Yona 4 - BAIBLO ALOO NGMAMI KLƆUKLƆU Ɔ

Yona muklii mi fumi, kɛ Mawu mɔbɔ nami

¹ Se nɔ́ nɛ ɔ ngɔɛ Yona nya kulaa, nɛ e muklii mi fu wawɛɛ nitsɛ.

² Lɔ ɔ he ɔ, e kɛ hɛdɔ fa kue ha Yawɛ nɛ e de ke, “Yawɛ, benɛ i na we ma je ye zugba a nɔ lokoo ɔ, enɛ ɔ nɛ i na nɛ i de ɔ nɛ. Enɛ ɔ he je nɛ i tu fo kɛ ho Spania ya a nɛ. Ejakaa mo Mawu ɔ, i le kaa o mi mi jɔ, o naa mɔbɔ, o toɔ o tsui si, o suɔmi tsakee we; nɛ o kɛ nɔ he yayami paa nɔ.

³ Lɔ ɔ he ɔ, Yawɛ, i kpa mo pɛɛ nɛ o gbe mi; e hi kaa ma gbo mohu pe kaa ma hi je mi.”

⁴ Yawɛ bi lɛ ke, “E da ha mo kaa o mi mi fuɔ lo?”

⁵ Jehanɛ Yona je ma a mi kɛ ho beleku je ya nɛ e ya pee gba ko ngɛ lejɛ ɔ nɛ e hi sisi ngɛ hɔ ɔ mi, konɛ e kɛ hyɛ kaa mɛni sane maa ba Nineve nɔ lo.

⁶ Kɛkɛ nɛ Yawɛ Mawu ha nɛ tso ko puɛ, nɛ e ha kɛ pee hɔ ngɛ Yona yi nɔ, nɛ enɛ ɔ ha e he mi jɔ lɛ. Yona bua jɔ tso ɔ he saminya.

⁷ Se benɛ je ke e naa a, Mawu ha gɔgɔ ko ye tso ɔ, nɛ e ngla.

⁸ Benɛ pu te si ɔ, Mawu ha beleku kɔɔhiɔ ko nɛ dɔ la fia, nɛ pu ɔ sãã Yona yi mi, nɛ e miɔ nɛ e maa hɛli. Kɛkɛ nɛ e de ke, “E hi kaa ma gbo mohu pee kaa ma hi je mi.”

⁹ Se Mawu bi Yona ke, “E da ha mo kaa o mi mi fuɔ tso nɛ ɔ lo?” Yona he nɔ ke, “I ngɛ he blɔ kaa ye mi mi fuɔ kɛ ya siɔ gbenɔ mi po.”

¹⁰ Yawɛ de lɛ ke, “Nyɔ kake mi tso nɛ ɔ puɛ, nɛ nyɔ kake mi nɔuu e gbo; o gbo we he dengme ko, nɛ pi mo nɛ o ha e puɛ, se kɛ̃ ɔ, e gbenɔ dɔ mo.

¹¹ Nɛ imi lɛɛ e sɛ kaa Nineve sane dɔɔ mi lo? Nineve ɔ, ma ngua, kɛ e mi nimli babauu, maa pee 120,000 kɛ se, nɛ a li kpakpa kɛ yayami a kpɛti slɔɔto. Lohwehi babauu hu ngɛ ma a mi.”