Yoshua 23 - BAIBLO ALOO NGMAMI KLƆUKLƆU Ɔ

Yoshua sɛ yemi munyu

¹ Be saii se ɔ, Yawɛ ha Israel tue mi jɔmi, nɛ a he nyɛli ɔmɛ nɛ bɔle mɛ ɔ doo we a nya hu. Jamɛ a be ɔ mi ɔ, Yoshua bwɔ kotokoto.

² Lɔ ɔ he ɔ, e tsɛ Israel ma a tsuo kɛ ba e ngɔ: ma nimeli, asafoatsɛmɛ, kojoli, kɛ tsɔli. E de mɛ ke, “Amlɔ nɛ ɔ, i bwɔ.

³ Nyɛ na bɔ nɛ Yawɛ, nyɛ Mawu ɔ pee je ma nɛ ɔmɛ tsuo ngɛ nyɛ he. Yawɛ, nyɛ Mawu ɔ ji nɔ nɛ hwu ta ha nyɛ.

⁴ I dla weto ní ngɔ ha nyɛ wɛtso ɔmɛ momo. Lɔ ɔ ji je ma amɛ nɛ a yi a nɔ lolo ɔ, kɛ je ma amɛ tsuo nɛ i ye a nɔ momo ɔ a zugba amɛ, kɛ je Yordan pa a nya ngɛ beleku je, kɛ ya su Mediterenia wo ɔ nya ngɛ bonyoku je.

⁵ Yawɛ, nyɛ Mawu ɔ ma ha nyɛ he nyɛli ɔmɛ maa gbee senyasenya; nɛ e maa fie mɛ kɛ je nyɛ blɔ mi. Nyɛ maa ngɔ a zugba a kaa bɔ nɛ Yawɛ, nyɛ Mawu ɔ wo nyɛ si ɔ.

⁶ Lɔ ɔ he ɔ, nɔ́ tsuaa nɔ́ nɛ a ngma ngɛ Mose mlaa womi ɔ mi ɔ, nyɛɛ ye nɔ sisiisi. Nyɛ ko si eko,

⁷ bɔ nɛ pee nɛ nyɛɛ kɛ je ma nɛ ɔmɛ nɛ piɛ ngɛ nyɛ kpɛti ɔ ko bɔ. Nyɛ ko wo a mawu ɔmɛ a ta, nɛ nyɛɛ kɛ a biɛhi kó ka kita; nyɛ ko ja mɛ, nɛ nyɛ ko kpla si ha mɛ.

⁸ Mohu ɔ, nyɛɛ ye Yawɛ anɔkuale, kaa bɔ nɛ nyɛ ye lɛ anɔkuale kɛ ba su mwɔnɛ ɔ.

⁹ Yawɛ fie je ma nguahi nɛ a he wa kɛ je nyɛ blɔ mi, nɛ a ti nɔ ko nɔ ko nyɛ we nyɛ.

¹⁰ Nyɛ ti nɔ kake ma nyɛ wo nihi akpe fo, ejakaa Yawɛ, nyɛ Mawu ɔ ngɛ ta hwue ha nyɛ kaa bɔ nɛ e wo si ɔ.

¹¹ Lɔ ɔ he ɔ, nyɛɛ hyɛ saminya, nɛ nyɛɛ suɔ Yawɛ, nyɛ Mawu ɔ.

¹² Ke nyɛ kpale ngɛ e se, nɛ nyɛɛ kɛ je ma amɛ nɛ piɛ ngɛ nyɛ kpɛti ɔ ya bɔ, nɛ nyɛ ha nyɛ yi ɔmɛ gba mɛ, nɛ nyɛ hu nyɛ ngɔ a yi ɔmɛ ɔ,

¹³ nyɛ na nɛ nyɛɛ le kaa, ke nyɛ hia kɛ yaa a, Yawɛ, nyɛ Mawu ɔ be je ma nɛ ɔmɛ fiee kɛ je nyɛ blɔ mi hu. Mohu ɔ, nyɛ he nyɛli ɔmɛ maa pee kaa klama ko nɛ a tsɔ nyɛ, loo muɔ nɛ a tsua ngɛ nyɛ sisi. A maa pee kaa kpa nɛ a kɛ ngɛ nyɛ se mi fiae, nɛ maa sãã nyɛ, loo mio nɛ ngɛ nyɛ hɛngmɛ mi gbɔɔe. Nɔ́ nɛ ɔ ma tsa nɔ kɛ yaa si be nɛ nyɛ ti nɔ ko nɔ ko be piɛe ngɛ zugba kpakpa nɛ ɔ nɛ Yawɛ, nyɛ Mawu ɔ ngɔ ha nyɛ ɔ nɔ.

¹⁴ “Jehanɛ, ye gbenɔ be su. Nyɛ ti nɔ tsuaa nɔ le ngɛ e tsui mi, kɛ e klaa mi kaa Yawɛ, nyɛ Mawu ɔ ha nyɛ ní kpakpa amɛ tsuo nɛ e wo si ke e ma ha nyɛ ɔ. E ye e si womi ɔmɛ tsuo kulaa nɔ; e si we eko.

¹⁵ Se, kaa bɔ nɛ Yawɛ, nyɛ Mawu ɔ ha nyɛ ní kpakpahi tsuo nɛ e wo nyɛ a he si ɔ, jã kɛ̃ e maa gbla nyɛ tue kɛ yaa si nyɛ hɛ mi ma kpata ngɛ zugba kpakpa nɛ ɔ nɔ, ke nyɛ bui lɛ tue ɔ.

¹⁶ Ke nyɛ yi somi nɛ Yawɛ, nyɛ Mawu ɔ kɛ nyɛ so ɔ nɔ, nɛ nyɛ ya sɔmɔ mawu kpahi, nɛ nyɛ ja mɛ ɔ, lɔ ɔ lɛɛ e kɛ abofu maa gbla nyɛ tue, nɛ e be kɛe kulaa nɛ nyɛ ti nɔ ko nɔ ko be piɛe ngɛ zugba kpakpa nɛ ɔ nɛ e ngɔ ha nyɛ ɔ nɔ.”