Yoshua 18 - BAIBLO ALOO NGMAMI KLƆUKLƆU Ɔ

Zugba nɛ piɛ ɔ dlami

¹ Benɛ Israel bi ɔmɛ ngɔ zugba a ta a, ma kpekpemi ɔ tsuo ba bua a he nya ngɛ Shilo, nɛ a ma kpe he bo tsu ɔ si ngɛ lejɛ ɔ.

² Jamɛ a be ɔ mi ɔ, e piɛ Israel wɛtso kpaago nɛ a ha we mɛ zugba a eko lolo.

³ Lɔ ɔ he ɔ, Yoshua de Israel ma a ke, “Mɛni be po nyɛ maa to tsle kɛ yaa si loko nyɛ ma ba ngɔ zugba a nɛ Yawɛ, nyɛ nɛmɛ a Mawu ɔ ngɔ ha nyɛ ɔ?

⁴ Nyɛɛ hla nyumuhi etɛ kɛ je wɛtso tsuaa wɛtso mi. Ma tsɔ mɛ nɛ a ya kpa zugba a tsuo nɔ. Zugba a he nɛ a maa suɔ nɛ e pee a weto ní ɔ, a pee e he womi kɛ ba ha mi.

⁵ A ma gba zugba a mi kpaago; Yuda nɛ hi e huzu ɔ nɔ ngɛ leneyi je, nɛ Yosef we ɔ hu nɛ hi e huzu ɔ nɔ ngɛ omleyi je.

⁶ Zugba a nɛ a gba mi kpaago ɔ, nyɛɛ kale mi gbami ɔmɛ eko tsuaa eko, nɛ nyɛɛ ngma kɛ ba ha mi. Lɔ ɔ se ɔ, ma fɔ sɔ ha nyɛ ngɛ Yawɛ, wa Mawu ɔ hɛ mi.

⁷ Levi bi ɔmɛ be zugba a eko nae; mɛɛ lɛɛ a blɔ nya ni ji kaa a maa ye osɔfo kɛ ha Yawɛ. Gad, Ruben, kɛ Manase fa a, mɛ hu Yawɛ tsɔlɔ Mose ha mɛ a weto ní momo ngɛ Yordan pa a beleku je.”

⁸ Ni ɔmɛ nɛ a hla a pue nɔ kɛ ho, konɛ a ya kpa zugba a nɔ, nɛ a pee zugba a he womi kaa bɔ nɛ Yoshua fa mɛ ɔ. Yoshua de mɛ ke, “Nyɛɛ ya nɛ nyɛ ya kpa zugba a tsuo nɔ, nɛ nyɛɛ pee e he womi, konɛ nyɛɛ kpale kɛ ba ye ngɔ. Lɔ ɔ se ɔ, ma fɔ sɔ ha nyɛ ngɛ Shilo hiɛ ɔ, ngɛ Yawɛ hɛ mi.”

⁹ Ni ɔmɛ ho nɛ a ya kpa zugba a nɔ tsuo, nɛ a pee zugba a he womi, nɛ a tsɔɔ bɔ nɛ a gba mi kpaago ha, kɛ mahi nɛ ngɛ zugba a nɔ. Enɛ ɔ se ɔ, a kpale kɛ ba Yoshua ngɔ ngɛ ma sito he ɔ ngɛ Shilo.

¹⁰ Yoshua fɔ sɔ kɛ bi Yawɛ ga womi ha mɛ ngɛ lejɛ ɔ, nɛ e dla zugba a ngɔ ha Israel wɛtso ɔmɛ nɛ piɛ ɔ.

Zugba nɛ a ha Benyamin wɛtso ɔ

¹¹ Sɔ nɛ a fɔ ɔ je Benyamin bi ɔmɛ, nɛ a we puɔ nya amɛ ji kekleekle nihi nɛ a ha mɛ zugba. A zugba a ngɛ Yuda wɛtso ɔ kɛ Yosef wɛtso ɔ a kpɛti.

