Yohane 8 - BAIBLO ALOO NGMAMI KLƆUKLƆU Ɔ

Yo nɛ ngɛ ajuama bɔe nɛ a nu lɛ ɔ

¹ Benɛ ni ɔmɛ tsuo je kɛ ho we mi ya a, Yesu pue nɔ kɛ ho Oliv yo ɔ he ya.

² E nɔ jena mɔtu mla a, e kpale e se kɛ ba sɔlemi we ɔ. Ni ɔmɛ tsuo ba bu e nɔ, nɛ e hi si, nɛ e bɔni mɛ ní tsɔɔmi.

³ Mlaa tsɔɔli ɔmɛ, kɛ Farisi bi ɔmɛ ngɔ yo ko nɛ ya ngɛ ajuama bɔe nɛ a nu lɛ kɛ ba, nɛ a kɛ lɛ ba da ma a tsuo hɛ mi.

⁴ A de Yesu ke, “Tsɔɔlɔ, yo nɛ ɔ ya ngɛ ajuama bɔe nɛ a nu lɛ.

⁵ Wa mlaa a nya a, Mose fa ke, ‘Yo kaa kikɛ nɛ ɔ, a fia lɛ tɛ nɛ e gbo.’ Moo lɛɛ kɛ o ngɛ dee kɛɛ?”

⁶ Enɛ ɔ, a de kɛ da lɛ, konɛ a na nɔ́ ko nɛ a kɛ ya po e nya. Se Yesu sɔ̃ si, nɛ e kɛ e nine nguɛ ngma ní ngɛ zugba.

⁷ Benɛ a ngɛ nɔ ngɛ Yesu munyu bie ɔ, e wo e yi nɔ nɛ e de mɛ ke, “Nyɛ ti nɔ nɛ pee we yayami ko ɔ, lɛ kekle e fia yo ɔ tɛ ɔ.”

⁸ Yesu kpale sɔ̃ si, nɛ e tsa ní ngmami ɔ nɔ ngɛ zugba.

⁹ Se mɛɛ lɛɛ benɛ a nu munyu nɛ ɔ, a bɔni jemi kakaaka, kɛ je nɔkɔtɔma a nɔ kɛ ya si e piɛ Yesu, kɛ yo ɔ pɛ nɛ daa si ngɛ lejɛ ɔ kɛ mwɔɔ.

¹⁰ Jehanɛ ɔ, Yesu wo e yi nɔ ekohu, nɛ e bi yo ɔ ke, “Maa, nihi nɛ ba po o nya a, jije a ngɛ? A ti nɔ kake po bui mo fɔ lo?”

¹¹ Yo ɔ he nɔ ke, “Nyɔmtsɛ, nɔ ko nɔ ko bui mi fɔ.” Yesu de lɛ ke, “Saminya, imi hu i bui mo fɔ. Yaa, se mohu kpa yayami peemi.”]

Yesu ji la kɛ ha je ɔ

¹² Yesu, kɛ Farisi bi ɔmɛ tu munyu ekohu, nɛ e de mɛ ke, “Imi ji je ɔ la a nɛ. Nɔ tsuaa nɔ nɛ nyɛɛɔ ye se ɔ, e naa la a nɛ haa nɔ wami ɔ; nɛ e be diblii mi nyɛɛe kɔkɔɔkɔ.”

¹³ Farisi bi ɔmɛ de lɛ ke, “Jehanɛ lɛɛ o ngɛ mo nitsɛ o he odase yee. Nɔ nɛ o ngɛ dee ɔ be mi fɛɛ.”

¹⁴ Yesu he nɔ ke, “E ngɛ mi mohu kaa imi nitsɛ i ngɛ ye he odase yee lɛɛ, se ye odase ɔ ngɛ mi, ejakaa i le he nɛ i je, kɛ he nɛ i yaa. Nyɛɛ lɛɛ nyɛ li he nɛ i je kɛ ba; nɛ he nɛ i yaa hu nyɛ li.

