Yoshua 1 - BAIBLO ALOO NGMAMI KLƆUKLƆU Ɔ

Mawu fa Yoshua ke e ya ngɔ Kanaan zugba a

¹ Yawɛ tsɔlɔ Mose gbenɔ se ɔ, Yawɛ de Nun bi Yoshua, nɛ ji Mose sɔmɔlɔ ɔ

² ke, “Ye tsɔlɔ Mose gbo; lɔ ɔ he ɔ, o kɛ Israel ma a tsuo nyɛ dla nɛ nyɛ ya po Yordan pa a kɛ ya zugba a nɛ i ngɔ ha mɛ ɔ nɔ.

³ Kaa bɔ nɛ i wo Mose si ɔ, i kɛ he tsuaa he nɛ nyɛ nane maa ma a ha nyɛ.

⁴ Nyɛ huzu maa je nga a nɔ ngɛ leneyi je, kɛ ya su Lebanon ngɛ omleyi je; jehanɛ, kɛ je Yufrate pa a nya ngɛ beleku je, kɛ gu Hit bi ɔmɛ a zugba a mi, kɛ ya ta Mediterenia wo ɔ nya ngɛ bonyoku je tɔɔ.

⁵ Nɔ ko nɔ ko be mo nyɛe o wami be ɔ tsuo. Bɔ nɛ i kɛ Mose hi si ɔ, jã kɛ̃ i kɛ mo, Yoshua hu maa hi si. I be mo sie, nɛ i be mo kuae hulɔ.

⁶ O he nɛ wa, nɛ o pee kã; ejakaa mo nɛ o maa nyɛɛ ma nɛ ɔ hɛ mi kɛ ya ngɔ zugba a nɛ i ka a nɛmɛ ɔmɛ kita ke i kɛ ma ha mɛ ɔ nɛ.

⁷ Kaa bɔ nɛ i ngɛ dee ɔ, moo lɛɛ o he nɛ wa, nɛ o pee kã kɛkɛ; lɔ ɔ ji kaa, o maa ye mlaa a tsuo nɛ ye tsɔlɔ Mose wo mo ɔ nɔ sisiisi. Kó si ekoeko, nɛ he tsuaa he nɛ o maa ya a, o maa ye manye.

⁸ Moo kane mlaa womi nɛ ɔ daa. Mo susu he nyɔ kɛ pia; nɛ o ye nɔ́ tsuaa nɔ́ nɛ a ngma ngɛ mi ɔ nɔ; ja jã loko níhi a mi maa hi ha mo, nɛ o maa ye manye.

⁹ Ná nɛ o le kaa imi nitsɛ nɛ i ngɛ mo fae ke o he nɛ wa, nɛ o pee kã a nɛ. Koo nu sawale, nɛ o nine mi ko je wu. He tsuaa he nɛ o maa ya a, imi, Yawɛ, o Mawu ɔ, ma piɛ o he kɛ ya.”

Yoshua fa ma a nɔ hyɛli ɔmɛ

¹⁰ Jehanɛ, Yoshua fa ma a nɔ hyɛli ɔmɛ ke

¹¹ a ya kpa ma sito he ɔ, nɛ a de ni ɔmɛ ke, “Nyɛ hla blɔ hiami niye ní kɛ to; ejakaa hiɛmɛ nɛ ɔ ligbi etɛ ɔ, nyɛ maa po Yordan pa a kɛ ya ngɔ zugba a nɛ Yawɛ, nyɛ Mawu ɔ kɛ ha nyɛ ke nyɛ nɔ́ ɔ.”

¹² Yoshua de Ruben kɛ Gad bi ɔmɛ, kɛ Manase wɛtso fa a ke,

¹³ “Nyɛ kai kaa Yawɛ tsɔlɔ Mose de nyɛ ke Yawɛ, nyɛ Mawu ɔ ma ha nyɛ zugba nɛ ɔ ngɛ Yordan beleku je, nɛ e maa pee nyɛ hi he.

¹⁴ Nyɛ yi ɔmɛ, nyɛ bimɛ tsɔwi ɔmɛ, kɛ nyɛ we mi lohwe ɔmɛ maa hi hiɛ ɔ, se nyɛ kpɛti nyumuhi nɛ su ta yami nya a tsuo maa mia kɛ nyɛɛ nyɛ nyɛmimɛ Israel bi ɔmɛ a hɛ mi, nɛ a maa piɛ a he

¹⁵ kɛ yaa su be nɛ mɛ hu a nine maa su zugba a nɛ ngɛ Yordan bonyoku je ɔ nɔ. Zugba nɛ ɔ ji nɔ́ nɛ Yawɛ, nyɛ Mawu ɔ ngɔ ha mɛ ɔ nɛ. Lɔ ɔ se ɔ, nyɛɛ kpale kɛ ba nyɛ nitsɛmɛ nyɛ hi he nɛ ji zugba a nɛ ngɛ Yordan beleku je, nɛ́ Yawɛ tsɔlɔ Mose ngɔ ha nyɛ ɔ nɔ.”

¹⁶ A ha Yoshua heto ke, “Nɔ́ tsuaa nɔ́ nɛ o fa wɔ ke waa pee ɔ, wa maa pee, nɛ he tsuaa he nɛ o tsɔ wɔ ɔ, wa maa ya.

¹⁷ Bɔ nɛ wa bu Mose tue ngɛ nɔ́ tsuaa nɔ́ mi ɔ, jã kɛ̃ wa maa bu mo hu tue. Yawɛ, o Mawu ɔ kɛ mo nɛ hi si kaa bɔ nɛ e kɛ Mose hi si ɔ.

¹⁸ Nɔ tsuaa nɔ nɛ ma tsɔ o hɛ mi atuã, nɛ e be mo tue bue ɔ, a gbe lɛ. Moo lɛɛ o he nɛ wa, nɛ o pee kã saminya kɛkɛ.”