Yoshua 21 - BAIBLO ALOO NGMAMI KLƆUKLƆU Ɔ

Levi bi ɔmɛ a ma amɛ

¹ Levi nikɔtɔma amɛ ba osɔfo Eleazar, Nun bi Yoshua, kɛ nikɔtɔmahi nɛ ngɛ Israel wɛtso kpa amɛ a mi ɔ a ngɔ

² ngɛ Shilo, ngɛ Kanaan zugba a nɔ. A kɛ hiami nɛ ɔ ba fɔ a hɛ mi ke, “Yawɛ fa kɛ gu Mose nɔ ke a ha wɔ mahi nɛ waa hi mi, kɛ a he lohwe lɛmi hehi kɛ ha wa we mi lohwehi.”

³ Lɔ ɔ he ɔ, kaa bɔ nɛ Yawɛ fa a, Israel bi ɔmɛ ha Levi bi ɔmɛ ma komɛ, kɛ lohwe lɛmi hehi ngɛ mɛ nitsɛmɛ a zugba amɛ a mi.

⁴ Jinɛ a ngɔ ma nɛ ɔmɛ nyɔngma kɛ etɛ kɛ ha Yuda, Simeon, kɛ Benyamin wɛtso ɔmɛ momo. Se a fɔ sɔ, nɛ a he ngɛ a dɛ kɛ ha osɔfo ɔmɛ ekomɛ nɛ je Kohat we puɔ nya ngɛ Levi wɛtso ɔ mi. Osɔfo Aaron nina ji nimli nɛ ɔmɛ.

⁵ A ha Kohat bi ɔmɛ nɛ piɛ ɔ ma nyɔngma ngɛ Efraim, Dan, kɛ Manase wɛtso fa a nɛ ngɛ bonyoku je ɔ a zugba amɛ a mi.

⁶ A ha Gershon we puɔ nya ma nyɔngma kɛ etɛ ngɛ Isakar, Asher Naftali, kɛ Manase wɛtso fa a nɛ ngɛ beleku je ɔ a zugba amɛ a mi.

⁷ A ha Merari bi ɔmɛ ma nyɔngma kɛ enyɔ ngɛ Ruben, Gad, kɛ Zebulun a zugba amɛ a mi.

⁸ Israel bi ɔmɛ fɔ sɔ kɛ dla ma nɛ ɔmɛ, kɛ a he lohwe lɛmi zugba amɛ ngɔ ha Levi bi ɔmɛ, kaa bɔ nɛ Yawɛ fa kɛ gu Mose nɔ ke a pee ɔ.

^9-10 Yuda kɛ Simeon a zugba amɛ a mi ɔ, mahi nɛ a ha Aaron nina nɛ ji Kohat bi nɛ je Levi wɛtso ɔ mi ɔ ji nɛ ɔmɛ nɛ. Mɛ ji ni nɛmɛ nɛ kekleekle sɔ ɔ je.

¹¹ A ha mɛ Arba kɛ e he lohwe lɛmi zugba. (Anak tsɛ ji Arba a nɛ). Ma nɛ ɔ biɛ kpa ji Hebron, nɛ e ngɛ Yuda yo ɔmɛ a nɔ.

¹² Ma nɛ ɔ he zugba amɛ, kɛ e he kɔpe ɔmɛ lɛɛ a ngɔ kɛ ha Yefune binyumu Kaleb kaa e weto ní momo.

¹³ A ngɔ ma kpa komɛ hu ngɔ piɛ Hebron kɛ e he lohwe lɛmi zugba amɛ a he ngɔ ha osɔfo Aaron nina. (Hebron ji wesa he ma amɛ a kpɛti kake). Ma kpa amɛ ji Libna,

¹⁴ Yatir, Eshtemoa,

¹⁵ Holon, Debir,

¹⁶ Ain, Yuta, Bet Shemesh, kɛ a he lohwe lɛmi zugbahi. E peeɔ ma nɛɛ ngɛ Yuda kɛ Simeon wɛtso ɔmɛ a mi.

¹⁷ Jehanɛ, a ha osɔfo Aaron nina a ma eywiɛ ngɛ Benyamin zugba a mi: Gibeon, Geba,

¹⁸ Anatot, kɛ Almon, kɛ a he lohwe lɛmi zugba amɛ.

¹⁹ Mahi, kɛ a he lohwe lɛmi zugbahi tsuo nɛ a ha osɔfo Aaron nina a peeɔ nyɔngma kɛ etɛ.

²⁰ A ha Kohat bi ɔmɛ nɛ piɛ ngɛ Levi wɛtso ɔ mi ɔ ma komɛ ngɛ Efraim zugba a mi.

