee nihi nyingmi etɛ kɛ ekpa benɛ a ngɛ si kplee ɔ. Nɛ e pee ja a, Israel ma a tsui po, nɛ a he jɔ kaa nyu.

6 Kɛkɛ nɛ Yoshua kɛ Israel ma nimeli ɔmɛ kɛ aywilɛho hía a tade ɔmɛ ngɛ a he, nɛ a ya bu si ngɛ Yawɛ somi daka a hɛ mi kɛ a yi mi zu kɛ ye kɔmɔ kɛ ya si gbɔkuɛ.

7 Yoshua de ke, “Aa, Nyɔmtsɛ Mawu, mɛni he je o kɛ ma a po Yordan pa a kɛ ba hiɛ ɔ kulaa lɛɛ? O kɛ wɔ ba ha Amor bi ɔmɛ nɛ a kpata wa hɛ mi lo? Mɛni he je wa hí Yordan pa a se kɛkɛ?

8 Nyɔmtsɛ, nɛ Israel ngɛ fo tue ngɛ he nyɛli ɔmɛ a hɛ mi nɛ ɔ, kɛ ma de kɛɛ?

9 Kanaan bi ɔmɛ, kɛ zugba a nɔ bi ɔmɛ tsuo maa nu he. A ma ba sa wa yi, nɛ a ma kpata wa hɛ mi pɛsɛpɛsɛ. O biɛ kpetekpleenyɛ ɔ, o maa hi hyɛe nɛ e puɛ lo?”

10 Kɛkɛ nɛ Yawɛ de Yoshua ke, “Tee si koo! Mɛni he je o kɛ o hɛ mi bu zugba kikɛ nɛ ɔ?

11 Israel pee yayami! A yi somi nɛ i kɛ mɛ so ɔ nɔ; a ngɔ ní ɔmɛ nɛ i ke a kpata a hɛ mi ɔ ekomɛ kɛ piɛ mɛ nitsɛmɛ a níhi a he; a ju, nɛ a to lakpa.

12 Enɛ ɔ he je nɛ Israel bi ɔmɛ nyɛ we a he nyɛli ɔmɛ nɛ; a ngɛ fo tue ngɛ a nya, ejakaa mɛ nitsɛmɛ hu a plɛ pee níhi nɛ sa nɛ a kpata a hɛ mi! I kɛ nyɛ be si hie hu; ja nyɛ kpata níhi nɛ i wo nyɛ mlaa ke nyɛ ko ta he ɔ a hɛ mi!

13 Tee si, nɛ o tsukɔ ma a he, nɛ o ha a pee a he klɔuklɔu ngɛ ye hɛ mi. De mɛ ke hwɔɔ je nɛ maa na a, a dla a he; ejakaa nɔ́ nɛ imi Yawɛ, Israel Mawu ɔ, i ngɛ mɛ dee ji nɛ ɔ nɛ: ‘Níhi nɛ i wo nyɛ mlaa ke nyɛ kpata a hɛ mi ɔ ekomɛ ngɛ nyɛ dɛ! Nyɛ be he nyɛli ɔmɛ a nya nyɛe maa da, ja nyɛ je musu ní ɔmɛ kɛ je nyɛ kpɛti!’

14 Lɔ ɔ he ɔ, de ma a ke hwɔɔ mɔtu ɔ, a kɛ mɛ maa ba hiɛ ɔ wɛtso nya wɛtso nya. Wɛtso nɛ imi Yawɛ, ma tsɔɔ ɔ, a maa ba we puɔ nya we puɔ nya. We puɔ nya nɛ ma tsɔɔ ɔ, a maa ba weku nya weku nya. Weku nɛ ma tsɔɔ ɔ mi nyumu ɔmɛ maa ba kakaaka.

15 Nɔ nɛ a maa na musu ní ɔmɛ ngɛ e dɛ ɔ, a kɛ la maa sã lɛ, kɛ e weku li, kɛ e nɔ́ tsuaa nɔ́. Ejakaa e tsu zo ní ngɛ Israel, nɛ imi Yawɛ, ye somi ɔ hu e yi nɔ.”

