Yoshua 22 - BAIBLO ALOO NGMAMI KLƆUKLƆU Ɔ

Yoshua wo Ruben, Gad kɛ Manase fa a blɔ

¹ Jehanɛ, Yoshua tsɛ Ruben wɛtso ɔ, Gad wɛtso ɔ, kɛ Manase wɛtso fa a,

² nɛ e de mɛ ke, “Níhi tsuo nɛ Yawɛ tsɔlɔ Mose fa nyɛ ke nyɛɛ pee ɔ, nyɛ pee; nɛ nyɛɛ ye ye mlaa amɛ tsuo a nɔ.

³ Kɛ ba si mwɔnɛ nɛ ɔ, nyɛ si we nyɛ nyɛmimɛ ɔmɛ, se mohu nyɛ ye mlaa amɛ tsuo nɛ Yawɛ, nyɛ Mawu ɔ wo nyɛ ɔ a nɔ sisiisi.

⁴ Amlɔ nɛ ɔ, Yawɛ, nyɛ Mawu ɔ ha nyɛ nyɛmimɛ ɔmɛ tue mi jɔmi kaa bɔ nɛ e wo si ɔ. Lɔ ɔ he ɔ, jehanɛ, nyɛɛ kpale kɛ ho zugba a nɛ nyɛ nitsɛmɛ nyɛ ná kaa nyɛ weto ní ɔ nɔ ya. Zugba nɛ ɔ ji nɔ́ nɛ Yawɛ tsɔlɔ Mose ngɔ ha nyɛ ngɛ Yordan pa a beleku je ɔ nɛ.

⁵ Nyɛɛ hyɛ saminya, nɛ nyɛɛ ye mlaa amɛ nɛ Yawɛ tsɔlɔ Mose wo nyɛ ɔ a nɔ. Nyɛɛ suɔ Yawɛ, nyɛ Mawu ɔ; nyɛɛ pee e suɔmi nya ní; nyɛɛ ye e mlaa amɛ a nɔ, nyɛɛ ye lɛ anɔkuale, nɛ nyɛ sɔmɔ lɛ kɛ nyɛ tsui tsuo, kɛ nyɛ klaa tsuo.”

^6-8 Yoshua gbaa mɛ, nɛ e wo mɛ blɔ. E de mɛ ke, “Nyɛ pee kplɔkɔtɔtsɛmɛ kɛ yaa we; nyɛ ngɛ nahi babauu, sika hiɔ, sika tsu, akɔblee, dade, kɛ heha ní babauu. Ke nyɛ ya su ɔ, nyɛɛ kɛ nyɛ nyɛmimɛ ɔmɛ nɛ dla ní ɔmɛ tsuo nɛ nyɛ kpɔ ngɛ nyɛ he nyɛli ɔmɛ a dɛ ɔ.” Lɔ ɔ se ɔ, a pue blɔ kɛ ho we ya. Mose ha Manase wɛtso fa kake zugba ngɛ Yordan beleku je momo. Wɛtso fa a nɛ piɛ ɔ lɛɛ Yoshua ha mɛ zugba ngɛ a nyɛmimɛ ɔmɛ a kpɛti, ngɛ Yordan pa a bonyoku je.

⁹ Lɔ ɔ he ɔ, Ruben wɛtso ɔ, Gad wɛtso ɔ, kɛ Manase wɛtso fa a kpale kɛ ho a zugba amɛ a nɔ ya. A je Israel bi ɔmɛ nɛ piɛ ɔ a he ngɛ Shilo, ngɛ Kanaan zugba a nɔ, nɛ a pue nɔ kɛ ho mɛ nitsɛmɛ a zugba a nɔ ya, ngɛ Gilead, he nɛ a ngɔ ha mɛ momo ɔ, kaa bɔ nɛ Yawɛ gu Mose nɔ fa mɛ ke a pee ɔ.

Bɔ sami la tɛ ɔ nɛ ngɛ Yordan pa a nya a

¹⁰ Benɛ Ruben wɛtso ɔ, Gad wɛtso ɔ, kɛ Manase wɛtso fa a ba su Gelilot, ngɛ Yordan pa a he ɔ, a ma bɔ sami la tɛ agbo ko ngɛ pa a nya.

¹¹ Israel bi kpa amɛ nɛ piɛ ɔ nu kaa Ruben wɛtso ɔ, Gad wɛtso ɔ, kɛ Manase wɛtso fa a ya ma bɔ sami la tɛ ngɛ Yordan pa a he ngɛ Gelilot, ngɛ a zugba a mi.

