Yoshua 15 - BAIBLO ALOO NGMAMI KLƆUKLƆU Ɔ

Zugba nɛ a ha Yuda wɛtso ɔ

¹ Zugba nɛ a ha Yuda wɛtso ɔ we puɔ nya we puɔ nya a, bɔ nɛ e fɔ si ji nɛ ɔ nɛ. Zugba a leneyi je ngɛ Zin nga kplanaa a nyagbe tɔɔ, ngɛ Edom huzu ɔ nya.

² Huzu ɔ nɛ ngɛ leneyi je nɛ ɔ je Ngo wo ɔ leneyi je,

³ nɛ e tsa nɔ ja kɛ kuɔ Akrabim yo kpɛ blɔ ɔ, kɛ ya su Zin. E kuɔ kɛ ya je Kadesh Barnea leneyi je, kɛ ya gu Hezron kasa nya, kɛ ya su Adar, nɛ e lɔgɔ kɛ ya gu Karka.

⁴ E tsa nɔ kɛ ho Azmon ya, kɛ ya gu Egipt pa a nya, hluu kɛ ya pi Mediterenia wo ɔ, nɛ e nya ya ta ngɛ lejɛ ɔ. Yuda huzu ɔ nɛ ngɛ beleku je ɔ ji lɔ ɔ nɛ.

⁵ Huzu ɔ nɛ ngɛ beleku je ɔ je Ngo wo ɔ nya kɛ ya su Yordan pa a nya. Huzu ɔ nɛ ngɛ omleyi je ɔ, je wo kɔ̃tɔ̃ ɔ mi he nɛ Yordan pa a kɛ e nya wo Ngo wo ɔ mi ngɛ ɔ. Huzu ɔ nɛ ngɛ omleyi je ɔ ya

⁶ su Bet Hogla, nɛ e ya be ngɛ kpongu ɔ nɛ ngɛ Yordan kɔ̃ ɔ he ɔ omleyi je. E kuɔ kɛ ya gu Bohan tɛ ɔ he. (Bohan ji Ruben binyumu ko.)

⁷ Kɛ je lejɛ ɔ, huzu ɔ ya gu Haomi kɔ̃ ɔ mi kɛ ya su Debir, nɛ e lɔgɔ kɛ gu Gilgal ngɛ Adumim yo kpɛ blɔ ɔ nɔ ngɛ kɔ̃ ɔ leneyi je. Huzu ɔ tsa nɔ kɛ ya gu Enshemesh pa a nya kɛ ya su Enrogel.

⁸ Jehanɛ, huzu ɔ nyɛɛ Hinom kɔ̃ ɔ mi kɛ kuɔ yo ɔ ngɛ leneyi je, he nɛ Yebus bi ɔmɛ ma Yerusalem ngɛ ɔ. Huzu ɔ kuɔ yo ɔ ngɛ bonyoku je, kɛ ya gu Refaim kɔ̃ ɔ we omleyi je.

⁹ Huzu ɔ kple si kɛ ba Neftoa pa a nya, nɛ e tsa nɔ kɛ ya na ma nɛ ngɛ Efron yo ɔ kasa nya a, nɛ e lɔgɔ kɛ ho Baala ya. (Baala biɛ kpa ji Kiriat Yearim.)

¹⁰ Jehanɛ, huzu ɔ lɔgɔ Baala bonyoku je kɛ ho Seir yo ɔ he ya, nɛ e bɔle Yearim yo ɔ, (Yearim yo ɔ biɛ kpa ji Kesalon). Huzu ɔ kple si kɛ ya su Bet Shemesh, kɛ ya gu Timna.

¹¹ Huzu ɔ gba ngɛ yoku ɔ nɛ ngɛ Ekron ɔ we omleyi je ɔ, nɛ e lɔgɔ kɛ ho Shikeron ya; e gu Baala yo ɔ nɔ kɛ ya je Yamnia, nɛ e nya ya pi Mediterenia wo ɔ.

¹² Wo nɛ ɔ ji huzu ɔ nɛ ngɛ bonyoku je ɔ nɛ. Yuda wɛtso ɔ huzu ɔmɛ a nya ji nɛ ɔ nɛ. A dla zugba a ngɔ ha mɛ we puɔ nya we puɔ nya.

Kaleb ngɔ Hebron kɛ Debir

¹³ Yoshua ha Yefune binyumu Kaleb zugba a eko ngɛ Yuda bi ɔmɛ a nɔ́ ɔ mi, kaa bɔ nɛ Yawɛ fa lɛ ɔ. A ha lɛ Kiriat Arba nɛ a tsɛɛ lɛ Hebron, ma nɛ a kɛ Anak binyumu Arba biɛ wo lɛ ɔ.

¹⁴ Kaleb fie Anak binyumu etɛ ɔmɛ kɛ je ma a mi. Mɛ ji Sheshai, Ahiman, kɛ Talmai.

¹⁵ Benɛ Kaleb je lejɛ ɔ, e ya tua Debir, nɛ sa a, a tsɛɛ lɛ Kiriat Sefer ɔ.

¹⁶ Kaleb de ke, “Nɔ nɛ ma tua Kiriat Sefer nɛ e maa ngɔ ma a, ma ha lɛ ye biyo Aksa nɛ e ngɔ.”

¹⁷ Kɛkɛ nɛ Otniel nɛ ji Kaleb nyɛminyumu Kenaz bi ɔ, ya ngɔ ma a, nɛ Kaleb kɛ e biyo Aksa ha lɛ.

¹⁸ Benɛ a kpee Aksa a, e wo e huno ɔ yi mi ke e bi e ngatsɛ ɔ ngmɔ zugba ko; Aksa kple si kɛ je e teji ɔ nɔ, nɛ Kaleb bi lɛ ke, “Mɛni o ngɛ hlae nɛ ma pee ha mo?”