16 Yoshua te si makɛ mla, nɛ e ha Israel bi ɔmɛ ba wɛtso nya wɛtso nya, nɛ a nu Yuda wɛtso ɔ.

17 E ha Yuda wɛtso ɔ ba we puɔ nya we puɔ nya, nɛ a nu Zera we puɔ nya. Jehanɛ, e ha Zera we puɔ nya a ba weku nya weku nya, nɛ a nu Zabdi weku ɔ.

18 Lɔ ɔ se ɔ, e ha Zabdi we ɔ mi nyumu ɔmɛ ba kakaaka, nɛ a nu Karmi bi Akan, Zabdi bibi ɔ.

19 Yoshua de Akan ke, “Ye bi, tu mi anɔkuale, nɛ o de mi nɔ́ nɛ o pee ɔ ngɛ Yawɛ, Israel Mawu ɔ hɛ mi. Mo de mi koo; mɛni o pee? Koo laa mi ba.”

20 Akan he nɔ nɛ e de Yoshua ke, “Niinɛ, i pee yayami kɛ si Yawɛ, Israel Mawu ɔ; nɔ́ nɛ i pee ji nɛ ɔ nɛ:

21 i na Babilonia bo kpakpa ko, kɛ sika hiɔ kilo enyɔ, kɛ sika tsu kpɔ kake nɛ ngmɛɛ kilo fa ngɛ ta yibu ní ɔmɛ a mi; ye hɛ kɔ ní ɔmɛ a nɔ, nɛ i muɔ mɛ. I pu mɛ ngɛ ye bo tsu ɔ mi, nɛ sika hiɔ ɔ ngɛ ní ɔmɛ a sisi.”

22 Kɛkɛ nɛ Yoshua tsɔ ni komɛ esɔesɔ kɛ ho Akan bo tsu ɔ mi ya. Benɛ a ya a, a ya na ní ɔmɛ nɛ a pu, nɛ sika hiɔ ɔ ngɛ sisi niinɛ.

23 A muɔ ní ɔmɛ kɛ je bo tsu ɔ mi kɛ ba Yoshua kɛ Israel bi ɔmɛ tsuo a ngɔ, nɛ a kɛ ba pue si ngɛ Yawɛ hɛ mi.

24 Kɛkɛ nɛ Yoshua kɛ Israel bi ɔmɛ tsuo nu Akan, Zera bi ɔ, e binyumu ɔmɛ, e biyi ɔmɛ, kɛ e we mi lohwe ɔmɛ tsuo: na, teji, kɛ to. Jehanɛ, a muɔ e bo tsu ɔ, kɛ musu ní ɔmɛ nɛ ji sika hiɔ ɔ, bo ɔ, sika tsu kpɔ kake ɔ, kɛ e nɔ́ tsuaa nɔ́. A kɛ nimli ɔmɛ, lohwe ɔmɛ, kɛ ní ɔmɛ tsuo ho Haomi Kɔ̃ ɔ mi ya.

25 Jehanɛ Yoshua bi Akan ke, “Mɛni he je o hao wɔ kikɛ nɛ ɔ? Mwɔnɛ nɛ ɔ, Yawɛ hu maa hao mo!” Kɛkɛ nɛ Israel ma a tsuo fia Akan tɛ nɛ e gbo; a fia e weku li ɔmɛ hu tɛ, nɛ a kɛ la sã lɛ, kɛ e weku li, kɛ e nɔ́ tsuaa nɔ́.

26 A bua tɛ ɔmɛ a nya glekuu ngɔ pue e nɔ, nɛ tɛ ɔmɛ ngɛ lejɛ ɔ kɛ ba si mwɔnɛ ɔ. Enɛ ɔ he je nɛ a wo lejɛ ɔ biɛ ke Haomi Kɔ̃ ɔ nɛ. Kɛkɛ nɛ Yawɛ mi mi fumi ɔ se po.

Bible in Dangme © Bible Society of Ghana, 2018.

Bible Society of Ghana
ကြှနျုပျတို့နောကျလိုကျပါ:



ကြော်ငြာတွေ