Yoshua 5 - BAIBLO ALOO NGMAMI KLƆUKLƆU Ɔ

¹ Amor bi ɔmɛ a matsɛmɛ ɔmɛ tsuo nɛ ngɛ Yordan pa a se ngɛ bonyoku je ɔ, kɛ Kanaan bi ɔmɛ a matsɛmɛ ɔmɛ tsuo nɛ ngɛ Mediterenia wo ɔ nya a nu kaa Yawɛ ha Yordan nyu ɔ mii ha Israel bi ɔmɛ kɛ ya su be nɛ mɛ tsuo a po pa a ta. Nɔ́ nɛ ɔ ha nɛ a tsui po, nɛ mɛ tsuo a ka nya ta ngɛ Israel bi ɔmɛ a he.

A po Israel bi ɔmɛ ngɛ Gilgal

² Pee se ɔ, Yawɛ de Yoshua ke, “Ngɔɔ tɛ nɛ o kɛ pee ha, nɛ o po Israel bi ɔmɛ si enyɔne.”

³ Kɛkɛ nɛ Yoshua pee tɛ hahi, nɛ e kɛ po Israel bi ɔmɛ ngɛ Gibeat Haaralot nɛ sisi ji “Nɔ Pomi Yoku ɔ”.

^4-6 Benɛ Israel bi ɔmɛ je Egipt ɔ, a po nyumu ɔmɛ tsuo momo. Se jeha nyingmi eywiɛ ɔ nɛ ma a nyɛɛ nga kplanaa a nɔ ɔ, binyumuwi nɛ a fɔ jamɛ a be ɔ mi ɔ, mɛɛ a pui mɛ lolo. Jehanɛ hu, ta buli nɛ a kɛ je Egipt ɔ, mɛ tsuo a hɛ mi kpata ngɛ blɔ ɔ nɔ; ejakaa a bui Yawɛ gbi tue. Lɔ ɔ he ɔ, kaa bɔ nɛ Yawɛ ka kita a, e ha we nɛ a na zugba kpakpa nɛ baa ní ɔ nɛ e wo a nɛmɛ ɔmɛ si ke e ma ha mɛ ɔ.

⁷ Nimli nɛ ɔmɛ a bimɛ ɔmɛ ɔ, a pui mɛ, nɛ mɛ ji yi nɔ he nɛ Yoshua po mɛ ɔ nɛ.

⁸ Benɛ a po ni ɔmɛ tsuo ta a, ma a tsuo hi a sito he ɔ kɛ ya su be nɛ pa amɛ gbo ta.

⁹ Lɔ ɔ se ɔ, Yawɛ de Yoshua ke, “Mwɔnɛ ɔ, i jé Egipt nyɔguɛ peemi zo ɔ kɛ je nyɛ nɔ.” Lɔ ɔ he ɔ, a wo lejɛ ɔ biɛ ke Gilgal, nɛ jã nɛ a tsɛɛ lejɛ ɔ kɛ ba si mwɔnɛ ɔ.

¹⁰ Benɛ Israel ma a pueɔ si ngɛ Gilgal ngɛ Yeriko nga a nɔ ɔ, a ye Hetsɔmi ɔ ngɛ nyɔhiɔ ɔ ligbi nɛ ji nyɔngma kɛ eywiɛ ɔ nɔ.

¹¹ E nɔ jena a ji kekleekle ligbi nɛ a ye zugba a nɔ niba ní: abolo kplolo kɛ ngma nɛ a si.

¹² Jamɛ a ligbi ɔ nɔuu ɔ, niye ní nɛ nɛɛ kɛ jee hiɔwe ɔ se po, nɛ Israel bi ɔmɛ nɛ́ eko hu. Kɛ je jamɛ a be ɔ kɛ yaa a, zugba a nɔ niba ní ji nɔ́ nɛ a yeɔ.

Yoshua kɛ nyumu ɔ nɛ hɛɛ klaate ɔ

¹³ Benɛ Yoshua su Yeriko haa nɛ e wo e yi nɔ ɔ, e na nyumu ko nɛ hɛɛ klaate kɛ daa si ngɛ e hɛ mi. Yoshua ya e ngɔ nɛ e ya bi lɛ ke, “Wa nɔ ji mo, loo wa he nyɛlɔ ji mo?”

¹⁴ Nyumu ɔ he nɔ ke, “Dɛbi, mohu ɔ, i ba kaa Yawɛ tabo ɔ nyatsɛ.” Kɛkɛ nɛ Yoshua ngɔ e hɛ mi ngɔ bu zugba nɛ e ja lɛ, nɛ e de lɛ ke, “I kpa mo pɛɛ, o tsɔlɔ ji mi. Mɛni o ngɛ hlae nɛ ma pee ha mo?”

¹⁵ Yawɛ tabo ɔ nyatsɛ ɔ de Yoshua ke, “Je o tokota a; zugba klɔuklɔu nɔ o daa si ngɛ ɔ nɛ.” Nɛ Yoshua pee ja.