¹⁵ Nyɛɛ lɛɛ nyɛ kojoɔ he lo nya, se imi lɛɛ, i kojo we nɔ ko.

¹⁶ Se ke i kojo tete po ɔ, e da, ejakaa pi imi nɔ kake nɛ i ngɛ enɛ ɔ pee. Tsɛ ɔ nɛ tsɔ mi ɔ piɛ ye he.

¹⁷ A ngma ngɛ nyɛ mlaa a mi ke, ke ni enyɔ ye odase nɛ kɔɔ ɔ, e peeɔ anɔkuale.

¹⁸ Imi lɛɛ i yeɔ imi nitsɛ ye he odase, nɛ Tsɛ ɔ nɛ tsɔ mi ɔ hu yeɔ ye he odase.”

¹⁹ A bi lɛ ke, “O Tsɛ ɔ, jije e ngɛ?” Yesu he nɔ ke, “Nyɛ li mi, nɛ Tsaatsɛ hu nyɛ li lɛ. Kaa nyɛ le mi jinɛ nyɛ maa le Tsaatsɛ hulɔ.”

²⁰ Yesu de ní nɛ ɔmɛ tsuo, be mi nɛ e ngɛ ní tsɔɔe ngɛ sɔlemi we ɔ ngɛ tsu mi he nɛ a kɛ tó tsumi daka amɛ to ɔ. Se a nui lɛ, ejakaa e be ɔ sui.

He nɛ i yaa a, nyɛ be nyɛe maa ya

²¹ Yesu kpale de ni ɔmɛ ke, “Imi lɛɛ i yaa! Nyɛ ma hla mi, se nyɛ ma gbo kɛ nyɛ he yayami. He nɛ i yaa a, nyɛ be nyɛe maa ba.”

²² Lɔ ɔ he ɔ, Yuda ma nimeli ɔmɛ bi ke, “Ke e de ke he nɛ e yaa a, wa be nyɛe maa ya a, kɛ e ngɛ tsɔɔe kɛɛ? E yaa gbe e he lo?”

²³ Yesu he nɔ ke, “Nyɛɛ lɛɛ je nɛ ɔ mi bi ji nyɛ; se imi lɛɛ hiɔwe i je. Je nɛ ɔ mi bi ji nyɛ, se imi lɛɛ i ji je nɛ ɔ mi.

²⁴ Enɛ ɔ he nɛ i de nyɛ ke nyɛ ma gbo kɛ nyɛ he yayami ɔ nɛ. Niinɛ, nyɛ ma gbo kɛ nyɛ he yayami ɔmɛ ke nyɛ he we yi kaa imi ji nɔ nɛ i ji ɔ.”

²⁵ A bi lɛ ke, “Mɛnɔ ji mo?” Yesu he nɔ ke, “Sisije ɔ, mɛni i de nyɛ ɔ?

²⁶ I le nyɛ he sanehi babauu nɛ ma kɛ kojo nyɛ. Se nɔ nɛ tsɔ mi ɔ, anɔkualetsɛ ji lɛ, lɔ ɔ he ɔ, nɔ nɛ i nu kɛ je e nya a, lɔ ɔ i deɔ je ɔ.”

²⁷ Se mɛɛ lɛɛ a li kaa Tsɛ ɔ he munyu Yesu kɛ mɛ ngɛ tue ɔ.

²⁸ Jehanɛ e de mɛ ke, “Ke nyɛ ná wo Nɔmlɔ Bi ɔ nɔ ɔ, nyɛ maa le kaa imi ji nɔ nɛ i ji ɔ. Kɛkɛ ɔ, nyɛ maa le kaa i to we imi nitsɛ ye yi mi kɛ tsu we nɔ́ ko gblegbleegble. Mohu nɔ́ nɛ Tsɛ ɔ tsɔɔ mi ɔ, lɔ ɔ pɛ i deɔ.

