Yoshua 14 - BAIBLO ALOO NGMAMI KLƆUKLƆU Ɔ

Yordan pa a bonyoku je zugba a dlami

¹ Bɔ nɛ a dla Kanaan zugba a nɛ ngɛ Yordan bonyoku je ɔ ngɔ ha Israel bi ɔmɛ kaa a weto ní ji nɛ ɔ nɛ. Osɔfo Eleazar, Nun binyumu Yoshua, kɛ Israel wɛtsoyi ɔmɛ dla zugba a ngɔ ha ma a.

² A fɔ sɔ kɛ dla zugba nɛ ngɛ Yordan pa a bonyoku je ɔ ngɔ ha wɛtso nɛɛ kɛ fa amɛ kaa bɔ nɛ Yawɛ fa Mose ke a pee ɔ.

^3-4 Mose dla zugba nɛ ngɛ Yordan pa a beleku je ɔ ngɔ ha wɛtso enyɔ kɛ fa momo. (Yosef nina ya pee wɛtso enyɔ: Manase kɛ Efraim.) Levi wɛtso ɔ lɛɛ Mose ha we mɛ zugba a eko. Se a ha mɛ mahi nɛ a maa hi mi, kɛ lohwe lɛmi hehi kɛ ha a na amɛ, kɛ a we mi lohwehi.

⁵ Israel bi ɔmɛ dla zugba a kaa bɔ nɛ Yawɛ fa Mose ɔ.

A ngɔ Hebron kɛ ha Kaleb

⁶ Ligbi ko ɔ, Yuda wɛtso ɔ mi ni komɛ ba Yoshua ngɔ ngɛ Gilgal. A ti nɔ kake ji Yefune nɛ je Keniz ɔ binyumu Kaleb. E ba bɔ Yoshua amaniɛ ke, “Mo nitsɛ o le munyu nɛ Yawɛ kɛ Mawu nɔmlɔ Mose tu nɛ kɔɔ i kɛ mo wa he ngɛ Kadesh Barnea.

⁷ Benɛ Yawɛ tsɔlɔ Mose tsɔ mi kɛ je Kadesh Barnea ke ma ya slaa zugba nɛ ɔ, jamɛ a be ɔ, i ye jeha nyingmi eywiɛ. I ba bɔ lɛ nɔ́ nɛ wa ya na a pɛpɛɛpɛ.

⁸ Ye nyɛmimɛ ɔmɛ nɛ kɛ mi ya a ha ma a tsui po; se imi lɛɛ i bu Yawɛ, ye Mawu ɔ tue kɛ pi si.

⁹ Lɔ ɔ he ɔ, Mose ka mi kita jamɛ a ligbi ɔ ke, zugba a he nɛ i ya nyɛɛ ɔ ma ba pee i kɛ ye nina wa weto ní daa; ejakaa i bu Yawɛ, ye Mawu ɔ tue kɛ pi si.

¹⁰ Se nyɛɛ hyɛ, jeha nyingmi eywiɛ kɛ enuɔ sɔuu ji nɛ ɔ nɛ Yawɛ kɛ Mose tu munyu nɛ ɔ. Jamɛ a be ɔ mi nɛ Israel bi ɔmɛ ngɛ nga a nɔ nyɛɛe ɔ nɛ. Nɛ, kaa bɔ nɛ Yawɛ wo si ɔ, e baa ye yi kɛ ba si mwɔnɛ nɛ ɔ. Nyɛɛ hyɛ mi ha! Amlɔ nɛ ɔ, i ye jeha nyingmi kpaanyɔ kɛ enuɔ,

¹¹ se i ngɛ he wami saminya. Bɔ nɛ i ngɛ be nɛ Mose tsɔ mi ɔ, jã kɛ̃ i ngɛ mwɔnɛ ɔ. I ngɛ he wami kɛ mwɔɔ nɛ ma nyɛ kɛ ya ta, loo ma kɛ tsu nɔ́ tsuaa nɔ́.

¹² Lɔ ɔ he ɔ, ye zugba a nɛ Yawɛ wo mi he si jamɛ a ligbi ɔ, ngɔɔ ha mi. Jamɛ a ligbi ɔ, wa ba bɔ nyɛ amaniɛ ke oblai komɛ nɛ a tsɛɛ mɛ ke Anak bi ɔ ngɛ ma ngua komɛ nɛ a fia gbogbo ngɔ wo a he ɔ a mi ngɛ lejɛ ɔ. Se i de ke, eko ɔ, Yawɛ maa piɛ ye he nɛ ma fie mɛ kaa bɔ nɛ Yawɛ de ɔ.”

¹³ Yoshua gbaa Yefune binyumu Kaleb, nɛ e ngɔ Hebron ma a ngɔ ha lɛ kaa e weto ní.

¹⁴ Lɔ ɔ he ɔ, Hebron ba pee Yefune nɛ je Keniz ɔ binyumu Kaleb weto ní kɛ ba si mwɔnɛ ɔ; ejakaa e bu Yawɛ, Israel Mawu ɔ tue kɛ pi si.

¹⁵ Sa a, Hebron biɛ ji Kiriat Arba (e sisi ji Arba ma). Arba nɛ ɔ ji Anak bi ɔmɛ a nɔmlɔ agbo pe kulaa. Jehanɛ ɔ, ta a se po, nɛ zugba a nɔ jɔ.