Yohane 7 - BAIBLO ALOO NGMAMI KLƆUKLƆU Ɔ

Yesu kɛ e nyɛmimɛ ɔmɛ

¹ Enɛ ɔ se ɔ, Yesu kpa si ngɛ Galilea pɛ, se e sume nɛ e ya Yudea zugba a mi, ejakaa Yuda bi ɔmɛ ngɛ lɛ hlae nɛ a gbe.

² Benɛ Yuda bi ɔmɛ a Gbasisihimi nyami be ɔ ngɛ sue ɔ,

³ Yesu nyɛminyumu ɔmɛ de lɛ ke, “Jee hiɛ ɔ, nɛ o ya Yudea, konɛ o se nyɛɛli ɔmɛ nɛ a na níhi nɛ o ngɛ tsue ɔ.

⁴ Ke nɔ ko suɔ kaa ma nɛ le lɛ saminya a, níhi nɛ e peeɔ ɔ, e laa we nɔ. Ní ɔmɛ tsuo nɛ o ngɛ pee ɔ, ha nɛ je ɔ tsuo nɛ nu he.”

⁵ E nyɛminyumu ɔmɛ tete he we lɛ yi.

⁶ Yesu he nɔ ke, “Ye be ɔ sui lolo; se nyɛɛ lɛɛ be tsuaa be hi ha nyɛ.

⁷ Je ɔ be nyɛ nyɛe, se a nyɛɔ mi, ejakaa a yeɔ odase kɛ siɔ mɛ ngɛ ní yayamihi nɛ a peeɔ ɔ he.

⁸ Nyɛɛ ya nɛ nyɛ ya ye nyami be ɔ. Imi lɛɛ i be yae, ejakaa be nɛ maa da mi ɔ na we nɛ e su.”

⁹ Nɛ e de jã a, e tlɔ Galilea.

Yesu ya Gbasisihimi nyami ɔ

¹⁰ Nɛ Yesu nyɛminyumu ɔmɛ je ɔ, pee se ɔ, lɛ hu e pue nɔ kɛ ho. Se e je we e he si paa; mohu e ngɛ e he lae.

¹¹ Yuda ma nimeli ɔmɛ hla lɛ ngɛ lejɛ ɔ; nɛ a bi si ke, “Jije e ngɛ?”

¹² Ma a tsuo tu Yesu he munyu kusikusi. Benɛ ni komɛ de ke, “Nɔmlɔ kpakpa ji lɛ” ɔ, ni komɛ hu de ke, “Dɛbi, e ngɛ ma a nane tɔtɔe”.

¹³ Se kɛ̃ ɔ, nɔ ko nɔ ko nyɛ we nɛ e tu Yesu he munyu ngɛ ma a hɛ mi paa, ejakaa a ngɛ Yuda bi ɔmɛ gbeye yee.

¹⁴ Benɛ nyami ɔ ngɛ nɔ yae ɔ kɛkɛ nɛ Yesu ya hia si ngɛ sɔlemi we ɔ, nɛ e bɔni ní tsɔɔmi.

¹⁵ Yuda bi ɔmɛ a hɛ mi pee mɛ yaa, nɛ a bi ke, “Nɔmlɔ nɛ kase we ní ɔ, kɛ peeɔ kɛɛ nɛ e le ní kikɛ nɛ ɔ.”

¹⁶ Yesu he nɔ ke, “Nɔ́ nɛ i ngɛ nyɛ tsɔɔe ɔ ji imi nitsɛ ye yi mi; nɔ nɛ tsɔ mi ɔ nɛ ngɔ ha mi.

¹⁷ Nɔ tsuaa nɔ nɛ suɔ kaa e maa pee Mawu suɔmi nya ní ɔ, e maa na kaa nɔ́ nɛ i ngɛ tsɔɔe ɔ je Mawu ngɔ, se pi imi nitsɛ ye he wami nya.

¹⁸ Ke nɔ ko tuɔ munyu ngɛ lɛ nitsɛ e he wami nya a, e ngɛ hɛ mi nyami hlae ha e he. Se anɔkualetsɛ lɛɛ e hlaa kaa e maa wo nɔ nɛ tsɔ lɛ ɔ mohu hɛ mi nyami, nɛ sisimi be e mi.

