Yoshua 6 - BAIBLO ALOO NGMAMI KLƆUKLƆU Ɔ

Yeriko hɛ mi kpatami

¹ A ngmɛ Yeriko agbo ɔmɛ a mi kpɛii, bɔ nɛ pee nɛ Israel bi ɔmɛ ko na blɔ kɛ sɛ ma a mi. Nɔ ko nɔ ko ji kpo ɔ, nɔ ko nɔ ko bɛ mi.

² Yawɛ de Yoshua ke, “I ngɔ Yeriko, kɛ a matsɛ ɔ, kɛ a ta buli katsɛmɛ ɔmɛ tsuo ngɔ wo o dɛ.

³ O kɛ o ta buli ɔmɛ tsuo nɛ bɔle ma a si kake daa ligbi. Nyɛɛ pee ja ligbi ekpa.

⁴ Osɔfohi kpaago nɛ a hɛɛ titimati kpaago nɛ a kɛ agbosu koli pee kɛ nyɛɛ somi daka a hɛ mi. Ligbi kpaagone ɔ nɔ ɔ, nyɛɛ bɔle ma a si kpaago, nɛ osɔfo ɔmɛ nɛ a hi titimati ɔmɛ kpae.

⁵ Ke nyɛ nu nɛ a kpa bɛ ɔ nɛ e se kɛ ɔ, Israel ma a tsuo nɛ he ose wawɛɛ. Ke nyɛ pee ja a, Yeriko gbogbo ɔmɛ maa hule pue si tɛtlɛɛ. Kɛkɛ ɔ, nɔ tsuaa nɔ ma bu kɛ sɛ ma a mi.”

⁶ Jehanɛ, Nun bi Yoshua tsɛ osɔfo ɔmɛ nɛ e de mɛ ke, “Nyɛ wo somi daka a, nɛ nyɛ ti nihi kpaago nɛ a hɛɛ titimati kɛ nyɛɛ daka a hɛ mi.”

⁷ Lɔ ɔ se ɔ, e de mɛ ke, “Nyɛɛ ya nyɛ hɛ mi! Nyɛɛ nyɛɛ kɛ bɔle Yeriko ma a. Nyɛ ha nɛ hlami ta a nɛ sɛ Yawɛ somi daka a hɛ mi.”

^8-9 Lɔ ɔ he ɔ, kaa bɔ nɛ Yoshua fa ma a, hlami ta a hia kɛ́ nyɛɛ osɔfo kpaago ɔmɛ nɛ ngɛ titimati ɔmɛ kpae ɔ a hɛ mi. Osɔfo ɔmɛ nɛ hɛɛ somi daka a nyɛɛ a se, nɛ se ta a gbe nya. Benɛ a yaa a tsuo, titimati ɔmɛ ngɛ pɛe.

¹⁰ Yoshua fa ma a ke, “Nyɛ ko kpa ngmlaa, nɛ nyɛ ko ha nɛ a nu nyɛ he; nyɛ ko tu munyu kulaa kɛ yaa su ligbi ɔ nɛ ma de nyɛ ke nyɛ he ose.”

¹¹ E ha a kɛ Yawɛ daka a ya bɔle ma a si kake pɛ nɛ a kpale kɛ ba ma sito he ɔ ekohu nɛ a ba hwɔ lejɛ ɔ.

^12-13 E nɔ jena makɛ mla a, Yoshua te si nɛ e kɛ osɔfo ɔmɛ, kɛ tabo ɔ tsuo ya bɔle ma a kaa bɔ nɛ a pee kekleekle ligbi ɔ: hlami ta a hia, nɛ osɔfo ɔmɛ nɛ kpaa titimati ɔmɛ ɔ nyɛɛ se; jehanɛ, osɔfo ɔmɛ nɛ hɛɛ Yawɛ somi daka a ba, nɛ se ta a gbe nya. Benɛ a ngɛ ma a bɔlee ɔ tsuo titimati ɔmɛ ngɛ pɛe.

¹⁴ Ligbi enyɔne ɔ hu a bɔle ma a si kake, nɛ a kpale kɛ ba a sito he ɔ. A pee ja ligbi ekpa.

¹⁵ Ligbi kpaagone ɔ, a te si makɛ mla, nɛ a bɔle ma a jã kɛ̃ si kpaago sɔuu. Jamɛ a ligbi ɔ nɔ pɛ nɛ a bɔle ma a si kpaago.