¹² Benɛ Israel ma kpekpemi ɔ ba nu sane nɛ ɔ, mɛ tsuo a ya bua a he nya ngɛ Shilo, konɛ a kɛ Ruben bi ɔmɛ, Gad bi ɔmɛ, kɛ Manase wɛtso fa a ya hwu ta.

¹³ Israel bi ɔmɛ tsɔ osɔfo Eleazar binyumu Finehas kɛ ho Ruben wɛtso ɔ, Gad wɛtso ɔ, kɛ Manase wɛtso fa a a ngɔ ya ngɛ Gilead zugba a nɔ.

¹⁴ Ma nimeli nyɔngma, kɛ Finehas ho. Israel wɛtso nyɔngma amɛ nɛ ngɛ beleku je ɔ, a wɛtsoyihi ji ma nimeli nɛ ɔmɛ.

¹⁵ A ba Gilead nɛ a ba na Ruben wɛtso ɔ, Gad wɛtso ɔ, kɛ Manase wɛtso fa a.

¹⁶ A bi mɛ ngɛ Yawɛ ma a tsuo nane mi ke, “Mɛni he je nɛ nyɛ pee yayami kaa kikɛ nɛ ɔ kɛ si Israel Mawu ɔ? Bɔ sami la tɛ ɔ nɛ nyɛ ma nɛ ɔ tsɔɔ kaa nyɛ kua Yawɛ, nɛ nyɛ tsɔ e hɛ mi atuã!

¹⁷ Anɛ nyɛ kaii we yayami nɛ wa pee ngɛ Peor, benɛ Yawɛ kɛ gbenɔ hiɔ gbla lɛ nitsɛ e ma a tue ɔ lo? Wa ngɛ nɔ́ nae kɛ mwɔɔ ngɛ jamɛ a yayami ɔ he. Anɛ jamɛ a yayami ɔ pi ha wɔ lo?

¹⁸ Mwɔnɛ nɛ ɔ, nyɛ ma kua Yawɛ, nɛ nyɛ be lɛ sɔmɔe hu lo? Ke nyɛ kua Yawɛ mwɔnɛ ɔ, Yawɛ ma na Israel ma kpekpemi ɔ tsuo he abofu hwɔɔ!

¹⁹ Lɔ ɔ he ɔ, ke nyɛ zugba a nɔ hí nɛ́ a ja Mawu ngɛ ɔ, nyɛɛ kpale kɛ ba Yawɛ zugba a nɔ, he nɛ e bo tsu ɔ ngɛ ɔ. Nyɛ ha nɛ a ha nyɛ zugba ko ngɛ wa ngɔ. Nyɛ ko tsɔ atuã kɛ si Yawɛ, nɛ nyɛ ko pee wɔ hu atuã tsɔli kaa nyɛ maa ma bɔ sami la tɛ kpa ko kɛ piɛ Yawɛ, wa Mawu ɔ bɔ sami la tɛ ɔ he.

²⁰ Anɛ nyɛ kaii we Zera binyumu Akan lo? Benɛ Akan tɔ mlaa nɛ kɔɔ níhi nɛ sa kaa a kpata a hɛ mi ɔ he ɔ, a gbla Israel ma a tsuo tue; pi Akan nɔ kake pɛ nɛ gbo ngɛ yayami nɛ ɔ he.”

²¹ Ruben wɛtso ɔ, Gad wɛtso ɔ, kɛ Manase wɛtso fa a ha wɛtsoyi ɔmɛ nɛ je bonyoku je ɔ heto ke,

²² “Yawɛ, Mawu Ope! Yawɛ Mawu Ope! Lɛ pɛ nɛ e le nɔ́ he je nɛ wa pee enɛ ɔ, nɛ wa suɔ kaa nyɛ hu nyɛɛ le! Ke wa tsɔ atuã, nɛ wa yi Yawɛ anɔkuale ɔ, lɛɛ nyɛɛ gbe wɔ!

²³ Ke wa bui Yawɛ tue, nɛ wa ma wɔ nitsɛmɛ wa bɔ sami la tɛ, nɛ́ waa sã sami bɔhi, loo ngma bɔhi, loo tue mi jɔmi bɔhi ngɛ nɔ ɔ, lɛɛ Yawɛ nitsɛ nɛ gbla wa tue!

