Yona 2 - BAIBLO ALOO NGMAMI KLƆUKLƆU Ɔ

Yona fa kue ha Yawɛ

¹ Yona sɔle nɛ e kpa Yawɛ, e Mawu ɔ pɛɛ ngɛ lo ɔ muklii mi,

² nɛ e de ke, “Yawɛ, i tsɛ mo ngɛ ye fimi be mi nɛ o bu mi tue. I fa kue ha mo kɛ je gbeje lokoo nɛ o nu ye gbi.

³ O sake mi ngɔ fɔ muɔ voovoohi a mi ngɛ wo ɔ sisi tɔɔ, he nɛ nyu babauu bɔle mi ngɛ, nɛ o we oslɔke ɔmɛ kuɔɔ kɛ pueɔ ye nɔ.

⁴ E pee mi kaa nɔ́ nɛ a je mi we nɛ i be o sɔlemi we klɔuklɔu ɔ nae hu.

⁵ Nyu ɔ bɔle mi, nɛ i ngɛ nyu miie. Wo ɔ ha ye yi nɔ tsuo pɛpɛɛpɛ, nɛ wosuma blaa ye yi.

⁶ I kple si kɛ ho yo ɔmɛ a sisi tomi he ɔ ya tɔɔ, kɛ ya gbeje, he nɛ a sa ye yi wo kɛ yaa neneene. Se mo Yawɛ, ye Mawu, o je mi kɛ je kikɛmɛ a muɔ nɛ ɔ mi hɛ ngmengmle.

⁷ Benɛ ye mumi ngɛ ye mi jee ɔ, i fa kue ha mo Yawɛ ngɛ o we klɔuklɔu ɔ, nɛ o bu mi tue.

⁸ Nihi nɛ jaa amagahi, nɛ ji níhi nɛ a he be se nami ɔ, a ji nihi nɛ je a Mawu ɔ nɛ sa kaa a ja lɛ ɔ se.

⁹ Se imi lɛɛ ma la kɛ je o yi, ma sã bɔ ha mo, nɛ ma ye ye siwo ɔ nɔ; ejakaa mo Yawɛ pɛ ji nɔ nɛ heɔ nɔ yi wami.”

¹⁰ Kɛkɛ nɛ Yawɛ fa lo ɔ ke e ya vie Yona ngɔ fɔ wo ɔ nya; nɛ e pee ja.