¹⁶ Si kpaagone ɔ, benɛ osɔfo ɔmɛ ma bɔni titimati ɔmɛ kpami pɛ nɛ Yoshua fa ma a ke, “Nyɛ he ose, ejakaa Yawɛ ngɔ ma a ngɔ wo nyɛ dɛ!

¹⁷ Nyɛ kpata ma a kɛ e mi nɔ́ tsuaa nɔ́ hɛ mi ha Yawɛ; Rahab, yo ajuama a, kɛ nɔ tsuaa nɔ nɛ kɛ lɛ ngɛ e we ɔ mi ɔ, mɛ pɛ a yi nɛ na wami; ejakaa e ngɔ slaali ɔmɛ nɛ wa tsɔ ɔ kɛ laa.

¹⁸ Nyɛɛ yu nyɛ he kɛ je níhi nɛ a ma kpata a hɛ mi ɔ a he, bɔ nɛ pee nɛ nyɛ hɛ ko ba kɔ a nɔ, nɛ nyɛ ba ngɔ eko. Ke nyɛ pee ja a, nyɛɛ kɛ haomi, kɛ hɛ mi kpatami maa ba Israel tsuo nɔ.

¹⁹ Sika hiɔ, sika tsu, akɔblee, kɛ dade níhi tsuo lɛɛ a hla kɛ to ha Yawɛ, lɔ ɔ he ɔ, a ngɔ kɛ ba Yawɛ nito he ɔ.”

²⁰ Kɛkɛ nɛ osɔfo ɔmɛ bɔni titimati ɔmɛ kpami. Benɛ ma a nu titimati pɛmi ɔ, a he ose wawɛɛ nitsɛ. Kɛkɛ nɛ Yeriko gbogbo ɔ hule pue si. Tabo ɔ tsuo bu kɛ sɛ ma a mi; nɔ tsuaa nɔ nyɛɛ kɛ ya e hɛ mi tɛɛ; nɛ a ya ngɔ ma a.

²¹ A kɛ klaate kpata nɔ tsuaa nɔ hɛ mi ngɛ ma a mi: nyumuhi, yihi, jokuɛwi, kɛ nikɔtɔmahi. A kpata nahi, tohi, kɛ tejihi hu a hɛ mi.

²² Lɔ ɔ se ɔ, Yoshua de nihewi enyɔ nɛ ya slaa zugba a ke, “Nyɛɛ ya yo ajuama a we ɔ mi nɛ nyɛ ya ngɔ lɛ, kɛ e weku li nɛ ngɛ lejɛ ɔ kɛ ba kaa bɔ nɛ nyɛ ka lɛ kita a.”

²³ Kɛkɛ nɛ nihewi ɔmɛ ho nɛ a ya ngɔ Rahab kɛ e tsɛ, kɛ e nyɛ, e nyɛmimɛ ɔmɛ, kɛ e weku li kpa amɛ tsuo kɛ ba. A ha nɛ a kɛ a nyɔguɛ ɔmɛ tsuo ya hi Israel bi ɔmɛ a ma sito he ɔ se.

²⁴ Jehanɛ, a kɛ la sa ma a, kɛ e mi níhi tsuo; se sika hiɔ, sika tsu, akɔblee, kɛ dade níhi lɛɛ a kɛ to Yawɛ we ɔ nito he ɔ.

²⁵ Yoshua baa Rahab, yo ajuama a, kɛ e weku li ɔmɛ tsuo a yi; ejakaa e ngɔ slaali enyɔ ɔmɛ nɛ Yoshua tsɔ Yeriko ɔ kɛ laa. Rahab nina kɛ Israel bi ɔmɛ ngɛ kɛ ba si mwɔnɛ ɔ.

²⁶ Jamɛ a be ɔ mi ɔ, Yoshua ka kita ke, “Nɔ tsuaa nɔ nɛ maa ka kaa e maa ma Yeriko ekohu ɔ, Yawɛ nɛ gbiɛ lɛ. Nɔ nɛ maa to sisi ɔ, e bitɛte nɛ gbo, nɔ nɛ maa gbe nya nɛ a maa ma nya agbo ɔ, e binakutso nɛ gbo.”

²⁷ Yawɛ piɛ Yoshua he, nɛ e he biɛ kpakpa ngɛ zugba a nɔ tsuo.