²⁹ Tsɛ ɔ nɛ tsɔ mi ɔ kɛ mi ngɛ; e si we imi nɔ kake too, ejakaa i peeɔ e suɔmi nya ní.”

³⁰ Benɛ Yesu de ní nɛ ɔmɛ ɔ, nihi babauu nɛ nu ɔ he lɛ ye.

Odehehi kɛ nyɔguɛhi

³¹ Yesu de Yuda bi nɛ he lɛ ye ɔ ke, “Ke nyɛ pɛtɛ ye munyu ɔ he ɔ, lɛɛ nyɛ maa pee ye kaseli nitsɛnitsɛmɛ.

³² Kɛkɛ ɔ, nyɛ maa le anɔkuale ɔ; nɛ anɔkuale ɔ ma ha nyɛ maa ye nyɛ he.”

³³ A he nɔ ke, “Abraham nina ji wɔ, nɛ wɔɔ lɛɛ wa yi nyɔguɛ ha nɔ ko hyɛ. Ke o de ke, ‘Nyɛ maa ye nyɛ he’ ɔ, kɛ o ngɛ tsɔɔe kɛɛ?”

³⁴ Yesu de mɛ ke, “I ngɛ nyɛ dee anɔkuale mi ke nɔ tsuaa nɔ nɛ peeɔ yayami ɔ, yayami ɔ nyɔguɛ ji lɛ.

³⁵ Nyɔguɛ hí we mi kɛ yɛ neneene, se bi lɛɛ e hii si kɛ yaa neneene.

³⁶ Lɔ ɔ he ɔ, ke Bi ɔ ha nyɛ ye nyɛ he ɔ, nyɛ maa ye nyɛ he niinɛ.

³⁷ I le kaa Abraham nina ji nyɛ! Mɛni he je mɔ nɛ nyɛ ngɔɛ ye tsɔɔmi ɔ, nɛ nyɛ ngɛ mi hlae nyɛɛ gbe mohu ɔ.

³⁸ Imi lɛɛ níhi nɛ Tsaatsɛ tsɔɔ mi ɔ, lɔ ɔmɛ i deɔ; se nyɛɛ lɛɛ níhi nɛ nyɛ tsɛ ɔ de nyɛ ɔ, lɔ ɔmɛ nyɛ peeɔ.”

³⁹ A he nɔ ke, “Wɔɔ lɛɛ wa tsɛ ji Abraham.” Yesu de mɛ ke, “Abraham nina ji nyɛ jinɛ nyɛ maa pee níhi nɛ Abraham pee ɔ nɔuu.

⁴⁰ Imi lɛɛ anɔkuale ɔ nɛ i nu kɛ je Tsaatsɛ Mawu nya a, lɔ ɔ i deɔ nyɛ; se nyɛ ngɛ mi hlae nɛ nyɛɛ gbe. Abraham pee we nɔ́ ko kaa kikɛ nɛ ɔ.

⁴¹ Níhi nɛ nyɛ tsɛ peeɔ ɔ, lɔ ɔmɛ ngɛ peeɔ ɔ nɛ.” A he nɔ ke, “Wɔɔ lɛɛ pi ajuama mi bimɛ ji wɔ. Wa ngɛ tsɛ kake. Wa tsɛ ji Mawu.”

⁴² Yesu de mɛ ke, “Mawu ji nyɛ Tsɛ niinɛ jinɛ nyɛ maa suɔ mi, ejakaa Mawu nɛ tsɔ mi; se pi imi nitsɛ ye yi mi nɛ i to kɛ ba. Mawu ngɔ nɛ i je kɛ ba nyɛ ngɔ.

⁴³ Munyu nɛ i kɛ nyɛ tu ɔ, nyɛ nɛ nya, ejakaa nyɛ bui ye munyu ɔ.