¹⁹ Pi Mose nɛ wo nyɛ mlaa a? Nɛ nyɛ ti nɔ ko nɔ ko yi nɔ ɔ? Mɛni he je nyɛ ngɛ hlae nɛ nyɛɛ gbe mi ɔ?”

²⁰ Ma a tsuo he nɔ ke, “Mo nɔmlɔ nɛ ɔ, mumi yayami ngɛ o mi! Mɛnɔ ngɛ mo hlae nɛ e gbe?”

²¹ Yesu he nɔ ke, “Nyakpɛ nɔ́ kake pɛ i pee nɛ nyɛ tsuo nyɛ hɛ mi pee nyɛ yaa.

²² Mose nɛ fa ke nyɛɛ po nyɛ binyumu ɔmɛ. (Pohu pi Mose nɛ de; nyɛ nɛmɛ ɔmɛ nɛ a je sisi.) Lɔ ɔ he ɔ, Hejɔɔmi ligbi ɔ, nyɛ poɔ bimwɔyo.

²³ Ke Hejɔɔmi ligbi ɔ, nyɛ poɔ nɔ, konɛ a ko tɔ Mose mlaa a, mɛni he je nyɛ mi mi fuɔ mi kaa i tsa hiɔtsɛ Hejɔɔmi ligbi ɔ?

²⁴ Ke nyɛ ngɛ kojoe ɔ, nyɛ kpa nɔ hɛ mi hyɛmi, nɛ́ nyɛɛ ye dami sane.”

Yesu ji Mesia a lo?

²⁵ Kɛkɛ nɛ Yerusalem bi ɔmɛ a ti ni komɛ bi ke, “Anɛ pi nyumu nɛ ɔ nɛ ma nimeli ɔmɛ ngɛ hlae nɛ a gbe ɔ?

²⁶ Hyɛ kaa jehanɛ lɛɛ e daa si paa ngɛ ní tsɔɔe nɛ a de we lɛ nɔ́ ko. Eko piɔ a na kaa lɛ ji Kristo ɔ niinɛ.

²⁷ Kristo ɔ nɛɛ, anɛ nɔ ko maa le he nɛ e maa je lo? Tse wɔ tsuo wa le he nɛ nɔmlɔ nɛ ɔ je.”

²⁸ Jehanɛ, benɛ Yesu ngɛ ní ɔ tsɔɔe ngɛ sɔlemi we ɔ, e kpa ngmlaa kɛ bi ke, “Anɛ nyɛ le mi tutuutu? He nɛ i je ɔ, nyɛ le? Pi imi nitsɛ ye he wami nya nɛ i ba. Nɔ nɛ tsɔ mi ɔ, anɔkualetsɛ ji lɛ; nyɛɛ nyɛ li lɛ.

²⁹ Imi lɛɛ i le lɛ, ejakaa e ngɔ nɛ i je, nɛ lɛ ji nɔ nɛ tsɔ mi.”

³⁰ Kɛkɛ nɛ a pee kaa a maa nu Yesu amlɔ nɔuu, se nɔ ko nɔ ko nyɛ we nɛ e ta e he, ejakaa e be ɔ sui lolo.

³¹ Ma mi bi ɔmɛ a ti nihi babauu he Yesu ye, lɔ ɔ he ɔ, a bi ke, “Anɛ Mesia a nɛ maa ba a ma nyɛ to okadi pe nɔmlɔ nɛ ɔ lo?”

A tsɔ nihi nɛ́ a ya nu Yesu

³² Benɛ Farisi bi ɔmɛ nu nɛ ma kpekpemi ɔ ngɛ Yesu he munyu tue kusikusi ɔ, a kɛ osɔfo nikɔtɔma amɛ tsɔ nihi ke a ya nu lɛ kɛ ba.

³³ Yesu de mɛ ke, “E piɛ be bɔɔ pɛ nɛ i kɛ nyɛ maa hi si, kɛkɛ ma kpale kɛ ho nɔ nɛ tsɔ mi ɔ ngɔ ya.

³⁴ Nyɛ ma hla mi, se nyɛ be mi nae; ejakaa he nɛ i yaa a, nyɛ be nyɛe maa ba lejɛ ɔ.”