¹⁹ E de e tsɛ ɔ ke, “Moo ke mi nɔ́ ko. O ha mi zugba ngɛ leneyi je he nɛ nyu be momo, lɔ ɔ he ɔ, i kpa mo pɛɛ, nɛ o ha mi he ko nɛ nyu ngɛ hu ngɔ piɛ he.” Kaleb ha lɛ hehi nɛ nyu ngɛ, ngɛ yo nɔ kɛ kɔ̃ mi.

Yuda ma amɛ

²⁰ Zugba nɛ Yuda wɛtso ɔ ná kaa a weto ní we puɔ nya we puɔ nya ji nɛ ɔmɛ nɛ.

²¹ Yuda bi ɔmɛ a wɛtso ɔ na ma nɛ ɔmɛ ngɛ leneyi je tsitsaa ngɛ Edom huzu ɔ kasa nya. Ma amɛ ji: Kabzeel, Eder, Yagur,

²² Kina, Dimona, Adada,

²³ Kedesh, Hazor, Itnan,

²⁴ Zif, Telem, Bealot,

²⁵ Hazor Hadata, Keriot Hezron (nɛ a tsɛɛ lɛ Hazor ɔ),

²⁶ Amam, Shema, Molada,

²⁷ Hazar Gada, Heshmon, Betpelet,

²⁸ Hazar Shual, Beersheba, Biziotia,

²⁹ Baala, Iyim, Ezem,

³⁰ Eltolad, Kesil, Horma,

³¹ Ziklag, Madmana, Sansana,

³² Lebaot, Shilhim, Ain, Rimon. Ma amɛ tsuo pɛpɛɛpɛ a yibɔ ji nyingmi enyɔ kɛ nɛɛ kɛ a he kɔpehi.

³³ Nga kplanaa a nɔ ma amɛ ji: Eshtaol, Zora, Ashna,

³⁴ Zanoa, Enganim, Tapua, Enam,

³⁵ Yarmut, Adulam, Soko, Azeka,

³⁶ Shaaraim, Aditaim, Gedera, Gederotaim. E peeɔ ma nyɔngma kɛ eywiɛ kɛ a he kɔpehi.

³⁷ Ma nɛ ɔmɛ hu piɛ he: Zenan, Hadasha, Migdalgad,

³⁸ Dilean, Mizpa, Yokteel,

³⁹ Lakish, Bozkat, Eglon,

⁴⁰ Kabon, Lamam, Kitlish,

⁴¹ Gederot, Betdagon, Naama, Makeda. E peeɔ ma nyɔngma kɛ ekpa kɛ a he kɔpehi.

⁴² Ma nɛ ɔmɛ hu piɛ he: Libna, Eter, Ashan,

⁴³ Ifta, Ashna, Nezib,

⁴⁴ Keila, Akzib, Maresha. E peeɔ ma nɛɛ kɛ a he kɔpehi.

⁴⁵ Ma kpahi hu nɛ ngɛ lejɛ ɔ ji Ekron, kɛ e he mahi kɛ kɔpehi,

⁴⁶ kɛ mahi kɛ kɔpehi nɛ ngɛ Ashdod kasa nya a, kɛ je Ekron kɛ ya su Mediterenia wo ɔ nya.

⁴⁷ Ekomɛ ji Ashdod, kɛ Gaza, kɛ a he mahi kɛ kɔpehi, hluu kɛ ya su pa a he ngɛ Egipt huzu ɔ nya, kɛ Mediterenia wo ɔ hu nya.

⁴⁸ Ma nɛ ɔmɛ hu ngɛ yo ɔ nɔ: Shamir, Yatir, Soko,

⁴⁹ Dana, Kiriat Sefer (nɛ a tsɛɛ lɛ Debir ɔ),

⁵⁰ Anab, Eshtemoa, Anim,

⁵¹ Goshen, Holon, kɛ Gilo. E peeɔ ma nyɔngma kɛ kake kɛ a he kɔpehi.

⁵² Ekomɛ hu ji Arab, Duma, Eshan,

⁵³ Yanim, Bet Tapua, Afeka,

⁵⁴ Humta, Kiriat Arba (nɛ a tsɛɛ lɛ Hebron ɔ), kɛ Zior. E peeɔ ma nɛɛ kɛ a he kɔpehi.

⁵⁵ Ekomɛ hu ji Maon, Karmel, Zif, Yuta,

⁵⁶ Yezreel, Yokdeam, Zanoa,

⁵⁷ Kain, Gibea, kɛ Timna. E peeɔ ma nyɔngma kɛ a he kɔpehi.

⁵⁸ Ekomɛ hu ji Halhul, Betzur, Gedor,

⁵⁹ Maarat, Betanot, kɛ Eltekon. E peeɔ ma ekpa kɛ a he kɔpehi.

⁶⁰ Ekomɛ hu ji Kiriat Baal (nɛ a tsɛɛ lɛ Kiriat Yearim ɔ), kɛ Raba. E peeɔ ma enyɔ kɛ a he kɔpehi.

⁶¹ Mahi nɛ ngɛ nga kplanaa a nɔ ji Bet Araba, Midin, Sekaka,

⁶² Nibshan, Ngo ma a, kɛ Engedi. E peeɔ ma ekpa kɛ a he kɔpehi.

⁶³ Yuda bi ɔmɛ nyɛ we nɛ a fie Yebus bi ɔmɛ nɛ hi Yerusalem ɔ kɛ je lejɛ ɔ. Lɔ ɔ he ɔ, Yebus bi ɔmɛ kɛ Yuda bi ɔmɛ ngɛ Yerusalem kɛ mwɔɔ.