¹² A huzu nɛ ngɛ omleyi je ɔ je Yordan pa a nya, nɛ e kuɔ kɛ ya gu Yeriko kasa nya, ngɛ omleyi je, kɛ nyɛɛ yo ɔmɛ a nɔ kɛ ho bonyoku je ya; nɛ e ya gbe nya ngɛ Betaven zugba kplanaa a nɔ.

¹³ Huzu ɔ je lejɛ ɔ kɛ nyɛɛ leneyi je kɛ gu Luz nɛ a tsɛɛ lɛ Betel ɔ, kɛ kple si kɛ ho Atarot Adar ya, ngɛ yo ɔ nɛ ngɛ Bet Horon sisi ɔ leneyi je.

¹⁴ Kɛ je yo ɔ beleku je ɔ, huzu ɔ gba kɛ gu he kpa. E ka e yi si kɛ ya gu leneyi je hluu kɛ ya su Kiriat Baal ngɛ Yuda wɛtso ɔ nɔ́ ɔ mi. Kiriat Baal biɛ kpa ji Kiriat Yearim. Bonyoku je huzu ɔ ji nɛ ɔ nɛ.

¹⁵ Leneyi je huzu ɔ je Kiriat Yearim ma a nya, nɛ e ma e yi si kɛ ho Neftoa pa a nya ya.

¹⁶ Jehanɛ, huzu ɔ kple si kɛ ho yo ɔ nɛ ngɛ Hinom kɔ̃ ɔ mi ɔ kuɔ si ya, ngɛ Refaim kɔ̃ ɔ omleyi je. E gu Hinom kɔ̃ ɔ mi, ngɛ Yebus bi ɔmɛ a yoku ɔ leneyi je, kɛ ho Enrogel ya.

¹⁷ Huzu ɔ gba kɛ je omleyi je kɛ ya Enshemesh, nɛ e tsa nɔ kɛ ya su Gelilot ngɛ Adumim yo kpɛ blɔ ɔ hanɔ. Jehanɛ e kple si kɛ ya su Bohan tɛ ɔ he. (Bohan ji Ruben binyumu ko).

¹⁸ Huzu ɔ ya be ngɛ kpongu ɔ nɛ ngɛ Yordan kɔ̃ ɔ he ɔ we omleyi je, nɛ e kple si kɛ sɛ kɔ̃ ɔ mi ngɛ nga kplanaa a nɔ.

¹⁹ Huzu ɔ plɛ kɛ ya gu Bet Hogla kasa nya ngɛ omleyi je, nɛ e ya gbe nya ngɛ Ngo wo ɔ kɔ̃tɔ̃ ɔ mi, he nɛ Yordan pa a ya sɛ Ngo wo ɔ mi ngɛ ɔ. Huzu ɔ nɛ ngɛ leneyi je ɔ ji nɛ ɔ nɛ.

²⁰ Yordan pa a ji huzu ɔ ngɛ beleku je. Huzuhi nɛ bɔle zugba a nɛ Benyamin wɛtso ɔ ná kaa a weto ní ji nɛ ɔ nɛ.

²¹ Mahi nɛ Benyamin wɛtso ɔ ná we puɔ nya we puɔ nya ji nɛ ɔmɛ nɛ: Yeriko, Bet Hogla, Emek Keziz,

²² Bet Araba, Zemaraim, Betel,

²³ Avim, Para, Ofra,

²⁴ Kefaramoni, Ofni, kɛ Geba. E peeɔ ma nyɔngma kɛ enyɔ kɛ a he kɔpehi.

²⁵ Ekomɛ hu ji Gibeon, Rama, Beerot,

²⁶ Mizpa, Kefira, Moza,

²⁷ Rekem, Irpeel, Tarala,

²⁸ Zela, Haelef, Yebus (loo Yerusalem), Gibea, kɛ Kiriat Yearim. E peeɔ ma nyɔngma kɛ eywiɛ kɛ a he kɔpehi. Zugba nɛ Benyamin bi ɔmɛ ná kaa a weto ní we puɔ nya we puɔ nya ji nɛ ɔ nɛ.