³⁵ Yuda ma nimeli ɔmɛ bi mɛ nitsɛmɛ a he ke, “Jije po e yaa nɛ wa be lɛ nae hu ɔ? Anɛ e maa ho Hela ma nguaa amɛ a mi ya ngɛ wa nyɛmimɛ ɔmɛ a ngɔ, nɛ e ya tsɔɔ Hela bi ɔmɛ ní lo?

³⁶ E de ke, wa ma hla lɛ, se wa be lɛ nae; nɛ he nɛ e yaa hu, wa be nyɛe maa ya. Kɛ e ngɛ tsɔɔe kɛɛ?”

Pa nɛ haa nɔ nyu nɛ wami ngɛ mi

³⁷ Nyagbe ligbi ɔ nɛ ji nyami ligbi nguaa pe kulaa a, Yesu te da si, nɛ e de kɛ ngmlaa ke, “Nɔ tsuaa nɔ nɛ kuma ngɛ lɛ yee ɔ, e ba ye ngɔ nɛ e ba nu nyu.

³⁸ A ngma ke, ‘Nɔ tsuaa nɔ nɛ heɔ mi yeɔ ɔ, pa nɛ baa nyu babaaba nɛ wami ngɛ mi maa fo dɔ kɛ je e tsui mi.’ ”

³⁹ Blɔɔ, Mumi ɔ he Yesu de enɛ ɔ nɛ, ejakaa nɔ tsuaa nɔ nɛ heɔ lɛ yeɔ ɔ nine maa su Mumi ɔ nɔ. Se jamɛ a be ɔ, Mumi ɔ bɛ lolo, ejakaa a na we nɛ a wo Yesu hɛ mi nyami.

Ni ɔmɛ a mi gba

⁴⁰ Benɛ ma mi bi ɔmɛ nu munyu nɛ ɔmɛ ɔ, a ti ni komɛ de ke, “Niinɛ, nɔmlɔ nɛ ɔ ji gbalɔ ɔ nɛ.”

⁴¹ Ni komɛ hu de ke, “Lɛ ji Mesia a nɛ.” Se ni kpa komɛ lɛɛ a bi ke, “Mesia a, Galilea nɛ e maa je lo?

⁴² Ejakaa a ngma ke Mesia a maa pee Matsɛ David nina; nɛ jehanɛ hu, Betlehem, he nɛ Matsɛ David hi ɔ, lejɛ ɔ a ma fɔ lɛ ngɛ.”

⁴³ Benɛ a de nɔ́ nɛ ɔ, kɛkɛ nɛ ni ɔmɛ a mi gba enyɔ ngɛ Yesu he.

⁴⁴ Ni komɛ pee kaa a maa nu Yesu, se nɔ ko nɔ ko nyɛ we nɛ e ta e he.

Yuda ma nimeli ɔmɛ he we yi

⁴⁵ Benɛ tsɔli ɔmɛ kpale kɛ ba a, osɔfo nikɔtɔma amɛ, kɛ Farisi bi ɔmɛ bi mɛ ke, “Mɛni he je nyɛɛ kɛ lɛ bɛ ɔ?”

⁴⁶ Tsɔli ɔmɛ he nɔ ke, “Bɔ nɛ nɔmlɔ nɛ ɔ tuɔ munyu ɔ, nɔ ko tu we munyu ja gblee.”

⁴⁷ Farisi bi ɔmɛ bi tsɔli ɔmɛ ke, “Anɛ e pee nyɛ hu kuasia lo?

⁴⁸ Anɛ nyɛ nu hyɛ kaa ma nimeli ɔmɛ, aloo Farisi bi ɔmɛ a ti nɔ kake ngmelu po he lɛ ye lo?

⁴⁹ Ma kpekpemi nɛ ɔ, a gbiɛ mɛ pɛ, ejakaa a li Mose mlaa a.”

⁵⁰ Farisi bi ɔmɛ a ti nɔ kake nɛ a tsɛɛ lɛ Nikodemo, nɛ́ be ko ɔ e ba Yesu ngɔ ɔ ngɛ lejɛ ɔ. E de ma a ke,

⁵¹ “Wa mlaa a nya a, e sɛ kaa wa buɔ nɔ ko fɔ be mi nɛ wa bi we e nya mi kaa mɛni e pee lo.”

⁵² A he nɔ ke, “Saminya! Tse mo hu Galilea no ji mo! Yaa kpa ngmami ɔmɛ a mi kaa o maa na gbalɔ ko nɛ je Galilea lo!”