⁴⁴ Nyɛ tsɛ nɛ fɔ nyɛ ji Abosiami; nɛ nyɛ suɔ kaa nyɛ maa pee e suɔmi nya ní. Kɛ je sisije ɔ, nɔ gbelɔ ji lɛ, nɛ e kɛ anɔkuale yi gblegbleegble, ejakaa anɔkuale be e mi. Ke e ye lakpa a, e tsɔɔ bɔ nɛ e su ngɛ, ejakaa lakpatsɛ kpanaku ji lɛ.

⁴⁵ Se imi lɛɛ, i tuɔ anɔkuale; nɛ lɔ ɔ he ɔ, nyɛ he we mi yi.

⁴⁶ Nyɛ ti mɛnɔ ma nyɛ tsɔɔ kaa i pee yayami. Ke anɔkuale i tuɔ ɔ, lɛɛ mɛni he je nyɛ he we mi yi ɔ?

⁴⁷ Nɔ nɛ je Mawu ngɔ ɔ, e nuɔ Mawu munyu. Se nyɛɛ lɛɛ nyɛ nui, ejakaa pi Mawu ngɔ nɛ nyɛ je.”

Yesu kɛ Abraham

⁴⁸ Yuda bi ɔmɛ bi Yesu ke, “Ke wa de ke Samaria no ji mo, nɛ mumi yayami ngɛ o mi ɔ, wa tɔ lo?”

⁴⁹ Yesu he nɔ ke, “Mumi yayami be ye mi. Imi lɛɛ Tsaatsɛ hɛ mi nyami i woɔ, se nyɛɛ lɛɛ nyɛ ngɛ ye he guɛ gbee.

⁵⁰ I hla we imi nitsɛ ye hɛ mi nyami. Se nɔ ko ngɛ nɛ ngɛ hlae, nɛ lɛ nɛ maa kojo.

⁵¹ I ngɛ nyɛ dee anɔkuale mi ke nɔ tsuaa nɔ nɛ buu ye tsɔɔmi ɔ tue ɔ, e be gboe gblegbleegble.”

⁵² Yuda bi ɔmɛ de lɛ ke, “Jehanɛ lɛɛ wa ná nɔ mi mami kaa mumi yayami ngɛ o mi. Abraham gbo, nɛ gbali ɔmɛ hu gbo, se moo lɛɛ o ngɛ dee ke nɔ tsuaa nɔ nɛ buu o tsɔɔmi tue ɔ be gboe gblegbleegble.

⁵³ Tsaatsɛ Abraham nɛ gbo ɔ, o pe lɛ lo? Jehanɛ ɔ hu, gbali ɔmɛ nɛ gbo ɔ nɛɛ? Kɛ moo lɛɛ o buɔ o he kɛɛ?”

⁵⁴ Yesu he nɔ ke, “Kaa imi nitsɛ nɛ i woɔ ye hɛ mi nyami ɔ, lɛɛ lɔ ɔ pi nɔ́ ko; se hyɛ, Tsaatsɛ nɛ nyɛ tsɛɔ ke nyɛ Mawu ɔ, lɛ nɔuu nɛ woɔ ye hɛ mi nyami.

⁵⁵ Imi le lɛ, se nyɛɛ lɛɛ nyɛ li lɛ. Ke i de ke i li lɛ ɔ, lɛɛ lakpatsɛ ji mi kaa nyɛ nɔuu. Se i le lɛ, nɛ i buɔ lɛ tue.

⁵⁶ Nyɛ tsɛ Abraham hla nɛ e na ye bami be ɔ kɛ bua jɔmi. E na hulɔ, nɛ e nya.”

⁵⁷ Yuda bi ɔmɛ bi lɛ ke, “Mo nɛ o na we jeha nyingmi enuɔ po ɔ, o na Abraham lo?”

⁵⁸ Yesu he nɔ ke, “I ngɛ nyɛ dee anɔkuale mi ke i ngɛ loko a fɔ Abraham.”

⁵⁹ Kɛkɛ nɛ a kukuɔ tɛ nɛ a maa fia Yesu, se e laa e he, nɛ e je sɔlemi we ɔ.