Yona 3 - BAIBLO ALOO NGMAMI KLƆUKLƆU Ɔ

Yona bu Yawɛ tue

¹ Yawɛ kɛ Yona tu munyu ekohu,

² nɛ e de lɛ ke, “Yaa Nineve ma nguaa a mi, nɛ o ya de ni ɔmɛ sɛ nɛ i kɛ ha mo ɔ.”

³ Yona bu Yawɛ tue, nɛ e ho Nineve ya. A tsɔɔ kaa Nineve ma a kle saminya, nɛ ligbi etɛ a kɛ ma nyɛ nyɛɛ kɛ po ma a mi.

⁴ Yona ba su ma a mi, nɛ kekleekle ligbi ɔ nɔ ɔ, e bɔni kpami kɛ ngɛ a tue mi woe ke, “Hiɛmɛ nɛ ɔ ligbi nyingmi eywiɛ se ɔ, a ma kpata Nineve hɛ mi.”

⁵ Nineve bi ɔmɛ he Mawu sɛ gbi ɔ ye, nɛ a ha hwɔ. Nɔ tsuaa nɔ bu kpekpe ya bo, kɛ je nɔmlɔ ngua nɔ kɛ ya si nɔmlɔ wayo nɔ, nɛ a kɛ tsɔɔ kaa a tsake a tsui.

⁶ Benɛ Nineve matsɛ ɔ nu he ɔ, e te si ngɛ e sɛ ɔ nɔ. E kpa e he ablade bo ɔ, nɛ lɛ hu e bu kpekpe ya bo, nɛ e hi si ngɛ la zu mi ngɛ zugba.

⁷ E tsɔ kɛ sɛ pɔtɛɛ ko ke a ya de Nineve bi ɔmɛ ke, “Imi Nineve matsɛ, kɛ ye nikɔtɔma amɛ wa ngɛ mlaa woe ke, nɔ ko nɔ ko nɛ ko sa e nya nɔ́ ko, loo e nu nyu po; nɔmlɔ jio, na jio, to jio.

⁸ Nɔ tsuaa nɔ nɛ bu kpekpe ya bo, konɛ a na he piami ngɛ nimli kɛ lohwehi tsuo a hɛ mi; nɛ nɔ tsuaa nɔ nɛ sɔle wawɛɛ kɛ tsɛ Mawu; nɔ tsuaa nɔ nɛ kpale kɛ je e blɔ yayami ɔmɛ a nɔ, kɛ e yi mi wami ní ɔmɛ a se,

⁹ kaa alini Mawu ma tsake e yi mi tomi; kaa alini Mawu mi mi fumi ɔ nya maa ba si, nɛ wa hɛ mi be kpatae.”

¹⁰ Benɛ Mawu na nɔ́ nɛ ni ɔmɛ pee, kɛ bɔ nɛ a tsake a je mi babɛ ɔ, e kpale e nya se. Nɛ yi mi nɛ e to kaa e ma kpata a hɛ mi ɔ, e pee we ja hu.