Yoshua 24 - BAIBLO ALOO NGMAMI KLƆUKLƆU Ɔ

Yoshua tu munyu kɛ tsɔɔ Israel bi ɔmɛ ngɛ Shekem

¹ Yoshua bua Israel wɛtso ɔmɛ a nya kɛ ba kpe ngɛ Shekem. E tsɛ ma nimeli ɔmɛ, asafoatsɛmɛ ɔmɛ, kojoli ɔmɛ, kɛ Israel tsɔli ɔmɛ kɛ ba Mawu hɛ mi.

² Yoshua de ma a tsuo ke, “Nɔ́ nɛ Yawɛ, Israel Mawu ɔ ngɛ nyɛ dee ji nɛ ɔ nɛ: ‘Blema lokoo ɔ, nyɛ nɛmɛ ɔmɛ hi Yufrate pa a se, nɛ a ja mawu kpahi. Nyɛ nɛmɛ ɔmɛ a ti nɔ kake nɛ a tsɛɛ lɛ Tera a ji Abraham kɛ Nahor a tsɛ.

³ I ngɔ nyɛ nɛ̃, Abraham kɛ je zugba a nɛ ngɛ Yufrate pa a se ɔ nɔ, nɛ i kpaka lɛ kɛ gu Kanaan zugba a tsuo nɔ, nɛ i ha lɛ nina babauu. I ha lɛ Isak.

⁴ I ha Isak fɔ Yakob kɛ Esau. I ngɔ Edom yo nɔ zugba a ngɔ ha Esau kaa e weto ní; se nyɛ nɛ̃, Yakob kɛ e bimɛ ɔmɛ lɛɛ a ya hi Egipt.

⁵ Pee se ɔ, i tsɔ Mose kɛ Aaron Egipt, nɛ i ha haomi nɛ nya wa ba Egipt nɔ. Se nyɛɛ lɛɛ i kpaka nyɛ kɛ je lejɛ ɔ;

⁶ i je nyɛ nɛmɛ ɔmɛ kɛ je Egipt, nɛ Egipt bi ɔmɛ nyɛɛ a se kɛ ta zugba lɛhi, kɛ ta okpɔngɔ nɔ hili. Benɛ nyɛ nɛmɛ ɔmɛ ya su Wo Tsu ɔ he ɔ,

⁷ a fa kue ha mi, nɛ i ha diblii wo ngɛ a kɛ Egipt bi ɔmɛ a kpɛti. Nyagbe ɔ, i ha wo ɔ ba ha Egipt bi ɔmɛ a nɔ. Nyɛ nitsɛmɛ nyɛ na nɔ́ nɛ i pee Egipt ɔ. “ ‘Nyɛ hi nga kplanaa a nɔ be babauu.

⁸ Pee se ɔ, i ngɔ nyɛ kɛ ba Amor bi ɔmɛ a zugba a nɔ, ngɛ Yordan pa a beleku je. A kɛ nyɛ hwu ta; se i ha nyɛ ye a nɔ, nɛ nyɛ ngɔ a zugba a. I kpata a hɛ mi, nɛ i ha nyɛ blɔ mi tɛ̃ ha nyɛ.

⁹ Lɔ ɔ se ɔ, Zipor bi Balak, Moab matsɛ ɔ kɛ nyɛ ba hwu ta. E tsɔ ya de Beor binyumu Balaam ke e gbiɛ nyɛ.

¹⁰ Se i bui Balaam tue; lɔ ɔ he ɔ, e gbaa nyɛ mohu. Blɔ nɔ nɛ i gu kɛ je nyɛ kɛ je Balak dɛ mi ji nɛ ɔ nɛ.

¹¹ Nyɛ po Yordan pa a, nɛ nyɛ ba Yeriko. Yeriko bi ɔmɛ kɛ nyɛ hwu ta kaa bɔ nɛ Amor, Periz, Kanaan, Hit, Girgash, Hiv, kɛ Yebus bi ɔmɛ tsuo hu kɛ nyɛ hwu ta a. Se i ha nyɛ ye mɛ tsuo a nɔ.

¹² Benɛ nyɛ ngɛ blɔ ɔ nɔ kɛ ma a, i ha sawale nu mɛ. I pee enɛ ɔ kɛ fie Amor matsɛmɛ enyɔ ɔmɛ kɛ je nyɛ blɔ mi. Pi nyɛ klaate, nɛ pi nyɛ kɛ̃ɛ̃ nɛ ye kunimi nɛ ɔ.

¹³ I ha nyɛ zugba nɛ́ nyɛ gbo we he dengme ko, kɛ mahi nɛ pi nyɛ nɛ nyɛ po. Amlɔ nɛ ɔ, nyɛ ngɛ lejɛ ɔ, nɛ nyɛ ngɛ wai ngmɔ ɔmɛ, kɛ oliv ngmɔ ɔmɛ nɛ pi nyɛ nɛ nyɛ tsu a he ní ɔ a mi ní yee.’ ”

¹⁴ Yoshua ya nɔ nɛ e de ke, “Lɔ ɔ he ɔ, nyɛɛ ye Yawɛ gbeye, nɛ nyɛ sɔmɔ lɛ saminya ngɛ anɔkuale mi. Nyɛ je mawu ɔmɛ nɛ nyɛ nɛmɛ ɔmɛ ja ngɛ Mesopotamia kɛ Egipt ɔ ngɔ pue he, nɛ nyɛ sɔmɔ Yawɛ pɛ.