²⁴ Dɛbi! Wa pee enɛ ɔ, ejakaa wa ye gbeye kaa hwɔɔ se ko ɔ, nyɛ nina ma de wa nina ke, ‘Mɛni blɔ fa mi nɔ́ nyɛ ngɛ ngɛ Yawɛ, Israel Mawu ɔ ngɔ?

²⁵ Lɛ nitsɛ nɛ e ngɔ Yordan pa a ngɔ wo huzu ngɛ waa kɛ nyɛ, Ruben bi, kɛ Gad bi wa kpɛti. Nyɛɛ kɛ Yawɛ be nɔ́ ko peemi.’ Ke e ba mi ja a, nyɛ nina ma ha wa nina maa jɔɔ Yawɛ jami.

²⁶ Enɛ ɔ he je nɛ wa ma bɔ sami la tɛ ɔ nɛ; pi kaa a sã sami bɔ, loo bɔ kpa komɛ ngɛ nɔ;

²⁷ se mohu kaa okadi ko kɛ ha waa kɛ nyɛ, kɛ yi nɔhi nɛ maa ba ngɛ wa se ɔ, kaa anɔkuale mi ɔ, wa jaa Yawɛ ngɛ bo tsu klɔuklɔu ɔ hɛ mi, nɛ wa sãã sami bɔhi, tue mi jɔmi bɔhi, kɛ bɔ kpahi. Wa pee enɛ ɔ, konɛ hwɔɔ se ko ɔ, nyɛ nina kó ba de wa nina ke a be blɔ fa mi nɔ́ ko ngɛ Yawɛ ngɔ.

²⁸ Wa juɛmi ji, ke e maa ba mi ja a, wa nina ma nyɛ ma de ke, ‘Nyɛ nɛ́ kaa wa nɛmɛ ɔmɛ ma bɔ sami la tɛ nɛ ngɛ kaa Yawɛ bɔ sami la tɛ ɔ pɛpɛɛpɛ lo? A ma bɔ sami la tɛ nɛ ɔ, pi nɛ a sã sami bɔ, loo bɔ kpa komɛ ngɛ nɔ; se mohu kaa e pee okadi ha nyɛ nina, kɛ wa nina.’

²⁹ Wa be Yawɛ hɛ mi atuã tsɔe kɔkɔɔkɔ, nɛ wa be e se jee gblegbleegble kɛ ya ma bɔ sami la tɛ kpa ko nɛ waa sã sami bɔ, loo niye ní bɔ, loo bɔ kpa ko ngɛ nɔ. Wa be bɔ sami la tɛ kpa ko mae kɛ piɛ Yawɛ, wa Mawu ɔ bɔ sami la tɛ ɔ nɛ ngɛ kpe he bo tsu ɔ hɛ mi ɔ he.”

³⁰ Benɛ osɔfo Finehas, kɛ ma nimeli ɔmɛ, nɛ ji wɛtsoyi nyɔngma amɛ nɛ piɛ e he ɔ nu munyuhi nɛ Ruben bi ɔmɛ, Gad bi ɔmɛ, kɛ Manase wɛtso fa a tu ɔ, a bua jɔ a he saminya.

³¹ Osɔfo Eleazar bi Finehas de mɛ ke, “Jehanɛ lɛɛ wa na kaa Yawɛ kɛ wɔ ngɛ. Nyɛ tsɔ we e hɛ mi atuã; mohu ɔ, nyɛ je Israel bi ɔmɛ kɛ je tue gblami nɛ Yawɛ kɛ maa ba a nɔ ɔ mi.”

³² Enɛ ɔ se ɔ, Finehas kɛ ma nimeli ɔmɛ je Ruben bi ɔmɛ, kɛ Gad bi ɔmɛ a he ngɛ Gilead; nɛ a kpale kɛ ba Israel bi ɔmɛ a ngɔ, ba bɔ mɛ amaniɛ.

³³ Nɔ́ nɛ ɔ ngɔ Israel bi ɔmɛ a nya, nɛ a je Mawu yi. A de we hu ke a maa hwu ta nɛ a kpata zugba a nɛ Ruben bi ɔmɛ, kɛ Gad bi ɔmɛ ngɛ nɔ ɔ hɛ mi.

³⁴ Ruben bi ɔmɛ, kɛ Gad bi ɔmɛ de ke, “Bɔ sami la tɛ nɛ ɔ ji odase ha wɔ, kɛ nyɛ tsuo, kaa Yawɛ ji Mawu.” Lɔ ɔ he ɔ, a wo bɔ sami la tɛ ɔ biɛ ke “Odase”.