Yoshua 2 - BAIBLO ALOO NGMAMI KLƆUKLƆU Ɔ

Yoshua tsɔ slaali kɛ ya Yeriko

¹ Nun bi Yoshua tsɔ slaali enyɔ kɛ je Shitim nigii; nɛ e fa mɛ ke, “Nyɛ ya slaa Kanaan zugba a saminya, titli ɔ Yeriko.” Benɛ slaali ɔmɛ ya su ma a mi ɔ, a ya to yo ajuama ko nɛ a tsɛɛ lɛ Rahab ɔ we mi.

² Yeriko matsɛ ɔ nu kaa Israel bi komɛ ba jamɛ a nyɔ ɔ mi nɛ́ a ba slaa zugba a,

³ lɔ ɔ he ɔ, e tsɔ kɛ ya de Rahab ke, “Nyumu ɔmɛ nɛ ba to o we ɔ mi ɔ, zugba a tsuo slaami a ba a nɛ! Je mɛ kpo kɛ ba!”

^4-6 Rahab de tsɔli ɔmɛ ke, “Anɔkuale mi ɔ, nyumu komɛ ba ye ngɔ, se i li he nɛ a je. Be nɛ du bu, nɛ a ma nga agbo ɔ, a je kpo. I li he nɛ a gu; se ke nyɛ nyɛɛ a se mlamlaamla a, nyɛ ma ya ná mɛ.” (Loko tsɔli ɔmɛ ba a, yo ɔ ngɔ slaali enyɔ ɔmɛ kɛ ho tsu ɔ yi mi ya, nɛ e ngɔ mɛ ya laa momo ngɛ go nɛ e ka ngɛ lejɛ ɔ sisi).

⁷ Benɛ matsɛ ɔ tsɔli ɔmɛ je ma a mi pɛ nɛ a nga agbo ɔ. A ya hla slaali ɔmɛ kɛ ya gu Yordan pa a nya blɔ kɛ ya su pa pomi he ɔ tɔɔ.

⁸ Benɛ slaali ɔmɛ na we nɛ a hwɔ si ɔ, yo ɔ ya na mɛ ngɛ tsu ɔ yi mi.

⁹ E de mɛ ke, “I le kaa Yawɛ ngɔ zugba a ngɔ ha nyɛ. Nyɛ he sawale nu wɔ, nɛ zugba a nɔ bi ɔmɛ tsuo a tsui ngɛ poe.

¹⁰ Wa nu bɔ nɛ Yawɛ ha Wo Tsu ɔ mii ngɛ nyɛ hɛ mi be nɛ nyɛ je Egipt ɔ. Jehanɛ hu wa nu nɔ́ nɛ nyɛ pee Amor bi ɔmɛ a matsɛmɛ ɔmɛ ngɛ Yordan ɔ se ɔ. Wa nu bɔ nɛ nyɛ kpata Sihon kɛ Og a hɛ mi pɛsɛpɛsɛ ha.

¹¹ Benɛ wa nu sane nɛ ɔmɛ ɔ, wa tsui po, nɛ nyumu ɔmɛ a kã nya ta; ejakaa Yawɛ, nyɛ Mawu ɔ pɛ ji Mawu nɛ ngɛ hiɔwe kɛ zugba.

¹² Lɔ ɔ he ɔ, nyɛ ka mi kita ngɛ Yawɛ biɛ mi kaa bɔ nɛ i pee nyɛ kpakpa nɛ ɔ, nyɛ hu nyɛ maa pee ye weku li kpakpa ja nɔuu, nɛ nyɛ maa to mi okadi ko.

¹³ Nyɛɛ wo mi si kaa nyɛ ma he ye tsɛ kɛ ye nyɛ, ye nyɛminyumu ɔmɛ, ye nyɛmiyi ɔmɛ, kɛ mɛ tsuo pɛpɛɛpɛ a weku kɛ nina a yi wami, nɛ nyɛ be hae nɛ a gbe wɔ!”

¹⁴ Slaali ɔmɛ de yo ɔ ke, “Wa ngɛ mo kita kae kaa ke o ya tsɔɔ we wa se blɔ, nɛ Yawɛ ha wa nine su zugba a nɔ ɔ, wa maa na mo mɔbɔ, nɛ wa maa ye wa si womi ɔ nɔ.”

¹⁵ Gbogbo nɛ bɔle ma a, e mi nɛ Rahab we ɔ ngɛ. Lɔ ɔ he ɔ, e kɛ kpa ko kple slaali ɔmɛ si kɛ gu saflɛ mi.

¹⁶ E de mɛ ke, “Nyɛɛ ya yoku ɔmɛ a nɔ, bɔ nɛ pee nɛ matsɛ tsɔli ɔmɛ kó na nyɛ. Nyɛ ya laa nyɛ he ngɛ lejɛ ɔ ligbi etɛ kɛ yaa si be nɛ a maa kpale a se kɛ ba, loko nyɛ pue blɔ.”

¹⁷ Slaali ɔmɛ de yo ɔ ke, “Wa maa ye kita nɛ o ha wa ka mo nɛ ɔ nɔ.

¹⁸ Ke wa ba su zugba nɛ ɔ nɔ ɔ, fí kpa tsu nɛ ɔ kɛ kpla saflɛ nɛ o kɛ wɔ gu mi kɛ kple si ɔ he. Ha o tsɛ, kɛ o nyɛ, o nyɛmimɛ ɔmɛ, kɛ o tsɛ weku li ɔmɛ tsuo nɛ a ba bua a he nya ngɛ o we ɔ mi hiɛ ɔ.

¹⁹ Nɔ tsuaa nɔ nɛ maa je kpo kɛ je o we ɔ mi, nɛ nɔ́ ko maa pee lɛ ɔ, e gbenɔ ɔ je lɛ nitsɛ e tue gbomi, pi wɔ. Se nɔ tsuaa nɔ nɛ maa hi o ngɔ ngɛ o we ɔ mi ɔ, ke nɔ ko nine ta e he ɔ, e gbenɔ ɔ maa pee wa sane.

²⁰ Se ke o ya tsɔɔ wa se blɔ ɔ, lɛɛ wa he je kita nɛ o ha wa ka mo ɔ mi.”

²¹ Yo ɔ he nɔ ke, “Ma pee bɔ nɛ nyɛ de ɔ.” Kɛkɛ nɛ e wo slaali ɔmɛ blɔ nɛ a ho. Lɔ ɔ se ɔ, e ngɔ kpa tsu ɔ nɛ e fi kɛ wo saflɛ ɔ he.

²² Slaali ɔmɛ pue nɔ kɛ ho yoku ɔmɛ a nɔ ya ya laa a he. Matsɛ ɔ tsɔli ɔmɛ ya hla mɛ kɛ kpa yoku ɔmɛ a nɔ ligbi etɛ, se a nɛ mɛ. Kɛkɛ nɛ a kpale kɛ ba Yeriko ekohu. A hla slaali ɔmɛ ngɛ blɔ ɔ nɔ tsuo, se a nɛ mɛ.

²³ Lɔ ɔ se ɔ, slaali ɔmɛ kple si kɛ je yoku ɔmɛ a nɔ, nɛ a po pa a kɛ ho Nun bi Yoshua ngɔ ya. A ya bɔ lɛ níhi nɛ ya ba a nɔ ɔ tsuo.

²⁴ A de Yoshua ke, “Niinɛ, Yawɛ ngɔ zugba a tsuo ngɔ ha wɔ. Wa he ɔ, sawale nu zugba a nɔ bi ɔmɛ.”