²¹ A ha mɛ ma eywiɛ: Shekem (nɛ ji wesa he ma) ngɛ Efraim yo ɔ nɔ, Gezer,

²² Kibzaim, Bet Horon, kɛ a he lohwe lɛmi zugbahi.

²³ Jehanɛ, a ha mɛ ma eywiɛ ngɛ Dan zugba a mi. Ma amɛ ji Elteke, Gibeton,

²⁴ Aiyalon, Gatrimon, kɛ a he lohwe lɛmi zugbahi.

²⁵ A ha mɛ ma enyɔ ngɛ Manase fa a nɛ ngɛ bonyoku je ɔ a zugba a mi. Ma amɛ ji Taanak, Gatrimon, kɛ a he lohwe lɛmi zugbahi.

²⁶ Mahi tsuo, kɛ a he lohwe lɛmi zugbahi nɛ Kohat bi nɛ piɛ ɔ na ji nyɔngma.

²⁷ Levi bi ɔmɛ a we puɔ nya kake nɛ a tsɛɛ Gershon ɔ na ma enyɔ ngɛ Manase fa a nɛ ngɛ beleku je ɔ zugba a mi. Ma amɛ ji Golan ngɛ Bashan (wesa he ma amɛ a kpɛti kake), kɛ Beeshtera, kɛ a he lohwe lɛmi zugbahi.

²⁸ A ná ma eywiɛ ngɛ Isakar zugba a mi. Ma amɛ ji Kishion, Daberat,

²⁹ Yarmut, Enganim, kɛ a he lohwe lɛmi zugbahi.

³⁰ A ná ma eywiɛ ngɛ Asher zugba a mi. Ma amɛ ji Mishal, Abdon,

³¹ Helkat, Rehob, kɛ a he lohwe lɛmi zugbahi.

³² A ná ma etɛ ngɛ Naftali zugba a mi. Ma amɛ ji wesa he ma Kedesh nɛ ngɛ Galilea a, Hamot Dor, Kartan, kɛ a he lohwe lɛmi zugbahi.

³³ Mahi kɛ lohwe lɛmi zugbahi nɛ Gershon bi ɔmɛ na we puɔ nya we puɔ nya ji nyɔngma kɛ etɛ.

³⁴ Levi bi ɔmɛ nɛ piɛ, nɛ ji Merari we puɔ nya a, ná ma eywiɛ ngɛ Zebulun zugba a mi. Ma amɛ ji Yokneam, Karta,

³⁵ Dimna, Nahalal, kɛ a he lohwe lɛmi zugbahi.

³⁶ A ná ma eywiɛ ngɛ Ruben bi ɔmɛ a zugba a mi. Ma amɛ ji Bezer, Yahaz,

³⁷ Kedemot, Mefaat, kɛ a he lohwe lɛmi zugbahi.

³⁸ Jehanɛ, a ná ma eywiɛ ngɛ Gad zugba a mi. Ma amɛ ji Ramot ngɛ Gilead (wesa he ma amɛ a kpɛti kake), Mahanaim,

³⁹ Heshbon, Yazer, kɛ a he lohwe lɛmi zugbahi.

⁴⁰ Lɔ ɔ he ɔ, mahi tsuo nɛ a ha Merari bi ɔmɛ ji nyɔngma kɛ enyɔ.

^41-42 Zugba nɛ Israel ma a ná kaa a weto ní ɔ, nɔ́ nɛ a ha Levi bi ɔmɛ ji ma nyingmi eywiɛ kɛ kpaanyɔ, kɛ a he lohwe lɛmi hehi.

Israel ngɔ zugba a

⁴³ Yawɛ ngɔ zugba a tsuo ngɔ ha Israel bi ɔmɛ kaa bɔ nɛ e ka a nɛmɛ ɔmɛ kita ke e ma ha mɛ ɔ. Benɛ a nine su zugba a nɔ ɔ, a hi lejɛ ɔ.

⁴⁴ Yawɛ ha mɛ tue mi jɔmi ngɛ zugba a nɔ tsuo kaa bɔ nɛ e ka a nɛmɛ ɔmɛ kita ke e maa pee ɔ pɛpɛɛpɛ. A he nyɛli ɔmɛ a ti nɔ ko nɔ ko nyɛ we mɛ; ejakaa Yawɛ ha Israel bi ɔmɛ ye mɛ tsuo a nɔ.

⁴⁵ Ní kpakpahi tsuo nɛ Yawɛ wo Israel ma a si ke e ma ha mɛ ɔ, ekoeko tlɔɛ si; a ná lɛ tsuo pɛpɛɛpɛ.