¹⁵ Ke nyɛ sume kaa nyɛ ma sɔmɔ lɛ ɔ, nyɛɛ tsɔɔ mwɔnɛ nɛ ɔ nɔ nɛ nyɛ ma sɔmɔ; ke mawu ɔmɛ nɛ nyɛ nɛmɛ ɔmɛ ja ngɛ Mesopotamia a jio, loo Amor bi ɔmɛ nɛ nyɛ ngɛ a zugba a nɔ ɔ a mawu ɔmɛ jio. Se imi kɛ ye we ɔ lɛɛ, wa ma sɔmɔ Yawɛ.”

¹⁶ Ma a he nɔ ke, “Wa be Yawɛ sie nɛ wa ya sɔmɔ mawu kpahi!

¹⁷ Yawɛ, wa Mawu ɔ lɛ je wɔ, kɛ wa nɛmɛ ɔmɛ kɛ je nyɔguɛ yemi mi ngɛ Egipt, nɛ wa na nyakpɛ níhi nɛ e pee ɔ. E baa wa yi, nɛ e je wɔ kɛ je wa he nyɛli ɔmɛ a dɛ mi ngɛ he tsuaa he nɛ wa gu ɔ.

¹⁸ Yawɛ fie je ma amɛ, kɛ Amor bi ɔmɛ tsuo nɛ ngɛ zugba a nɔ ɔ kɛ je wa blɔ mi. Lɔ ɔ he ɔ, wɔ hu Yawɛ lɛ wa ma sɔmɔ; lɛ ji wa Mawu.”

¹⁹ Yoshua ya nɔ, nɛ e de ma a ke, “E ngɛ mi ja; se eko ɔ, nyɛ be Yawɛ nyɛe ma sɔmɔ. Mawu klɔuklɔu ji lɛ, nɛ e kɛ nyɛ tɔmi ɔmɛ, kɛ yayami ɔmɛ be nyɛ pae. A kɛ lɛ plee we nɔ́ he,

²⁰ nɛ ke nyɛ si lɛ nɛ nyɛ ya sɔmɔ ma se mawuhi ɔ, e mi mi maa wo la, nɛ e maa gbla nyɛ tue. E ngɛ mi kaa e pee nyɛ kpakpa hyɛ lɛɛ, se e ma kpata nyɛ hɛ mi.”

²¹ Ma a de Yoshua ke, “Dɛbi! Wa ma sɔmɔ Yawɛ.”

²² Jehanɛ, Yoshua de mɛ ke, “Nyɛ nitsɛmɛ ji odase yeli kaa nyɛ de ke nyɛ ma sɔmɔ Yawɛ.” Ma a he nɔ ke, “Ee, wɔ lɛ wa de ja; odase yeli ji wɔ.”

²³ Yoshua kɛ fɔ a hɛ mi ke, “Ke jã a, lɛɛ nyɛ je ma se mawu ɔmɛ ngɔ hɛ pue he, nɛ nyɛɛ wo si kaa nyɛ maa ye Yawɛ, Israel Mawu ɔ anɔkuale.”

²⁴ Ma a de Yoshua ke, “Wa ma sɔmɔ Yawɛ, wa Mawu ɔ. Wa maa ye e mlaa amɛ a nɔ.”

²⁵ Lɔ ɔ he ɔ, Yoshua kɛ ma a so somi jamɛ a ligbi ɔ ngɛ Shekem, nɛ e wo mɛ mlaahi, nɛ e tsɔɔ mɛ blɔ nya tomihi nɛ́ a ye nɔ.

²⁶ Yoshua ngma mlaa nɛ ɔmɛ kɛ wo Mawu mlaa womi ɔ mi. Lɔ ɔ se ɔ, e ngɔ tɛ agbo ko ngɔ ma tso ngua a sisi ngɛ Yawɛ he klɔuklɔu ɔ.

²⁷ E de ma a tsuo ke, “Tɛ nɛ ɔ maa pee odase ha wɔ. E nu munyu ɔmɛ tsuo nɛ Yawɛ kɛ wɔ tu ɔ. Lɔ ɔ he ɔ, ke e ba mi kaa nyɛ tsɔ nyɛ Mawu ɔ hɛ mi atuã a, e maa ye odase kɛ si nyɛ.”

²⁸ Jehanɛ, Yoshua wo ma a blɔ, nɛ nɔ tsuaa nɔ kpale kɛ ho lɛ nitsɛ e tita nɔ ya.

Yoshua kɛ Eleazar gbo

²⁹ Enɛ ɔ se ɔ, Yawɛ tsɔlɔ Yoshua, Nun bi ɔ ba gbo. E ye jeha lafa kɛ nyɔngma.

³⁰ A pu lɛ ngɛ lɛ nitsɛ e zugba nɔ, ngɛ Timnat Sera, ngɛ Efraim yo ɔ nɔ, ngɛ Gaash yo ɔ omleyi je.

³¹ Yoshua wami ligbi ɔmɛ tsuo ɔ, ma a sɔmɔ Yawɛ. Yoshua gbenɔ se, be mi nɛ ma nimeli nɛ na ní nguanguahi tsuo nɛ Yawɛ tsu ha Israel ɔ na we nɛ a gbo lolo ɔ, a ya nɔ nɛ a sɔmɔ Yawɛ ja nɔuu.

³² A pu Yosef wuhi nɛ Israel bi ɔmɛ ngɔ kɛ je Egipt kɛ ba a ngɛ Shekem, ngɛ zugba ko nɛ Yakob he ɔ mi. E he zugba nɛ ɔ kɛ sika hiɔ kpɔ lafa ngɛ Shekem tsɛ, Hamor bimɛ ɔmɛ a dɛ. Zugba nɛ ɔ ba pee Yosef nina a weto ní.

³³ Aaron bi Eleazar hu ba gbo, nɛ a pu lɛ ngɛ Gibea ngɛ Efraim yo ɔ nɔ, he nɛ a ngɔ kɛ ha e binyumu Finehas ɔ.